Read Hrangkhol 2 SAMUELA 17 Bible Online

2 SAMUELA 17 - Hrangkhol bible

2 SAMUELA 17

¹Zoro sôtloite hnunga chu, Ahithofela khan Absaloma kuang, “Mi sînghni inthang suak ki ta, a vuan zân Davida irzûl hrangin irthok suak ki ti.

²A irzal le a beidong zoro lai tak son va doi ki ta, irlonthingin chi a ta, khanchu a kôla om murdihai kha laizâm tho an ta, khanchu rêng kha va thatpai ki ti.

³Khanchu mipuihai kha ni kôla, moi a pasal kuanga hong angin hong hruaihai ki ti. Mi inkhat vai that ni inuam a ni; mi danghai chu zôkin om an ti,” a tia.

⁴Khanchu kha thu khan Absaloma le Israel hruaituhai murdi kha an lômtirhai tâka.

⁵Absaloma khan, “Ark mi Husaia kha koi phot unglân ama’n te imo a hril, la’rngai bak rei,” a tia.

⁶Husaia a hong tungin chu, Absaloma khan, “Ahithofela khan hiang hin a tia, a iti lam ang hi ei itho hrang mo? Aninole nangma te imo nir ngaidân?,” a tia.

⁷Husaia khan Absaloma kuang, “Atûn laia Ahithofela roizêk hi a isa loi a ni.

⁸Ni pa le a mihai kha nin hriata, sipai hâitak inthang, milung ngar tak, rama savom a tê lâkpai thei ang dôra hâi a nia. Ni pa kha irdoi mi a nia, mipui laia a riak ti khom inhre mak mea.

⁹Atûn khom hin kho tianga rôla mani, ar bîk chian khom a ni thei, Davida’n a zuang doia mi senkhat an inrîla, an hriat murdi’n Absaloma zuituhai an that inhnêhaia, an iti hrang a ni.

¹⁰Khanchu sipai hâitak, kâmkeibaknei ang dôra hâi khom an lei indôptir hrang a ni, Israel mi murdi lak khan, ni pa kha sipai hâi tak a ni le a kuanga omhai kha mi hâi inzen an nih ti an inhriat vinga.

¹¹Keima roizêk dânin chu, Israel mihai, Dan le Beerseba kâra om murdihai kha tuikhangliana chiai zât ni kuang koibûmhaiin lân, irdoinaa khan nangma ngêtin hruaihai ro.

¹²Khanchu Davida kha kho hmuna khom ei irtokpuina taka, irnênga irdo tâk ang dôrin doi ei ta; ama le a kuanga om murdihai kha inkhat lua hôihai no ih.

¹³Kho sûnga a lûtin chu ei mihaiin hrui chôiin kha khua khan va fe an ta, lungtehai lua om thei loi rakin ivadunga inthapai ei ti,” a tia.

¹⁴Khanchu Absaloma le Israelhai khan, “Ark mi Husaia roizêk kha Ahithofela roizêk nêkin a sa ual,” an ti tâka. Absaloma chunga thil saloi a tung theina hrangin RENGPA khan Ahithofela roizêk satak kha zôm loi hrangin a lei inkung sai tâk a ni.

¹⁵Kha hnung chu Husaia khan ochai Zadoka le Abiathara kuang khan, Ahithofela’n Absaloma le Israel hruaituhai roi a zêkpui dân hai, ama khomin roi a zêkpuihai dân kha a hrila.

¹⁶Khanchu Husaia khan, “Atûn hin irhnot roi! a vuan zân chu ramchâra Jordan vadung kâinahai khan riak ta loiin irkânpai ngêt ta roi; khano’nchu rêng le a kuanga omhai kha an irhmang ving hrang a ni, iti Davida van hril zôi zel roi,” a tia.

¹⁷Abiathara nâipa Jonathana le Zadoka nâipa Ahimaaza kha Enrogel-a an oma, khopui an lût mi’n an hmuhai loina hrangin Jerusalem kho kôla khan an iom a ni. Suaknu inkhat hin thil omdânhai a va hrilhai mai ngaia, anni khan rêng Davida kha an va ihril nôk ngai a ni.

¹⁸Khannisian sûn khat chu irbi hrangin Bahurim-a mi inkhat ina irhnot takin an fea. Ama khan a kholaia tuisunsuak a neia, kha khan an lûta.

¹⁹Kha pa dôngma khan tuisunsuak kha a sîngna leh a sînga, tûte inhre thei loina hrangin a chunga khan bu a phoia.

²⁰Absaloma mihai kha, kha ina khan an honga, nupangnu kuang khan, “Ahimaaza le Jonathana-hai kha khô tiang mo an om?” an tia. Khante nupangnu khan, “Vadung chu irkân ta an ti,” a lei tia. An va zonga, khannisianlân hmu mahaia, khanchu Jerusalema an kîr nôk tâka.

²¹An fe zoi hnung chu Ahimaaza le Jonathana kha tuisunsuak ata kha an hong suaka, rêng Davida kha an va hrila. Ahithofela’n a thuphan dânhai kha an hrila, a kuang, “Irhnot unglân, vadung kha irkân zel roi,” an tia.

²²Khanchu Davida le a mihai khan Jordan dung an irkân zel tâka, khua a hong vârin chu an rêngin an irkân ving tâka.

²³Ahithofela’n a roizêk kha zôm mah ti an inhriatin chu, a sakuartung an irfûka an suaka, an khuaa a fe tâka. A in sûngkuahai roizêk dân hrang a’rfûk pehai diama, a’rkhâithat tâka. Khanchu an in mihai thâna an phûm tâka.

²⁴Absaloma le a kuanga Israel mi murdihai khan Jordan dung an irkân laia khan, Davida chu Mahanaim khua a lei tung tâka.

²⁵Absaloma khan Joaba irthûlin Amasa kha sipai hruaituin a phuna. Amasa kha Ismaela mi Jethera nâipa a nia; Amasa nu chu Nahasa nâinu Abigaili Joaba nu, Zeruii irzirpuinu a ni.

²⁶Absaloma le a mihai khan Gilead rama omhmun an va khôra.

²⁷Davida’n Mahanaim khua a va tungin chu Amona irchi Raba khuaa mi Nahasa nâipa Sobia hai, Lo-debar khuaa mi Amiela nâipa Makira hai, Rogelim khuaa Gilead mi Barzilaia hai khan an lei hong dona.

²⁸Davida le a mihai kha ramchâra khan phîngchâmin, tuiinhrâlin, an sôl tak tak ti an inhriata. Anni khan puantha hai, irhuina hai, pilbêl hai, an hong chôi pehaia, khakhêla bu hai, barli hai, baidi hai, bu’nzêi hai, bera hai, chana hai, khuaitui hai dût hai, dût kang hai, le bera hai, Davida le a kuanga mi omhai fâk hrang an hong chôi pehai saa.