Read Hrangkhol IRPHUTNA 8 Bible Online

IRPHUTNA 8 - Hrangkhol bible

IRPHUTNA 8

¹Khanchu Pathianin Nova le irkuanga thilhringhai ramsa le sahai, bokvâka irvâk murdihai kha irnghilhai maka, Pathianin irnêng chunga phâivua an zâptira, tui lianpa kha a’rkai thiai tâka,

²tui inthûk tak hnârhai le vân tukver khom a’rkhâra om kha, rotho irvân ata a chan tâk sikin, tuilian khom a’rkaia.

³Khanchu sûn sôm irzakhat le sûn sôm ringa a kâi zoiin chu tui a tôm ok tâka,

⁴khanchu irkuang kha a tha sarina sûn sôm hleisari nî tena chu, Ararat tânga irkuang a’rngam thei tâk a ni.

⁵Khan tui chu a tha sômna tena chu a hong tôm tâk sikin, a tha sômna sûn khat nî tena chu tâng sîp irzumhai an lang thei ta.

⁶Khan sûn sômminli a hek tena chu hiang hi a hong nia, Nova’n irkuang inkhâr a isiam kha an honga,

⁷vaâk inkhat an suaktira, irnênga tui a kang zoi mâka chu a vuang irvêl maia,

⁸khan tui a tôm le tômloi inhriatna hrangin vasu an suaktir nôka,

⁹khannisianlân vasute khan chuangna hrang ite a la hmu no sikin, irkuang tiang ngêt a hong kîr nôka, tui a la om pe sikin. Khanchu Nova’n a kut leh a hon pûra a chela irkuang sûnga a hruai lût nôka.

¹⁰Khan sûn sari dang a nghâk nôka, vasu kha irkuang ata an vuangtir nôka,

¹¹vasu chu a vuangin khohloi tiang chu a hong kîr nôka; khan irngai ro, a hmûra khan Oliv hna tharte a hong sê khap pea, khanchu Nova’n tui a tôm tah ti an hriat thei ta.

¹²Khan sûn sari dang a nghâk zoiin chu vasu an vuangtir nôka, a kuang hong kîr nôk pe ta maka.

¹³Khan Nova kha kum 601 a ni kum, tha khat sûn khat nî tena chu irnênga tui a kang tâk sikin, Nova’n irkuang irkhûna puan a paia, a thîr vêla tui chu kangin rammual a’rlang ving ta.

¹⁴Khan tha hnina le sûn sôminhni sûn sari ni tena chu ite tui hmu hrang om viat ta maka.

¹⁵Khanchu Pathianin Nova kha,

¹⁶“Irkuang ata suak ta ro, nang le ni dôngma, ni nâihai le an dôngmahai khom hmunkhatin suak roi.

¹⁷Taksa nei murdi le thilhring ni iompuihai khom, sahai, ramsahai irnênga bokvâka fehai le vâhai khom hmunkhatin hruai suakhai vingin lân, irnênga hin nâilete nei intamin, irchi tamtak neia an hong pung theina hrangin,” tiin a hrila.

¹⁸Khanchu Nova kha a dôngma le a nâihai le a moinuhai an rêngin an suaka,

¹⁹sa tinrêng le thilhring murdi vahai irkuang ata an mâni irchi om dân ang takin an suak ta.

²⁰Khan Nova’n RENGPA ta hrangin irbôlna maichâm a siama; khan sa irthiang murdi le vâ irthiang murdi laia mi a lâka; maichâma khan hâlirvôm irbôlna thil an hlana.

²¹Khan RENGPA’N, kha rimhoi kha an hriata, RENGPA’N a lungrîlin, “Irnêng chung hi chu mihriam sikin khuasâl ta no ninga, mihriam lungrîl ngaituana hi an chînte ata an sual sikin, atûna ki isoisak ang hin chu thilhring murdihai khom hi soisakhai ta no ning.

²²Irnêng om sûng chu bu’nrît le bu âtin, kholum le khodâi, phalbi le kholum, sûn le zânhai, khom boi no ni,” a tia.