Read Hrangkhol 2 SAMUELA 22 Bible Online

2 SAMUELA 22 - Hrangkhol bible

2 SAMUELA 22

¹Khante Davida khan a râlhai kut ata le Saula kut ata RENGPA’N a saninzôk hnunga khan Davida khan hi hla hi RENGPA kuang a saka:

²RENGPA chu ki lungpui le ki kulpui det le ni saninzôktu a ni.

³Ki Pathian chu a ni hrungtu a nia. Ama zârin zôkin ki om thei ngai. Ama khan pho angin a ni hruaia. Ni hrungin a nin zôktir ngai. Ni saninhringtu a nia; irvîk irhêma irthokin a nin zôktir ngaia.

⁴RENGPA chu ki koia, ama khan ki râlhai kut ata a nin zôktir ngai. RENGPA chu inpâkin om ri se!

⁵Thina tui irsokin a ni hor huala, Siatna tinin a ni zâpa.

⁶A ni thina hri tinin a ni bôma, Thân bâi rongin a ni nghâk chiana.

⁷Ki milung zîng laiin RENGPA chu ki koia, ki Pathian chu ni changpui hrangin ki koia. Ama khan a biak ina ki’rhâi an hriata; Ni changpui hranga ki khêk irhâi a len hriata.

⁸Kha hnung chu irnêng an hnînga an thing tâka, Pathian ning an mur pe sikin, irvân irnghatnahai khom inthingin an hnîng zoi ta.

⁹A hnâra irthokin meikhu a suak zut zuta; A bâia irthokin meichok le meiri-al a suaka.

¹⁰Ama khan irvân a thêra, a zuang chum tâka. A ke hnuai tiang khan sûmzîng hi a lei oma.

¹¹Ama chu irvân tâli chunga chuangin a vuanga; A ni, phâivua irthahai chunga a vuang duai duaia.

¹²Ama chu inthim le vârin ama le ama irkhumin a oma, sûm irsatak tuia sip khan ar hual khuma.

¹³A makunga vâr irkhêl tak khan mei ir-alhai kha an choktira.

¹⁴Kha hnung chu RENGPA kha irvâna irthokin an ri dur dura; an chungtaka irhâi kha an thangtir tâka.

¹⁵Ama khan a thalhai a kâp suaka, a râlhai an irthekindartir chita; kôl a’rtêktira, anni chu laizâm an tho zoi ta.

¹⁶RENGPA’N a râlhai a ngoa, anni kha ningmurin a râiin chu, tuikhanglian inli luang khom an langtira, irnêng irnghatna khom an lang ving ngai.

¹⁷RENGPA khan chung tianga irthokin a ni zuan bana, a nin tûka; tui inthûk takhaia irthokin a ni kêlsua tâka.

¹⁸A ni doitu hrât takhai laia irthokin a ni saninzôk tâka. A ni, a ni hnôltuhai ata khom, anni kha keima hrangin an ihrât hrai a ni.

¹⁹Anni khan ki milung zîng laiin an ni doia, khannisian RENGPA kha ki itûng zoi a ni.

²⁰Ama khan ichioma a ni changpuia; Ki chunga a lôm sikin a ni inzôk tâk a ni.

²¹RENGPA’N ki fel dân ang takin ki chunga a sina, ki kut irthiang lam ang takin sat a ni vur a ni.

²²RENGPA dân kha ki zôm maia; ki Pathian kuanga irthokin sual takin fe ngai ma ung.

²³A dânhai chu ki vong maia, a thupêkhai chu zôm loiin om ngai ma ung.

²⁴ama khan sêlna boi ki ini lam le, tho’nchâi loi hranga ki irdîn dân an hriata.

²⁵Khasikin RENGPA khan ki felna lam angin a ni thuana, Ki kuthai a mithmua a irthiang lam angin.

²⁶O RENGPA, nang chu ni chunga iamomhai chunga ni iamoma; mi satirkiphai chunga ni satirkip ngaia.

²⁷Mi irthianghai chunga ni’rthianga, Mi siathai chunga kuttum nin lek ngai.

²⁸Mi irngaiintôm theihai chu ni saninzôk ngaia, khannisian lârirpâkhai chu nin temtir ngai.

²⁹O RENGPA nang chu ki meiser ni nia; Keimaa inthim om hi nin vârtir pe roh.

³⁰A ni ki râlhai rûn theina hrang irtha hrât ni pe’n lân; an kulpui inhnêna hrang irnak leh khan.

³¹Pathian chu a sin thôna khan ar kipa, A thuhai chu pom inruk a ni, Ama iamna irnghattu murdihai tah hrangin ama chu pho ang a ni.

³²RENGPA vai hi Pathian a nia; Ama vai hi ei lungpui irbîkna a ni.

³³Pathian chu ki kulpui det tak a nia, ki lampui khom a ni’rthial infâi pe ngai.

³⁴Ki kehai khom hi sazuk ke angin a siama; Tâng chunga khom zôk takin a nin omtir ngai.

³⁵Râlbuala hrangin irsual dân a ni’rchutira; Khanchu thal kâp dân ki hmang theina hrangin.

³⁶O RENGPA ni saninhringna pho kha ni ni pêka; Nangma changpuina khan a ni isiam inliantir a ni.

³⁷Râlhai kuta hrât loi hrangin ni phal mak chea. Khasikin ki inrîl viat loi a ni.

³⁸Ni doituhai chu ki’rzûla ki chelhaia; Annihai kha an irhmang zoi mâka chu mâk ngai ma ung.

³⁹Anni chu thoi thei ta loi hrangin ki sâthai chita; ki makunga an idok tâk a ni.

⁴⁰Nangin irdoina hrang hrâtna ni ni pêka, A ni doituhai chu ki hnuai tiang an inrîl zoi ta.

⁴¹Nangma’n ki râlhai chu ki kuang ata laizâm nin thotirhaia, a ni hnôltuhai khom an irhmang zoi ta.

⁴²Ama chu changpui irngaiin a khêka, nikhomsianlân tûte a saninzôk hrang om mahaia, RENGPA kha an koia, nikhomsianlân sanhai maka.

⁴³Anni chu irnênga vâiphin angin ki suk india, kholaidunga dialdôk ang dôrin ki sirchîlhai chita.

⁴⁴Ki mi pualoihai ata khom ni nin zôktira, nam tinhai lu ni hrangin ni ni hrung sua tâka. Atûn chu ki inhriat ngai loi mihai khom ki sinthotu an hong ni ta.

⁴⁵Ram dang mihai khom ki makunga an kûna, Ki thurchi an inhriatin chu ki thu an zôm ngai.

⁴⁶Anni chu an thâi an dôptira, an kulpuia irthokin inthing pumin an zuang suak ngai.

⁴⁷RENGPA chu a hring maia; ki lungpui irbîkna inpâkin om sianlân; Ni saninhringtu Pathian roiinpuina chu inthangin om ri se.

⁴⁸Ama khan ki râlhai chunga inhnêna a ni pêka, nam tin ki ke hnuaia an om vinga.

⁴⁹Ni doituhai lai ata a ni sansuak tâka. A ni, nangin ni doituhai chung tiang khan ni ni chôiirsângtira. Mi pualoihai kut ata ni nin zôktira.

⁵⁰Khasikin O RENGPA, nam tin laia khan nir hming inpâk ki ta, nangma inpâkin zâi ki ti.

⁵¹Pathian khan inhnêna roiinpui tak, a rêng inthang kuang khan a pêk ngaia; a sahriak irthûtu Davida le ar chihai chunga khan, kumtuangin a lungkham lianzia an langtir ngai.