Read Hrangkhol 2 SAMUELA 1 Bible Online

2 SAMUELA 1 - Hrangkhol bible

2 SAMUELA 1

¹Khan, Saula thi zoi hnungin Davida kha Amalek-hai a rûn zoiin a hong kîr nôka, Ziklag khuaa khan sûn hni a om tâka.

²Sûn thum nî khan chu ruatharte inkhat Saula riakbuk ata irthokin a zuang tunga. A beidong inlangtirna hrangin a puanhai an pot thêra, a lua pil ar thua. Ama kha Davida kuang a fea, irnênga inbokin chubai a mûka.

³Davida’n a kuang, “Kho tianga irthoka zuang mo ni ini?,” a tia. Ama khan, “Israelhai omhmun ata zuang ki ni,” a tia.

⁴Davida khan a kuang, “Itin mo thil a iom nin hril ro,” a tia. Ama khan a sâma, “Irdoina hmun ata ei sipaihai kha laizâm an thoa, ei mihai tamtak an thata, Saula le a nâipa Jonathana khom an thi sa tâk,” a tia.

⁵Davida khan a hriltu ruathartepa kuang, “Itin mo Saula le a nâipa Jonathana an thi ti ni inhriat thei?,” a tia.

⁶Ruatharte khan, “Gilbo tânga khan ki lei va om ropa, Saula kha ufei irhnêla ngîrin ki hmua, râlhai tâlihai le sakor chung chuang mihai lakin an hong nâi tâk sikin.

⁷Khanchu a hnung tiang ar heiin ki hmua, a ni koia ‘Imo ki itho thei hrang,’ ki tia.

⁸Khanchu ki kuang, tu mo ni ini? a ni tia. Keima’n, ‘Amalek mi ki ni,’ ki tia.

⁹Kha hnung chu ama’n ki kuang, ‘Hin hongin lân, ni that ro, ki sâbe tuang a na hrai ta, ki ithi ngêt hrang a ni ta,’ a tia.

¹⁰Khanchu a kôla ki fea, an rîlin chu a ithi ngêt hrang a nih ti kin hriat sikin, ki ithat tâk a ni. Kha hnung chu a lu rênglukhum le a bâna bâla kha ki lâka, ka pu, hin ni kuang ki zuang ichôi a ni,” a tia.

¹¹Kha hnung chu Davida hin beidongin a sil le kaihai an potthêr a ni; khaang khan a kôla om murdihaiin an thoa.

¹²Khanchu Saula le a nâipa Jonathana le RENGPA mihai kha khandaia that an ni tâk sikin, Israel mihaiin an sûna, an châ tâka. Khohloi dênin bu an ngheia.

¹³Davida khan thurchi zuang hriltu ruatharte kuang khan, “Kho tianga mi mo ni ini?” a tia. Ama khan, “Amalek mi ki nia, khannisian nin rama om ki ni,” a tia.

¹⁴Davida khan a kuang, “RENGPA sahriak irthûtir irhmangtir hrang chunga kut ni thâka, itina chi loi ngân mo ni ini?,” a tia.

¹⁵Khanchu Davida khan a mi inkhat a koia, “Fe’n lân va that ro,” a tia. Amalek mi kha a va tuk that paia.

¹⁶Davida khan Amalek mi kuang khan, “Ni thisen chu nangma lu chunga om ri se. Ni bâi ngeiin RENGPA sahriak irthutir kha ki ithat tiin nin puang tâk sikin,” a tia.

¹⁷Davida khan Saula le a nâipa Jonathana kha hiang hin a châhaia.

¹⁸(Hi hla hi Juda irchihai irchuhai hrangin thu a pêka; khanchu hi hla hi Jasara lekhabua chuang a ni.)

¹⁹“Israel tânghaia khan ei hruaituhai an thi ta na! Ei sipai hrâthai an inrîl zoi ta!

²⁰Gath khuaa khan insîr no unglân, Askelon kotsuahai khan inpuang no roi; khano’nchu Filistia nâinuhai lôm an ta, sertan loi nâinuhai raifânin pâi an ti.

²¹Gilbo tânghai khan irdo le rua tho no sian, Loia khom ite vâng no ri se! kha hmuna mi lian pho kha mualphoi takin paiin a oma, Saula pho ngei kha sahriak pol ta loiin a iom a ni.

²²An ithathai thisena irthok le, mi lian thala irthokin Jonathana thal kha kîr ngai maka, Saula khandai kha chanlamboiin kîr ngai ma.

²³Saula le Jonathana chu inditomin an sa vang na! An hring khomin, an thi khomin, irsen ngai mahai. Irmupuihai nêkin an hrât uala, kâmkeibakneihai nêkin an ihrât ual a ni.

²⁴Nangni Israel nâinuhaio, Saula kha châ roi, puan sen satakhai leh nangni a’rvotira, rângachak le lunghluhaia nangni irvotu kha.

²⁵Sipai hrâthai an inrîla, irdoina khan an thi tâk e; Jonathana chu tâng chunga khan a thi ta.

²⁶Ki’rzirpuipa Jonathana, ni chungthua hin ki bei a idong a ni; ki ta hrangin ni hlu vang na! Lung ni ni thung dân hi ar khêla, nupanghai lungthungna a ikhêl a ni.

²⁷Sipai hrâthai an inrîla, An hriamhreihai khom ar hmang zoi tâk e,” tiin.