Read Hrangkhol 2 SAMUELA 19 Bible Online

2 SAMUELA 19 - Hrangkhol bible

2 SAMUELA 19

¹Joaba kha an inhrila, “Reng khan Absaloma kha a châa, a chûla,” an tia.

²Kha ni khan chu rêng kha a nâipa sika khan a bei an dongtir tâka, an iti kha mipuihai khan an len hriat sikin an inhnê laia raifân kha mi murdi ta hrangin chûlna a hong ni ta.

³Sipaihai kha irdoinaa mi laizâm tho, inzakna sika dâihreka an ihong ngai ang khan, kha ni khom khan dâihrekin khopui an hong lûta.

⁴Reng khan a hmâi a hîpa, “O ki nâipa Absaloma, o Absaloma ki nâipa, ki nâipa,” tiin a chap ngûi ngûia.

⁵Joaba kha rêng ina a va fea, rêng kuang khan, “Ni hringna hai, ni nâipasal hai le ni nâinuhai hringna le ni dôngma le ni lâksîrnuhai hringna inzôktu ni mihai kha a vuan hin hmâimôk ni irlâktirhai a ni.

⁶Nangma lung nang thungtuhai ni hnôla, nang a hnôltuhai lung ni thunga. Ni sipai hruaituhai le ni mihai kha ni ta hrangin ite an ini loizia a inlang a ni. Absaloma kha hring sianlân, keinihai hi thiin lân, ni ilôm ual hrang a ni.

⁷Khasikin thoiin lân, suak zelin lân, ni mihai milung inchuk lam takin thu hril ro. Khaangin ni tho noa ni’n chu RENGPA irhmingin ki ti, nangtûk zîng tena chu ni kuanga inkhat lua om ta no nihai. Ama kha ni ta hrangin ni hringnuna atûn tena ni chunga thil saloi tung murdi laia thil saloi irkhêl tak ni a ti,” a tia.

⁸Kha hnung chu rêng kha a thoia a fea, kul kotbâi kôla khan, a toi ti an inhriatin chu an rêngin a kôla an hor bûm tâka. Israelhai kha chu mâni puan in chita laizâm an thoa.

⁹Ram pumpuia khan, “Reng Davida khan ei râlhai kut ata a nin zôktir ta. Filistia mihai kut ata a nin zôktir tâka; khannisian atûn hin hi rama irthokin Absaloma chiin laizâm an tho tâk.

¹⁰Absaloma ei rêng hranga sahriak ei irthutir laka kha irdoina khan a thi tâka. Khasikin itho sikin mo rêng Davida kha koi kîr hrangin ei iti viat loi,” tiin Israel mihai kha an irsêl sup sup tâka.

¹¹Israel mihaiin rêng hruai nôk hrang thu an insîr kha rêng Davida mikuar a hong tung tâka. Juda hruaituhai irdon hrangin rêng Davida khan ochai Zadoka le Abiathara kha a tîrhaia; “I lo hrang mo rêng kha a in tianga hruai kîr nôk thua nin ir-ial?

¹²ki urênghai nin nia, ki thisen irzompui nin nia; itho mo nin hruai kîr nôk hrang thua hin nin ir-ial mo a ni?,” a tia.

¹³Amasa kuang, “Ki thisen irzompui mo ni mak che? Atûna irthokin Joaba irthûla ki sipai hruaituin nang ki siam no’n chu, Pathianin a nuam nuamin ni lo ri se, kha nêka na ual khomin, a ti va ti roi,” a tia.

¹⁴Khanchu Judahai murdi’n an lungrîl kha Davida tiang ar hei nôk tâka. Khanchu rêng kuang, “Ni mihai leh khan hong kîr nôk ta roi, ti hrangin mi a hong tîra.

¹⁵Khanchu rêng kha a hong kîra, Jordan dung tena a honga, Jordan dunga lei zu hruai inkâitir hrangin Judahai Gilgal-a an lei zuanga.

¹⁶Kha laia khan Behurim khuaa mi Benjamina mi Gera nâipa Simeia khom kha irhnottak rengin Davida don hrangin Judahai leh khan Jordan dunga an fea.

¹⁷A kôla Benjamina mi sîngkhat hruaiin a zuanga, Saula in sûng mihai enkoltu Ziba le a nâipasalhai sôm hleiringa le a zui sômhnihai khom rêng tung mân Jordan dung an zuang tunga.

¹⁸Reng in sûng mihai hruai inkâi hrang le rêngin a sa a iti murdi tho hrangin Jordan dung an irkân tâka. Reng kha Jordan dung irkân hranga a’rfôk laiin Gera nâipa Simeia kha rêng makunga khan an boka.

¹⁹Reng kuang khan, “Ka pu Jerusalem ni mâk nia dik loi taka ki lei itho tâkhai kha irngaihoi takin ni’rnghil pe ro. Siatna neiin ni bê no’n lân, nin hre pe ta no ro.

²⁰Ka pu thil ki tho’nsual a nih ti kin hriat suaka, khasikin hmâr tianga nam murdihai laia nang don hranga a vuan hin zuang suak masa tak ki ichang a ni,” a tia.

²¹Zeruii nâipa Abisaia khan, “RENGPA sahriak irthutir kha khomâk a sâm sikin Simeia hi that hrang a ni,” a tia.

