Read Hrangkhol 2 SAMUELA 13 Bible Online

2 SAMUELA 13 - Hrangkhol bible

2 SAMUELA 13

¹Davida nâipa Absaloma khan farnu hmêl satak hi a neia, ar hming chu Tamari a ni. Davida nâipa ngêt Amnona’n an dita.

²Khanchu Amnona khan a farnu Tamari sika khan a buai ok tâka, dam loiin a oma; ama lak kha dôngmate irthiang a nia; a chunga i mani thil hong tho kha Amnona ta hrangin thil saloi tak a nia.

³Khannisianlân Amnona khan rual a neia, ar hming kha Jonadaba a nia, Davida upa Simeia nâipa a ni. Jonadaba kha vârirlet tak a nia.

⁴Jonadaba khan Amnona kuang, “Reng nâipa ni nia, khannisian itho mo a sûn tin ni ingûi mai ngai hi? I sika mo a ini?,” a tia. Amnona khan, “Ki irzirpuipa Absaloma farnu hi ki indit tak tak a ni,” a tia.

⁵Jonadaba khan, “Ni zâlhmuna zâl chianin lân, dam loi orhto tho’n lân, ni pa’n nang a hong en tika, ‘Irngaihoi takin ki farnu Tamari kha ki kuang hong sianlân, bai ni hon fatir ri se. Hin ki mithmu theina hin fâk hrang ni sinsiam pe sianlân nin fatir ri se,’ khanchu ama kut ngêtin khalâi nir fûktir pe ri seh lei ti roh,” a tia.

⁶Khanchu Amnona kha a zâla, dam loi orhto a tho tâka. Reng Davida khan a va enin chu Amnona’n a kuang, “Irngaihoi takin ki farnu Tamari hong sianlân, ki mithmu ngêta hin bai tiam inhni ni sin pe sianlân, ama kut ata lei fa ki ti,” a tia.

⁷Khanchu Davida khan Tamari kuang, “Ni nuchapa in tiang fe’n lân, fâk hrang va sinsiam pe ro duah,” ti hrangin mi a tîra.

⁸Tamari khan a nuchapa Amnona in tiang khan a fea, ama kha a lei zâl chiana. Khante, bai hlûm kha a lâka, an hmeta, a mithmua bai tiam kha a siam pea, an zêia.

⁹An zêina ata kha a fâk hrangin a makunga a sia pea, khannisian fa nuam maka. Amnona khan, “Mi murdi suak ving ri sehai,” a tia. Khanchu an suak pe vinga.

¹⁰Amnona khan Tamari kha, “Ni kuta ki fâk theina hrangin fâk hrang kha hong chôiin lân ki tentana hin hong lût ro,” a tia. Tamari khan a bai tiam kha a chôia, a nuchapa Amnona kuang a tentan sûnga khan a lûta.

¹¹Infatir hrangin a kôlhrêta a va fea ni’n chu a chelthunga a kuang, “Hongin lân hmunkhatin zâl ei ti,” a tia.

¹²Ama khan, “Ni ngai ma, ki nuchapa, hi thil mualinphoi tak hi ni thopui no roh. Israelhai laia hianga thil hi tho hrang ni mah; hi thilsual porche hi tho no roh.

¹³Ki ta hrangin mualinphoina ni a ta, khôn mo ki mit ki imeng ngam hrang? Nang khom Israelhai laia hin mi invêt kêng nang an iti hrang a ni. Khasikin rêng chongpuiin lân, ni ni ilua nuama ni’n chu sêl ual no ni,” a tia.

¹⁴Khannisianlân a chong kha irngai maka; ama nêkin hrât lak a hrât ual sikin, nakhrâtin a namphaa, a zâlpui tâka.

¹⁵Kha hnung chu Amnona khan a hmumâk nôk tâka, a ihmumâkna kha an dit laia nêkin a ien nuam loi a ni ta. Khanchu Amnona khan a kuang, “Thoiin lân, rot ta ro,” a tia.

¹⁶Tamari khan a kuang, “Hiang hin chu a ini hrang ni ma, hianga dik loi taka ni ni irzûlpai hi chu ki chunga ni thil tho tâk leh khan a isa nôk ual loi a ni,” a tia. Khannisianlân Amnona khan a chong kha irngai pe ual maka.

¹⁷A sinthotu a zui kha a koia, “Hi nupang hi ki kuang ata kêlsuapaiin lân, inkhâr kal pe khap ro,” a tia.

¹⁸Khanchu a zuitu khan pên tiang a kêlsuaa, inkhâr a kal pe khak tâka. Khanchu, Tamari khan songkol irfual ze da danga irziak, rêng dôngmate irthianghai innghâk ngai kha an nghâka.

