Read Hrangkhol 2 SAMUELA 2 Bible Online

2 SAMUELA 2 - Hrangkhol bible

2 SAMUELA 2

¹Kha zoiin chu Davida khan RENGPA kuang, “Judai ram khopuihaia khan ki hong ife hrang mo?” tiin RENGPA a chongpuia. RENGPA khan a kuang, “Hong fe ro,” a tia. Davida khan, “Tu khuaa mo ki hong ife hrang?,” a tia. RENGPA khan, “Hebrona” a tia.

²Khanchu Davida chu Hebrona a fea, a dôngmahai ruai Jezreel mi Ahinoami le Karmel mi Nabala dôngma Abigaili-hai kha a hruaihaia.

³Davida khan a mihai leh a insûngkuahai khom kha a hruaihai saa, Hebron kôlvêla khuahai khan an om tâka.

⁴Kha hnung chu Judai rama mihai kha Hebrona an honga, Juda mihai chunga rêng hrangin Davida kha sahriak an irthûtira. Davida’n Saula phûmtuhai chu Jabes Gilead mihai an nih ti an hriatin chu,

⁵an kuang khan Davida’n mi a tîra, an kuang, “Nin rêng Saula chunga nin iamomzia inlangtirin nin lei phûm sikin RENGPA khan sat nangni vur ri se.

⁶RENGPA khan nin chunga lungkhamna le thutak inlang sianlân; hi thil nin tho sika hin kei khomin nin chunga satakin tho ki ti.

⁷Hrât tak le hâitakin om roi! Nin rêng Saula chu a thi tâka, Juda irchihai khan an rêng hrangin sahriak an ni irthutir tâk a ni,” a tia.

⁸Nera nâipa Abnera, Saula sipaihai hruaitu kha Saula nâipa Isbosetha leh khan Jordan râl Mahanaim hmuna laizâm an thoa.

⁹Kha khan Abnera khan Isbosetha kha Gilead, Asera Jezreel, Efraima le Benjamina ramhai chunga, a ni Israel ram pumpui chunga rêngin an siam tâka.

¹⁰Saula nâipa Isbosetha kha Israel chunga an lal phut laia khan kum sômminli mi a nia, kum hni a inlal a ni. Khannisianlân Juda mihaiin Davida chunga iamomin an om maia,

¹¹Davida’n Hebron khuaa khan Juda irchihai chunga kum sari le tha ruk roi a irêl a ni.

¹²Isbosetha mi lianhai le Abnera kha Mahanaim rengata suakin Gibeona an fea.

¹³Zeruii nâipa dîla khan an irtongpuia; khanchu senkhathai kha dîl râl kiang tiang panga an toia, senkhathai nôk kha kiang dang tiang an toia,

¹⁴Abnera khan Joaba kuang, “Hi tiang le hi tiang ruathartehai inthanghai ei ta, irsual ri sehai,” a tia. Joaba khan, “A sa,” a tia.

¹⁵Khanchu an sûn nikhua a hong tung tena chu, Benjamina irchi, Isbosetha tianga kop mi sômhleihni le Davida mi sômhleihnihai kha an irsuala.

¹⁶An irotpuihai leh khan an lua an irchela, an i-âthai kha an kuanga khandai leh an irsuna, khanchu mi sômhni minlihai kha an rêngin an inrîl vinga, an thi tâka. Khasika khan Gibeon hmun kha Helkat-Hazurim an ti tâka.

¹⁷Kha hnung chu, kha nî zela khan irdoipui a suak tâka; Abnera le Israel mihai kha Davida mihai ata khan an dok tâka.

¹⁸Kha hmuna khan Zeruii nâipasalhai inthum Joaba, Abisaia le Asahela hai an oma. Asahela kha sazuk ang dôra ngalhrât a nia.

¹⁹Khanchu Asahela khan Abnera kha a’rzûla; Abnera irzûl kha vei tiang mani, chang tiang mani pêt viat loiin a’rzûl thala

²⁰Abnera chu a hong irheia, “Nangma kêng hi ni inina, Asahela?,” a hong tia. Asahela khan a sâma, “O keima ki ni,” a tia.

²¹Abnera khan a kuang, “Ni’rzûl ta no ro, ni chang tiang mani, ni vei tiang mani pêtin lân, ruatharte inkhat kha chelin lân, a râltukfam irvonahai kha lapai pe ro,” a tia. Khannisianlân, Asahela khan Abnera kha a’rzûl maia.

²²A thar vangin Abnera khan Asahela kuang, “Ni’rzûl ta no ro, i lo hrang mo nang ki isun that hrang? Itin mo ni upa Joaba hmêl ki ihmu ngam ta hrang?,” a ti nôka.

²³Khannisianlân, Asahela khan pêt nuam ual maka, khanchu Abnera khan a ufei hmor leh khan a phînga a suna, ufei khan a hnung tiang ar hlet thala, Asahela chu irnênga an rîla, a thi tâka. Khan, Asahela inrîlna a thina hmun hong tunghai kai chu an irngama, an ngîr chian ta.

²⁴Khannisianlân Joaba le Abisaia khan Abnera chu an irzûl maia; Gibeon ramchâr lampuia Gia nisua tiang Amma tâng an tungin chu misa a tâk tâka.

²⁵Benjamina irchihai kha Abnera kuang an irbûma, pâl khatin an irsiama, tâng sîpa khan sirsan an va lâka.

²⁶Kha hnung chu Abnera khan Joaba a koia, “Kumtuangin ei irdoi mai hrang ma ni ta? A mongna chu beidong ngaisiat om tak a ini hrang iti hi nin hriat mo? I dôra sôt mo ni mihai khan an urênghai irzûl an imong hrang iti ni ihril ta hrang?,” a tia.

²⁷Joaba khan, “Pathian hringna irhmingin ki iti a ni, ite ti no’n lân chu, nangtûk zîng dênin ki mihaiin nangni an irzûl hrang a ni,” a tia.

²⁸Kha hnung chu Joaba khan bekul a hong tuma, mipuihai an inding chiana, Israel mihai kha irzûl ta mahaia; irdoi nôk ta mahaia.

²⁹Abnera le a mihai kha Jordan phâi an hroa, zân sôt an fea; Jordan dung an irkâna, zîng nôka sûn sôtin an fea, Mahanaim an tung nôk tâka.

³⁰Joaba kha Abnera irzûl a kîr nôkin chu, a mihai a bûmhai vinga, mi sôm hleikuak le Asahela chu irkip ta loiin a om ti an hmu suaka.

³¹Davida mihai khan Benjamina nama irthokin Abnera mihai kha irzathum sômhni an thata.

³²Joaba le a mihai khan Asahela ruak kha an chôia, Bethlehem-a a pa thâna an phûma. Kha hnung chu Joaba le a mihai kha zân sôtin an fea, khua a vârin chu Hebron an tung nôk tâka.