Read Hrangkhol IRPHUTNA 50 Bible Online

IRPHUTNA 50 - Hrangkhol bible

IRPHUTNA 50

¹Khanchu Josefa chu a pa ruak chunga a khupa chapin a tuma.

²Josefa’n a pa ruak thu thei loina hrangin hloi pol hrangin thu a pêkhaia: khanchu hloi sin theihaiin thu thei loina hloi polin an sinsiama.

³Khaanga thu thei loina hrangin sûn sômminli an innanga Aigupta-haiin sûn sômsari sûng chu an châin an chap a ni.

⁴Khan an châ zoiin chu, Josefa’n Faroa in mihai kha a ngêna, “Ni mit ki tungin chu lungkham takin Faroa inhriatin,

⁵Ka pa’n irngai ro, thi hrang ki ni ta; Kanaan rama ki thân choi sai hmun ngêta ni phûm ro, tiin chong a nin kungtira, khasikin lungkham takin ka pa hi ni hon phûmtirin lân, zuan rang nôk lat ki ti, a tih tiin va hril roi,” a tia.

⁶Khanchu Faroa khomin “Chong ni inkung angin fe’n lân hong phûm ro,” a tia.

⁷Khanchu Josefa chu a pa phûm hrangin a’rsiama, Faroa sinthotuhai le Faroa in mi ulianhai le Aigupta rama ulianhai tuangin.

⁸Josefa le a urênghai a pa irkaipui murdihai an fea; an nâi chîntehai, an belra rual, an sehrât pâlhai chu Gosen rama an lei mâkhaia.

⁹Khan an kôla khan chuang theina thil an sakorhai lâkin an fea, mi tamtak an nia.

¹⁰Jordan râla Atad phâizôl an tunga, kha hmun khan Josefa’n sûn sari a pa châna hrangin zoro a hmanga,

¹¹kha hmuna Kanaan mihaiin a pa chûlpuina an nei zoro kha an hmuhaia, “Aigupta-hai mithi chûl dân chu irkhêltak a ni,” an tia: khasikin a hmun irhming khom Abel-mizraim an tia, Jordan dung râla om a ni.

¹²A nâihaiin an pa thupêk ang takin an thoa:

¹³Kanaan rama an irzôn lûta, Abrahama irphûmna hmun irchon hranga, Hit mi Efron ata a irchôk Mamre irdîna Makpela loi sûnga khura an phûm tâk a ni.

¹⁴Khan Josefa chu a pa a phûm zoiin chu a urênghai leh mi danghai an rêngin Aigupta rama an kîr nôk ta.

¹⁵Khan Josefa urênghai chu an pa thi thu an ngaituaa, “Josefa’n atûn chu a chunga thil saloi ei ithohai kha ni thuan tumin, ei chunga thil saloi tho tumin ni en nuam ta no ni,” an irtia.

¹⁶Khanchu kha thu kha Josefa hril hrangin an ngaituaa. “Ni pa’n a thi mân khan

¹⁷hiang hin Josefa kuang ti roi, lungkham takin ni urênghai sin insiatna, le an sat loinahai chu ngaidamhai ro, nin iti hrang a ni, tiin thu a ni pêka: khasikin lungkham takin ni pa Pathian siahlohai thil sual tho chu ngaidamhai ro,” an tia. Khan Josefa makunga an hrilin chu Josefa chu milung nain a chapa.

¹⁸A urênghai khom an rêngin a kôla khan khûksadelin an oma; “Nangma siahlohai kin ni,” an tia.

¹⁹Khanchu Josefa’n an kuanga khan, “Chi no roi, kei hi Pathian irthûla om mo nin ni sôn?

²⁰Nangni’n chu ki chunga thil saloi tho hrangin nin irsiama; khannisianlân Pathian chu a vuan sûn tena mi tamtak hring dama sansuak an ni theina hrangin a irsiam a ni.

²¹Khasikin chi no roi, nangni le nin nâihai murdi nangni infâ mai ki ti,” a tia. Hianga chong lungngam sakin a ompuihaia.

²²Khanchu Josefa chu a pa in mihai leh Aigupta rama an oma: Josefa chu kum irzakhat sômkhat a dama.

²³Josefa’n Efraima nâihai nâi, a tuhai dênin irlo thum a hmua; Manasea nâi Makira nâihai khom a malpuia donin an suaka.

²⁴Khanchu Josefa’n a urênghai kha, “Ki ithi hrang tâk kêng, khannisianlân Pathianin nangni ompui mai a ta, hi ram ata hi Abrahama, Isaka, Jakoba chonginkungna ram a ipêk tâkna hmuna nangni la hruai a ti,” a tia.

²⁵Khanchu Josefa’n Israel nâihai kha chong an kungtirhaia; “Pathianin nangni ompui a ta, ki ruhai vai hi irzôn unglân nin ifepui sa hrang a ni,” a tia.

²⁶Khaangin Josefa chu kum irzakhat sômkhat mi a ni’n a thia: a ruak chu thu thei loiin an sinsiama, irkuanga inzâlin a om tâk a ni.