Read Hrangkhol 2 SAMUELA 18 Bible Online

2 SAMUELA 18 - Hrangkhol bible

2 SAMUELA 18

¹Davida khan a kôla mi om murdihai chu a bûmhai vinga, sângkhat pâl, irzakhat pâlin a zêkhaia, an chunga hruaitu a siahaia.

²Khanchu Davida khan a mihai pâl thumin a tîrhaia, pâl khat kha Joaba’n a hruaihaia, pâl khat kha Joaba sangpa Abisaia’n a hruaihaia, pâl khat kha Git mi Itaia’n a hruaihaia. Rengin a mihai kuang khan, “Keima khom nin laia fe sa zêl ki ti,” a tia.

³Khannisianlân mipuihai khan, “Nang chu keini laia hong sa no chi ni. Keinihai hi chu laizâm tho chuk duai ta sianlân, râlhaiin ite bêin ni bê no nihai, a chimrip va thi khomin lân; ite bê’n bê viat no ni; khannisian nangma chu keini sîngkhat nêkin ni ihlu ual a ni. Khasikin khopuia ni om chiana, ni san hrang mi ni hong itîr kha a isa ual a ni,” an tia.

⁴Reng khan an kuang, “A sa nin ti lam takin tho ki ti,” a tia. Kha hnung chu rêng kha kul kotbâia khan a ngîra, a mihai kha irzakhat le a sâng têlin an suak sup supa.

⁵Reng khan Joaba le Abisaia le Itaia kha, “Keima sikin ruatharte Absaloma kha va’nnatir no roi duah,” a tia. Sipaihai khan, Absaloma chungchâng thua rêngin sipai hruaituhai laia a iti kha an inhriata.

⁶Davida sipaihai kha ramkâr tiang an fea, Israel mihai kha Efraima ramkâra khan an doi tâka.

⁷Davida mihai khan Israel mihai kha an inhnêhai tâka, kha ni khan mi sînghni an ithathai an ni.

⁸An irdoina hmun ram pumpui a huap zita; kha ni khan khandaia thi nêkin rampuia thi an itam ual a ni.

⁹Absaloma khan Davida mihai kha a va tonghai thuta; Absaloma kha sakuartung chunga a chuanga, sakuartung kha seso thing hnuaia an tân lûta, Absaloma lu kha seso thing ôn khan a toka, sakuartung kha an tân pata, Absaloma chu thing ôna khan a’rtûl raka.

¹⁰Davida mi inkhat hin a hmua, Joaba a hrila, “Ka pu seso thinga Absaloma irkhâi chian ki hmu,” a tia.

¹¹Joaba khan an sîr pepu kuang khan, “Ni hmu’n te, itho mo ni ithat loi? khaang khan tho’n lân chu tangka sôm le kongkhit nang ki ipêk hrang,” a tia.

¹²Khannisianlân kha mi khan Joaba kuang, “Tangka sângkhat khom nin pe’n lân, rêng nâipa chunga ki kut zel tha no ning. Ki mithmua rêngin nangma le Abisaia le Itaia kuang, ‘Keima sikin ruatharte Absaloma kha chu innatir no roi,’ iti thu nangni a ipêk a ni.

¹³Reng thu zôm loiin lei thatpai ta khomin lân, rêngin len hria a ta, (rêng kuang khan ite thup lak ni no ni.) Nangma lak chu zôk phar rêk ni ta,” a tia.

¹⁴Joaba khan, “Hiang hin nangma kuang zoro inhek thei no ning,” a tia. Khanchu ufei inthum a chôia, seso thing ôna irtûl chian a lei hring mai Absaloma kângirbua khan a suna.

¹⁵Kha hnung chu Joaba râltukfam chôitu sipai sômkhathai khan an hong pana, Absaloma kha an suna, an thatpai tâka.

¹⁶Joaba khan irsual irngamtirna hrangin bekul a tuma, Israel mihai irzûltu sipaihai kha an hong kîr nôk ta.

¹⁷Absaloma ruak kha an lâka, rampui hnuaia rôl inthûk taka khan an pai tâka, a chunga lung leh an irkhûa, Israelhai kha mâni in senga an pan ta.

