Read Hrangkhol 2 SAMUELA 21 Bible Online

2 SAMUELA 21 - Hrangkhol bible

2 SAMUELA 21

¹Khan Davida inlal lai khan kum thum châm a tâka. Khanchu Davida khan kha thua khan RENGPA a chongpuia, RENGPA khan, “Saula le a in mihaiin thisen an insuaa, Gibeon mihai an that sika a ni,” a tia.

²Gibeon mihai kha Israel irchi ni mahaia, Amor mi la omsunhai, Israelhaiin hrung inzôk hranga chong an lei inkung pehai kha an ni. Khannisian Saula khan Israel irchihai le Juda irchihai hranga sathnem irngai sika that irhmang a lei itum ngai a ni.

³Khanchu Davida khan Gibeon mihai kha a koihaia, an kuang, “Imo nangni ki itho pe hrang? RENGPA mihai kha sat ni vur theina hrangin nin chunga tho’nsual lei nei tâk chungchânga i anga irngeina mo nangni ki isiam pe hrang?,” a tia.

⁴Anni khan a kuang, “Saula le a in mihai le, kin chungthu hin tangka le rângachak indamtir thei ni maka; Israel mi tûte kin ithat thei khom ni ma,” an tia. Khan Davida’n, “A ni ngânin te imo nangni ki itho pe hrang nin inuam?,” a tia.

⁵Anni khan, “Saula khan nir hmangtir vinga, Israel ram sûnga nin omtir ta loi hrangin a inuam a ni.

⁶Khasikin Saula nâipasalhai laia mi pasal sari ni pe’n lân, RENGPA rêng inthang Saula khua Gibea khan RENGPA makunga inkhâi that kin ti,” an tia.

⁷Khannisianlân rêng khan, Jonathana le an ruaia kâra thuthung an lei nei tâk sikin Saula tupa Mefiboseta chu an hôia.

⁸Khanchu rêng khan Aii nâinu Rizpii, Saula nâipasal hni a inei pehai ruai Armonia le Mefiboseta kha a hruaia; khabana Meholat mi Barzilaia nâipa Adriela, Saula nâinu Mikali nâipa ringa a inei pehai leh khan a hruaia.

⁹Gibeon mihai kuta khan a pêka, anni khan RENGPA makunga tânga khan ankhâi that tâka. Khaang khan pasal sarihai kha an rêngin an ithi zoi tâk a ni. An that lai hi bu ât zoro, barli ât phut tianga a ni.

¹⁰Kha hnung chu Aii nâinu Rizpii kha bora puan a lâka, bu ât phut ata irvâna rua a zuang tho dênin a omna hrangin ruak omna kôla lungpui chunga a ngîra, sûn tianga chung vuang vatehai hrungin a ruak kha a hrunga, zâna ramsahai a ihrung sa ngai a ni.

¹¹Rizpii thil tho kha Davida’n an hriatin chu,

¹²a fea, Jabes Gilead mihai kuang ata Saula ru le a nâipa Jonathana ruhai kha a lâka. (Filistia mihaiin Gilbo tânga Saula an that nia Filistia mihaiin Beth-san kotsua an inkhâi laia Jabes Gilead mihaiin an lei inrûk a ni.)

¹³Davida khan Saula ruhai le a nâipa Jonathana ruhai kha a lâka, khabana a inkhâi that tâk mi pasal sarihai ru kha a lâk khôma.

¹⁴Khanchu Saula ruhai le a nâipa Jonathana ruhai kha Benjamina rama Zela khuaa a pa Kisa thâna an phûma; khanchu rêng thupêk ang tak khan an thoa. Kha zoiin chu ram ta hranga an ingênnahai chu Pathianin a sâmhai ta.

¹⁵Khan Filistia mihaiin Israel mihai kha an doi nôka. Davida kha a mihai leh an fea. Filistia mihai kha an zu doia. An irdoi lai khan voikhat chu Davida khom a sân a sôl tâka.

¹⁶Milian inthang inkhat ar hming Isbibenoba, dâr leh siam ufei a rik lam chu her thum le a chimrip, khandai thar vongtu khan Davida kha that a tuma.

¹⁷Khannisian Zeruii nâipa Abisaia khan Davida kha a sana, Filistia milianpa kha a doia, a that tâka. Kha hnung chu Davida mihai khan Davida kha irdoina hmuna fe ta loi hrangin chong an inkungtira. “Israelhai roiinpuitir tak ar hmang loina hrangin irdoi hrangin kin laia hong suak ta no ro,” an tia.

¹⁸Kha zoiin chu Filistia mihai leh Gob khuaa irdoina a om nôka, kha zoroa khan Husa mi Sibekaia khan mi lian inthangpa inkhat a’rhming Safa a thata.

¹⁹Filistia mihai leh Gob khuaa an irdoi nôka, Bethlehem mi Jaira nâipa Elhana’n Gath mi Goliatha a thata, a ufei ngul chu puan rikol ang dôr a ni.

²⁰Kha hnung chu Gath khuaa irdoina a om nôka, kha khan irsual nuam mi lian inthangpa a oma. Kutpâr kiruk le kepâr kiruk nei hi a nia, a rêngin sômhniminli nei mi a oma.

²¹Ama khan Israel mihai kha a va sarâia, Davida sangpa Simeia nâipa Jonathana khan a lei thata.

²²Kha pasal minlihai kha Gath khuaa milian irchihai chu an ni. Anni kha Davida le a mihai kuta an ithi a ni.