Read Hrangkhol 2 SAMUELA 24 Bible Online

2 SAMUELA 24 - Hrangkhol bible

2 SAMUELA 24

¹Khan RENGPA ningmurna kha Israelhai chunga a zuang tung nôk thuta. Davida kha an chunga siatna intung hrangin an phûta, a kuang, “Fe’n lân, Israel mi le Juda mi tephai ving ro,” a tia.

²Khanchu Davida khan a sipai hruaitu Joaba kuang khan, “Israel nam murdi laia hin Dan-a irthokin Beerseba dênin irfangin lân mi iza ngân mo an inih ti inhriat theina hrangin tephai ving ro,” a tia.

³Khannisian Joaba khan rêng kuang, “O rêngpa, RENGPA ni Pathian khan Israel mipuihai kha atûna nêkin a lêt irzain punghai sianlân, kha kha rêngpa ka pu hin hmu ri se. Khannisian o RENGPA i lo hrang mo thil hi an hriat ni inuam kher hi?,” a tia.

⁴Khannisian rêng khan Joaba le sipai hruaituhai khan a thu kha an zôm tâka. Khanchu Joaba le sipai hruaituhai kha Israel mihai tep hranga khan rêng kuang ata an suak tâka.

⁵Jordan râl an va kâia, Gad ram huala phâi inlaina taka khopui, Aroer sim tiang khan hmun an khuara. Khatak ata hmâr tiang Jazera hai,

⁶Gilead ram hai, Kades rama hai, Hit mihai rama an fea. Kha hnung chu Dan tiang an fea, Dan ata kha nitâk tiang Sidon-ah an fea.

⁷Kha hnung chu sim tiang Tura khopui kulpui neina khan an fea, Hit mihai le Kanaan mihai khua murdi an irfanga, Judai ram sim tiang Beerseba khan an fea.

⁸Khanchu ram pumpui an irfang suak zoi hnungin tha kuak le sûn sôminhni irzoiin Jerusalema an kîr nôka.

⁹Khanchu Joaba khan mihriam om dôr kha rêng kuang a pêka. Israel rama khan pasal râl doi thei takhai chu, Israel mi nuai riat an oma, Juda mi kha nuai ringa an iom a ni.

¹⁰Khannisian mihriam a hong tep zoi tena chu Davida lungrîl kha a na pe oka. Davida khan RENGPA kuang, “Ki thil thoa hin a satêrengin ki lei insual tâk a ni. Nikhomsianlân atûn hin o RENGPA, mi sual pualoina hi nin za hrangin nang ki ingên a ni. Invêt chângin ki lei châng tâk a ni,” a tia.

¹¹Khan RENGPA thu kha Davida deipu Gada kuang a zuang tunga, “Fe’n lân, Davida kuang thil inthum inthang hrang ki pêk. A inthangtak chu ki itho pe hrang a nih ti va hril ro,” a tia. Zînga Davida a thoi tena chu

¹³Gada kha a kuang a fea, RENGPA thu suak kha a hrila, a kuang, “I tak hi mo ni iti? Ni ram sûnga kum thum châmpui tâk hi mo, ni râlhai lai ata laizâm tho hi mo, aninole ni ram sûnga sûn thum sûnga hripui inlêngtir hi mo? a ni tîrpu RENGPA kuang intung nôk hrangin irngaitua’n lân, ni iti nuam chu nin hril ro,” a tia.

¹⁴Davida khan Gada kuang, “Ki milung kêng a zîng khak! I khom ni sian, mihriamhai kuttum ni tho chu nuam ma unga; RENGPA kuta irpe ki ta, a lunginkhamna a liana,” a tia.

¹⁵Khanchu RENGPA khan Israel mihai chunga khan zînga irthokin zoro inkung a dên mâka chu hripui an lêngtir tâka. Dana irthokin Beerseba dênin Israel mi sîngsari an thia.

¹⁶RENGPA vântirtôn khan insiat hrangin Jerusalem tiang a kut a hor leka, khan RENGPA’N a mihai kuttum tho hrang a iti kha a milung a’rthûltira, mi thattu vântirtôn kuang khan, “A ruk ta, ni kut irlek ta no ro,” a tia. RENGPA vântirtôn kha Jebus mi Arauna hruizôl kôla khan a oma.

¹⁷Davida’n mi thattu vântirtôn kha a hmu’n chu, RENGPA a chongpuia, “Irngai ro, keima kêng a tho’nchâi ki ini; dik loi taka thil tho insualtu chu keima ki ni. Hi kêlbelrahai hin i thil mo an itho insual? Keima le ki in sûng mihaiin kuttum kha kin ituang hrang a ni lem,” a tia.

¹⁸Kha ni sûn ngêta khan, Gada kha Davida kuang a fea, a kuang, “Fe’n lân, Jebus mi Arauna hruizôla RENGPA ta hrangin maichâm hong siam ro,” a tia.

¹⁹Davida’n RENGPA thupêk kha a zôma, Gada iti pe lam angin a fe tâka.

²⁰Arauna khan a hong thîr vêlin chu, rêng le a mi lianhai hong kha a hmua, khanchu Arauna kha a suaka, a hmâi irnêng sikin rêng makunga khan an boka.

²¹Arauna khan, “RENGPA ka pu, itho sika hong mo ni ini?,” a tia. Davida khan, “Mipuihai chung ata hripui ar kiang theina hranga RENGPA ta hranga maichâm siamna hranga hruizôl irchôk hrangin,” a tia.

²²Arauna khan Davida kuang, “O rêngpa, lan lân, a sa ni iti murdi RENGPA kuang inhlan ro. Hâlirvôm inhlanna hrang sehrâtchal chu hin a oma, thingtua hrang chu hruizôla hmangruahai le sehrâtchal ringkolhai kha a iom a ni,” a tia.

²³Arauna khan hihai murdi hi rêng a pêk vinga, a kuang, “RENGPA ni Pathian khan, ni thilinhlan nang pom pe ri se,” a tia.

²⁴Khannisian rêng khan Arauna kuang, “Ni ma, a man omin irchôk ngêtin ki irchôk hrang a ni; ite thâm loiin RENGPA ki Pathian kuang, hâlirvôm thilinhlanhai inhlan no ning,” a tia. Khanchu Davida khan hruizôla sehrâtchal kha tangka sômringa leh ar chôk tâka.

²⁵Kha hnung chu Davida khan kha hmuna khan RENGPA ta hrangin maichâm a siama, hâlirvôm thilinhlan le irngeina thilinhlanhai a neia. RENGPA khan Davida’n a ram ta hranga chongchaina kha a sâma, Israel ram ata kha hripui kha ar kiangtir tâka.