¹⁸Absaloma khan a dam laiin rêng phâia khan ama inhriat maina hrangin lung a lei buk irchuan thâma, “Ki’rhming a dâi nona hrangin nâipasal lak nei ma unga,” a tia. Kha lung irchuan irhming hranga khan irputin atûn ten hin “Absaloma inhriat maina,” iti a ni ta.

¹⁹Khanchu Zadoka nâipa Ahimaaza khan, “Va intân ki ta, RENGPA’N a râl phuba a ilâk pe dân kha rêng hi la va hril hi rong dua,” a tia.

²⁰Joaba khan a kuang, “A vuan chu ite thurchi la va hril no ro, sûn danga la va hril ro, rêng nâipa kha a ithi sai tâk a nia, a vuan chu ite va hril no ro,” a tia.

²¹Kha hnung chu Joaba khan Kus mihai kuang khan, “Fe’n lân ni thil hmu kha rêng va hril ro,” a tia. Kus mi khan Joaba kha kûnin chubai a mûka an tân tâka.

²²Ahimaaza khan Joaba kuang, “I khom ni sianlân, irngaihoi takin thurchi kha la van hrilhai sa rong,” a tia. Joaba khan, “Ki nâipa, thurchi hril man ite hmu ual no chi ni, i lo hrang mo van tân hranga?,” a tia.

²³Khannisian Ahimaaza khan, “I khom ni sianlân, ki ife nuam a ni,” a ti nôka. Khanchu Joaba khan, “Khano’nte fe ta ro,” a tia. Khanchu Ahimaaza kha phâizôl tiang lampuia an tâna, Kus mi kha a khêlpaia.

²⁴Davida kha kul kotbâi pên tiang le sûng tiang laitaka khan a lei toia. Râl hrungtu khan kul kotbâi sûng tiang ual chung tiang khan a hong luia, a hong ngîra, ar hei vêlin chu mi inkhat a bing vaia hon tân hi a hmua.

²⁵Râl hrungtu kha a khêka, rêng kha an hrila. Rêng khan, “Mi inkhat vai a ni’n chu thurchi ni hon hril hrang ni ngêt a ti,” a tia. A hon tântu kha a hong nâi tîr tîr tâka.

²⁶Kha hnung chu râl hrungtu khan mi dang a bing doka hon tân a hmu nôka, râl hrungtu khan kotbâi hrungtu a koia, “En ta, mi dang a bing doka hon tân a om nôka,” a tia. Reng khan “Ama khom khan thu a hong intungtir sa hrang ni a ti,” a tia.

²⁷Râl hrungtu khan, “Maton hon sa ualpu so chu Zadoka nâipa Ahimaaza kêng a ang,” a tia. Reng khan, “Ama kha mi satak a nia, thurchi a hong intung hrang ni a ti,” a tia.

²⁸Ahimaaza kha a khêka, rêng kuang, “A sa inzen,” a tia. Khante a hmâi irnêng sikin rêng makunga khan chubai a mûka. “RENGPA nang a doitu kut thâk nang tumtuhai chunga inhnêna nang pêktu RENGPA ni Pathian chu inpâkin om ri se,” a tia.

²⁹Reng khan, “Ruatharte Absaloma kha te a la dam mo?,” a tia. Ahimaaza khan, “Ka pu, ni sipai hruaitu Joaba khan a ni tîr suak lai khan an buai sup sup hi ki hmua. Khannisian imo a ini chie chu nang hril thei no ning,” a tia.

³⁰Khante rêng khan, “Khan lei ngîr hi ro,” a tia. A’rthîna, a lei ngîr tâka.

³¹Kha hnung chu Kus mi kha a hong tunga, rêng kuang khan, “RENGPA ka pu, ni ta hrang thurchi sa ki hong intung a ni,” a tia.

³²Reng khan Kus mi kuang khan, “Ruatharte Absaloma kha a la dam chu a ini ma ni?,” a tia. Kus mi khan, “Ka pu, ni râlhai le ni siatna zongtuhai murdi chu, kha ruatharte ang khan om ving ri sehai,” a tia.

³³Khanchu rêng kha ngaisiatna’n a hong de tâka; kul kotbâi chunga tentana khan a fea, a chapa. A chap pumin, “O ki nâipa Absaloma, ki nâipa, ki nâipa Absaloma, ki nâipa, nir thûl hin keima ki lei ithi ni sianlân chu o! O Absaloma ki nâipa, ki nâipa!,” a tia.