Read Hrangkhol IRPHUTNA 47 Bible Online

IRPHUTNA 47 - Hrangkhol bible

IRPHUTNA 47

¹Khanchu Josefa’n a urênghai mi ringa a tuanghaia, Faroa kuang khan, “Ka pa le ki urênghai, an neinun le an belra rual le sehrât rualhai an inei murdi leh Kanaan ram ata an zuang ichum thâk tâk a ni: khan, irngai ta, Gosen rama an om,” a tia.

²Faroa kuanga hmêlirhriattirna an neia;

³Faroa’n a urênghai kha, “Imo nin isin ual ngai?” a tia. Anni’n Faroa kuang khan, “Ni siahlohai hi kin irchibulhai ata atûn ten hin belra hrunga vâi ngai kin ni,” an tia.

⁴Anni ngêtin, “Hi rama om viat hranga zuang kin ni; kin rama lak kin belrahai fâk hrang a om ta no sikin; Kanaan rama châm tâk lak a na hrai tâk sikin; khasikin lungkham takin ni siahlohai hi Gosen rama nin omtir ro,” an tia.

⁵Khanchu Faroa’n Josefa kha, “Ni pa le ni urênghai hi ni kuang an zuang tung tâka;

⁶Aigupta ram chu a la lian hi te, khasikin ni pa le ni urênghai omna hrang chu hmun hoi le ram a sa ni itihna taka inomtirhai ro; Gosen rama omhai sian. Khan anni laia mi itinrênga ni iiamzoi ni nei le’nvângin chu, ei sahai chunga hruaitu ni hrang khomin siamhai ro,” a tia.

⁷Khanchu Josefa’n a pa Jakoba kha Faroa kuang a tuanga Jakoba’n Faroa kha sat a vura.

⁸Khan Faroa’n Jakoba kuang, “Kum iza mo ni ni ta?” a tia.

⁹Jakoba’n Faroa kuanga khan, “Ki khual inzinna kum chu irzakhat sômthum a nia; ki dam lai kum hi a tômin a intak a ni. A ni neituhai kum leh irkhiin chu, an dam lai kum chimrip khom ni ma,” a tia.

¹⁰Khan Jakoba’n Faroa chu sat a vur nôka, Faroa kuang ata a suaka.

¹¹Khanchu Josefa’n a pa le a urênghai chu omhmun an khuartirhaia, Faroa thupêk angin Aigupta ram laia a satak Ramases ram chu an irchon hrangin a pêkhaia.

¹²Khanchu Josefa’n a pa leh a urênghai chu an fâk an nêk khop hrang dôr pêkin a donsuihai tâka.

¹³Khanchu kha ram sûnga khan a sate’n châmpui a tâka, fâk hrang nêk hrang boiin Aigupta le Kanaan ram chu a hong om tâka;

¹⁴Josefa’n an bu zuarna man sumhai chu Faroa kuang a hrêa,

¹⁵khan Aigupta le Kanaan rama sum a hek ving tena chu, Aigupta mi murdi chu Josefa kuang an honga, “Fâk hrang ni pe ta ro, khano’nchu ni mithmua hin kin ithi zoi hrang tâk kêng? sum lak ite nei ta ma ung,” an tia.

¹⁶Khan Josefa’n, “Nin sahai zuang chôi unglân, kha irthûlin bu nangni pe thei ki ti,” a tia.

¹⁷Khanchu an neinunhai kaiin Josefa kuanga an pêka: khanchu Josefa’n, an kêl, belra, sâ, sakuartunghai man leh khan annihai chu fâk hrang a pêkhaiin kha kum kha chu a infâhai a ni ta.

¹⁸Khan kum a hong tharin chu, an va pan nôka, “Kin sum nei loi lam khom, ka pu kin neinunhai khom nangma ta an chang zoi lam khom nangma mithmua ite thup loiin, ka pu ni mithmua hin kin taksa le kin ram ti no chu ite nei ta ma ung.

¹⁹Khasikin ni kôla hin keini le kin ramhai leh hin kin ithisan hrang ma ni ta? khasikin kin taksa pum hi nir chôkin lân, kin ramhai hi Faroa’n ircho sianlân, ama suak chang ta kin ta, thi loia a hring a dama kin om theina hrangin fachî vai ni sem ro,” an tia.

²⁰Khanchu Josefa’n Faroa hrangin ramhai chu a’rchôka, an châm hrai tâk sikin Aigupta-haiin an ram an izuar zoi a nia. Faroa ta a ichang zoi a ni ta.

²¹Khanchu Josefa’n Aigupta rama suak an ni sikin a itihna tiang anga semin a sin an thoa.

²²Ochaihai ram ti no chu a’rchôk vinga: ochaihaiin chu Faroa kuang ata mantum an nei sikin, an fâkin an la iom thei a ni.

²³Kha zoiin chu Josefa’n a mihai kha, “Irngai roi, a vuan hin ramhai leh nangni kin irchôk zoi a ni ta, hi fachîhai hi irsem unglân irnênga song nôk ta roi.

²⁴Khan bu ât zoro chu Faroa hrangin hmun ringa zêkin hmun khat chu nin ipêk hrang a nia, hmun minli chu nangni hrang ni a ti, khahai kha nin fachî le nin nâi le têhai fâk hrang ni a ti,” a tia.

²⁵Khan anni khan, “Nangin kin hringna ni ni sansuakpui ta. Khasikin ka pu hin lung nin kham sianlân, Faroa suak ni mai kin ti,” an tia.

²⁶Khasikin Josefa’n Faroa hrang hmun ringa zêka hmun khat a iman hrang thu hi, Aigupta rama chu atûn ten hin dânin a isiam a ni: Ochaihai ram ti no chu Faroa ram ving a ni.

²⁷Khan Israelhai chu Aigupta Gosen rama omhmun an khuara; irchongna tam tak neiin an pung tâk a ni.

²⁸Khan Jakoba chu Aigupta rama khan kum sômhleisari a oma: khanchu Jakoba dam sûng kum chu irzakhat sômminli sari a nia.

²⁹Khan Israel thi zoro chu a hong nâi tâka; a nâipa Josefa chu a koia, “Ni mit ki tungin chu lungkham takin ni kut kha ki teêl sunga hong thunin lân, chong inkungna neiin lân, lungkham takin Aigupta rama hin ni phûm no roh.

³⁰Ka pahai irphûmna khin, ki thi tena chu ni hruaiin lân, ni ni iphûm hrang a ni,” a tia.

³¹Khan Jakoba’n, “Keima inhriata hin khomâk irsâm ro,” a tia: khanchu a’rsâma, khanchu Jakoba chu a lu kûnin lômthu a hril ta.