²²Khannisian Davida khan Abisaia le a upa Joaba kuang khan, “Nin irngaidân hril hrangin tu’n mo nangni a inphût? Nin ni inbuai hrang mo a ini? A vuan hin Israel rêng chu keima kêng ki ini. Khasikin a vuan hin Israel mi murdi that hrang ni maka,” a tia.

²³Reng khan Simeia kuang, “That ni no chin ni,” tiin chong an kunga.

²⁴Kha hnung chu Saula tupa Mefiboseta kha rêng don hrangin a zuanga. Rengin Jerusalem a mâk nia irthokin râl irngam taka a hong kîr nôk ni dêna khan Mefiboseta kha a ke khom irsu loiin, a hnerkamul khom ep irrualtir loiin, a puanhai khom irsu loiin.

²⁵Reng don hrangin Jerusalema irthokin a zuang tungin chu, rêng khan a kuang, “Mefiboseta itho mo ni ni izui sa loi?,” a tia.

²⁶Ama khan, “O rêngpa, ke’nbâi ki nih ti khom nin hriata. A ni zuitu kuang, rêng le kin fe suam theina hrangin ki chuangna hrang sakuartung nir fûktir pe’n lân, ki tia, khannisian a ni huanga.

²⁷Khante o rêngpa ni kuang a ni zuitu khan a ni hnôla, nikhomsian nang chu Pathian vântirtôn ang ni nia, khasikin a sa ni ti lam takin tho ro.

²⁸Ka pa in sûng mi murdi kha, o rêngpa, ka pu ni ithat paihai vinga ruk an ni. Khannisian nang a zuitu hi ni khalâi irhîlpuihai laia nin thanga. Khasikin rêng kuanga thil dang indit bîkna zong ngam zât ni ta ma ung,” a tia.

²⁹Reng khan a kuang, “Ni chungchâng thu ite ni insîr nang ta ma. Saula thil nei murdi nangma le Ziba khan irsem ri sehai,” a tia.

³⁰Mefiboseta khan rêng kuang, “Ziba khan dong ving ri se. RENGPA kha ama ina inzôk riama a hong tung nôk hi, ki ta hrangin chu a iruk a ni,” a tia.

³¹Gilead mi Barzilaia kha Rogelim-ah irthokin rêng kha Jordan-a a hruai inkhâi hrangin a lei zuanga.

³²Barzilaia kha kum sômriata mi ulian a ni. Mi irchong tak a nia, Mahanaim-a rêng a om sûng khan chu fâk hrang lei enkoltu a ni.

³³Reng khan Barzilaia kuang, “Ki kuang Jerusalema hong ro, keima’n nang enkol ki ti,” a tia.

³⁴Khannisianlân Barzilaia khan rêng kuang, “Idôra dam hrang mo ki la ni; i lo hrang ngânin mo Jerusalem rêng kuang ki ife hrang?

³⁵Atûn hin kum sômriat mi ki ni tâka, ite khomin raifânna ni pe thei ta mah. Ki fâk ki nêk khomin a tui a thâi inhre thei ta ma unga, hlasaktuhai hlasak khom inhre thei ta ma unga. Khasikin ni ta hranga puakrik kai kêng ki ini ta hrang.

³⁶Khaang dôra satna roiinpui dong hrangin irchukna nei ma ung. Khasikin Jordan râl kâi zoi hnungin zoro sôtloite nangma kuang om ki ta,

³⁷kha hnung chu irngaihoi takin ki in tiang nin fetir ro. Ka nu le ka pa thân omna, keini khua ngêta thi ki ti. Khanisian en ta, hi ki nâipa Chimhama hin ni sin tho ri se. Ni kuang hruaiin lân, a chunga a sa ni ti lam takin tho ro,” a tia.

³⁸Khante rêng khan, “Chimhama chu ki kuang hruai ki ta, ni nuam lam ang takin a chunga tho ki ti. Thil i khom ni ni inghi kai chu nang tho pe mai ki ti,” a tia.

³⁹Kha hnung chu Davida le a mihai khan Jordan râl an kâi tâka. Reng khan Barzilaia kha a tuma, sat a vura, khante Barzilaia chu a in tiang a kîr nôk ta.

⁴⁰Juda mihai le Israel mi a chimriphaiin rêng kha Jordan an hruai inkâitir zoiin chu, rêng kha Gilgal-a a fea, Chimhama kha an kuang a fe saa.

⁴¹Kha hnung chu Israel mihai kha rêng kuang an fea, rêng kuanga khan, “O rêngpa, itho mo kin urêng Juda mihai hin anni ta bîkin nang an bêa, nangma le ni in mihai le khom Jordan râla nangni an ihruaipai zit hi?,” an tia.

⁴²Juda mihai murdi khan Israel mihai kha, “Reng chu kin takmiti a ni sikin a ni. I lo hrang mo hi thua hin nin ning a inmur? Reng thil nei tûnga om mo kin nia? Thilpêk ite lua mo a ni pêk ngai?,” an tia.

⁴³Israel mihai khan Juda mihai kha, “Nin takmiti ni khom sianlân, rêng Davida rêng inchang thua, a bâk sômkhat chunga thu kin inei kêng a ni. Hiang hin ni enkhûm no roi. Reng hruai kîr nôk hrang thu kha keini kêng a ni iti masa,” an tia. Khannisianlân, hi thua hin Juda mihai kha Israel mihai nêkin chu an inhrum ual a ni.