¹⁹Tamari khan a lua irvut ar thua, a songkol irfual kha an potthêra, a kut leh a hmâi a hîpa, inring taka chapin a fe tâka.

²⁰A nuchapa Absaloma khan a lei hmu’n chu a kuang, “Amona kha ni kuang a hong ilût a ni na? Khannisianlân ki farnu ni irngaiinsiat hrai no ro. Ama khom ni nuchapa a nia, khasikin hi thu hi tûte hril no ro,” a tia. Khanchu Tamari kha a chapa a nuchapa Absaloma ina beidong takin ar khum zêt tâka.

²¹Reng Davida khan kha thilhai kha an hriatin chu, a ning an mur pe oka.

²²Absaloma khan a farnu Tamari nakhrâtsonga a zâlpui pe sikin Amnona kha a hmumâk khak tâka, chong lua chongpui viat ta maka.

²³Kum hni a hek zoiin chu, Efraima kho kôla Baal Hazora-a Absaloma’n a kêlbelra mul a epa; ama’n rêng nâipasalhai kha a koihaia.

²⁴Absaloma kha rêng kuang a fea, “RENGPA ki kêlbelra mul ki epa, nangma leh ni mi lianhai kha zuangin, hruaithena zuang chang thei ung mo?,” a tia.

²⁵Rengin Absaloma kuang, “Ni ma, ki nâipa, kin rêngin kin zuangin chu, ni ta hrangin rik hrai a ti,” a tia. Absaloma khan a ngên ngut nguta, khannisian rêng kha fe nuam ual maka, sat a vura.

²⁶Khanchu Absaloma’n, “khano’nchu, ki irzirpuipa Amnona chu kin kuang zuang ri se,” a tia. Reng khan a kuang, “Itho mo ama kha a izuang bîk hrang?” a tia.

²⁷Khannisian Absaloma khan a ngên hrai tâk sikin, Davida khan Amnona le rêng nâipasalhai kha fe hrangin a tihaia. Absaloma’n hruai roiinpui tak an thea.

²⁸Absaloma’n a zuituhai kha chong a bêhaia, “Amnona’n uain a ina an rui kha lei en chak unglân, that hrangin thu nangni ki pêkin chu, that roi, chi no roi. A mophurna chu keima’n pêl ki ti. Hâitakin om unglân, lungôkinchain om no roi duah,” a tia.

²⁹Khanchu a zuituhai khan Absaloma he bê lam angin an thoa, Amnona kha an that tâka. Davida nâipasalhai murdi kha an thoia, an sakuartung chunga an chuanga laizâm an tho tâka.

³⁰Lam laia an la om laiin, Absaloma’n, “Rêng nâipasalhai murdi kha a thathai vinga, inkhat lua hôi ta maka,” ti’n Davida kuang thu a hong tung tâka.

³¹Khanchu rêng kha a thoia, a silkaihai kha an potthêra irnênga a zâl rak tâka. A zuitu a kôla om murdihai khom khan an sil le kaihai an inpotthêr sa tâka.

³²Khannisianlân Davida upa Simeia nâipa Jonadaba khan, “Ka pu rêng nâipa ruatharte murdihai kha thathai zoi mah. Amnona vai kêng a thi. A farnu Tamari kha Amnona’n nakhrâtin a zâlpui pea irthoka khan Absaloma’n hianga tho hi a lei itum mai tâk a ni.

³³Khasikin ka pu, rêngpa hin a nâipasalhai murdi kha an ithi ving tâk a nih ti iamin lungkâng tuang ta no ri se; Amnona vai kêng a thi chu a ini,” a tia.

³⁴Absaloma kha chu laizâm a tho tâka, râl hrungtu ruatharte khan a mit an lêngtira Hononaim-a irthokin tâng lampui tiang khan mi tamtak hong a hmuhaia. Ama kha rêng kuang a fea, a thil hmu kha a va hrila.

³⁵Jonadaba khan rêng kuang, “Khahai kha rêng nâipasalhai hong thak a ni, ki iti ang lam tak kha a ini a ni,” a tia.

³⁶A hril zoiin chu rêng nâihai kha an hong tung zela, an chap tâka. Davida le a mi lianhai khom kha an rêngin an chapa.

³⁷Absaloma kha chu laizâm a thoa, Gesur rêng Amihuda nâipa Talmaia kuang a fea, kha khan kum thum a va oma. Davida khan zoro sôttak a nâipa Amon kha a chûlpuia,

³⁹khannisianlân Amnona thina chungchâng thua khan ar tha a hor ngam tena chu a nâipa Absaloma kha ar ngaia a bei a dong pe tak taka.