Read Hrangkhol IRPHUTNA 6 Bible Online

IRPHUTNA 6 - Hrangkhol bible

IRPHUTNA 6

¹Khanchu irnêng chunga mihriam an hong punga, nâilete an hong tamin chu,

²Pathian nâihai khan, mihriam nâihai kha an hmêl a sa ti’n an hmuhaia, khanchu an indit murdihai chu dôngma’n an luahaia.

³Khanchu RENGPA’N “Ki’rthain chu mihriamhai hi kumtuangin chu doihai no ning, anni khom taksa nei an ni sikin, khannisianlân kum irzakhat sômhni chu la dam an ti,” a tia.

⁴Kha zoro khom khan rammuala hin mi lian an oma, kha zoi khomin Pathian nâihai khan mihriam nâihai irpôlpuiin nâi an neipuihai lai khom khan an oma, hihai hi chu tianlaia mi hrât, mi irhming inthanghai kha an ni.

⁵Khan RENGPA’N irnênga a mihriam siamhai sual dân chu a’rkhêl hrai a nih ti le, an lungrîl ngaituana murdi hi sual ringot a nih ti a’rhriat suaka.

⁶Kha tena chu irnênga om hrang mihriam a lei isiam tâk hi a sate’n a’rsîra, lungrîl natna’n a neipui tâka.

⁷Khanchu RENGPA’N, “Ki mihriam siam, hi irnênga omhai hi inboi ving inlân, mihriamhai, sahai, thilhring hai, chunglêng vahai leh hin; ki siam tâk sikin a sân ki’rsîr,” a tia.

⁸Nikhomsianlân, Nova kha chu RENGPA mit a tung maia.

⁹Hiang hin Nova thurchi chu a ni. Nova chu mi feltak a nia, kha laia mihriam sûnga chu Nova chu Pathian le hmunkhata lêngsuam ngai a ni.

¹⁰Khan Nova chu nâipasal inthum a neia, Sema, Hama le Jafeta hai an ni.

¹¹Khan, irnêng chung hi Pathian mithmuin a porinche zoi tâka, hnarsana’n a sip tâk sikin.

¹²Khanchu Pathianin irnêng chung hi a ena, irngai roi a isiat zoi tâk kêng, taksa om murdihai hin an omdân a isiat zoi tâk a ni hi teh a tia.

¹³Khanchu Pathianin Nova kuang khan, “Taksa murdi hek hrang nikhua chu ki kuang a om ta, annihai sikin irnêng chung hi hnarsana’n a sipa, khasikin irnêng chung hi ki insiatpai hrang tâk kêng, a tia.

¹⁴Ni ta hrangin meisâr thingin irkuang siam ro; irkuanga khan banglâi siamin lân; a sûng tiang le a pên tiang meisâr hnâi ni ipol hrang a ni.

¹⁵Hiang hin ni isiam hrang a ni, irkuang a dung mûk irzathuma sei ni sianlân, a khang lian chu mûk sômringa ni ri se, a’rsâng lam chu mûk sômthum ni ri se.

¹⁶Irkuanga khan tukver khom ni isiam hrang a ni. A chung tiang mûk khat kâra a dâp ni itho hrang a ni. Irkuang inkhat chu a sîr tiang ni inhong hrang a ni. Irkuang chu irchuan inthumin ni isiam hrang a ni.

¹⁷Khanchu irngai ro, keima’n taksa nei murdi hringna pai hrangin irnêng chung hi tui ki indîl zit hrang a ni. Irnênga hringna nei murdi that vingna hrangin,

¹⁸khannisianlân ki thuthung chu nangma hrangin indet ual ki ta, irkuanga ni ilût hrang a ni, nangma lût ni ta; ni nâihai le ni dôngma le ni moinuhai ni kuang an ilût sa hrang a ni.

¹⁹Khan taksa nei murdi, le thilhring laia mi chi tin bop khatin ni kuang an hring theina hrangin irkuanga ni ihruai inlûthai hrang a ni; nupang le pasal an ini hrang a ni.

²⁰Vâhai khom chi tin an irkip hrang a ni. Sa khom chi tin an omdân angin an irkip sa zit hrang a ni. Thilhring murdi a bop irkipin an pung thei nôkna hrang le an hring theina hrangin ni kuang an ihong hrang a ni.

²¹Khan bu nin inêk le fâk thei zât lâk khômin buk zit ro; nang le annihai fâk hrangin,” a tia.

²²Khaang khan Nova’n a thoa, Pathianin a kuanga thu a ipêk murdi zômin a itho tâk a ni.