Read Hrangkhol IRPHUTNA 7 Bible Online

IRPHUTNA 7 - Hrangkhol bible

IRPHUTNA 7

¹Khan RENGPA’N Nova kuang khan, “Nang le ni in mi murdi chu irkuanga khan lût roi, nang vai kêng atûn lai thoithar laia chu ki mithmua mi fela nang ki ihmu a ini.

²Sa irthiang murdi laia mi, a chal le pui bop sariin,

³sa irthiang loi laia mi a chal le pui bop khatin, chunglêng vâhai laia mi khom a pui le chal bop sariin, irnêng chunga irchi nei hrangin ni ihruai inhringhai hrang a ni.

⁴Sûn sari a la’rsam, hi zoi hin chu irnêng chunga hin sûn sômminli zân sômminli rua inthotir ki ta; ki thilhring siam murdi irnêng chunga an hek theina hrangin,” a tia.

⁵Khanchu Nova khan RENGPA’N a iti pe ang takin a tho tâka.

⁶Hi tui a lêt lai hin Nova chu kum 600 mi a ni.

⁷Khan tui a lêt hrang sikin Nova chu irkuanga a lûta, a dôngma, a nâihai le a moihai an rêngin an lûta.

⁸Pathianin a kuanga thu a ipêk angin sa irthiang laia mi le, sa irthiang loi laia mi khom chunglêng vâhai khom irnênga bokvâka om murdi le,

⁹Nova kuanga irkuanga khan an lût ving tâka.

¹⁰Khan sûn sari zoia chu irnênga hin tui a hong lêt tâka.

¹¹Nova chu kum 600 a ni kum, tha hni le sûn sôm hleisari nî chu, tuipui inthûk tak sipin a sinthônaa omin, irvân tukver a’rhong pe tâka.

¹²Khan sûn sômminli zân sômminli sûng chu ropuivânsâng a tho tâka.

¹³Hi laia hin Nova nâihai Sema, Hama le Jafeta, Nova dôngma irkuanga an lûta, an moinuhai inthum an lût saa.

¹⁴Annihai le sa tinrêng le ramsa murdi an lût vinga, thilhring le chunglêng vâ mitha neia vuang murdihai an lûta.

¹⁵Khanchu taksa nei murdi a chal a pui an rêngin Nova irkuang sûnga an lûta.

¹⁶Khanchu a lûthai chu Pathianin thu a ipêk angin an lût zoiin chu irkuang a khâra.

¹⁷Khan, tui kha irnêng chunga hin sûn sômminli a lêt tâka, tui chu a sip zut tâka, irkuang chu a’rhlân maia.

¹⁸Sûn tin tui a lian intam maia, irkuang inhlânin a om maia,

¹⁹tui chu a sate’n a bit zoi tâka khomual irsâng ite inlang thei ta maka.

²⁰Tâng irsânghai chunga mûk sôm hleiringaa irsângin a om tâka,

²¹khanchu taksa neihai, ram sahai, vâhai, sahai, thilhring irnênga bokvâka irlôihai le mihriam om murdi an thi zoi ving tâk a ni.

²²An hnâra hringna phûksân lâk murdi an thi zoi tâk a ni.

²³Pathianin a thilsiam hai, mihriam, ramsa, sahai, vahai le irnênga bokvâk murdihai an thi zoia. Nova le irkuanga lût ti no chu zôkin hmu hrang om ta mahaia.

²⁴Khan tui chu sûn sôm irzakhat sûn sômringa chu irkai loiin a lêt tâka.