Read Hrangkhol 2 SAMUELA 4 Bible Online

2 SAMUELA 4 - Hrangkhol bible

2 SAMUELA 4

¹Saula nâipa Isbosetha khan Hebrona Abnera a thi ti an hriatin chu a lei chi tâka, Israel mihai kha an phûk an thing tâka.

²Isbosetha khan sipai pâl hruaitu inhni Baana le Rekaba a neia; anni kha Benjamina irchia Beerot mi Rimona nâipasalhai an ni. (Beerot chu Benjamina rama ibe a ni.

³Lei om masa a ram mihai kha Gataim-ah laizâm an thoa, atûn ten hin an iom mai tâk a ni.)

⁴Saula irchia mi dang la om chu Jonathana nâipa Mefiboseta a nia, Saula le Jonathana an that laia khan kum ringa mi vai a la nia. Jezreel-a irthokin Saula le Jonathana thi thu an len hriatin chu a enkoltunu khan a poma, laizâm a thopuia; khannisianlân laizâm thopui hranga a’rhnot hrainaa khan an thâka, a ke a hon bâi tâk a ni.

⁵Rekaba le Baana kha Isbosetha in panin an fea, sûn laitaka Isbosetha sûn irngam laitakin an va tunga.

⁶Kotbâia nupang bu lei irkheinu kha inmusuin a oma, a in irnghila, khanchu Rekaba le Baana kha insûnga an lût zâia.

⁷Insûng an va lûtin chu, Isbosetha zâlna tentana an fea. Isbosetha lei in irnghil kha an suna, an thata. Kha hnung chu a lu an tana, an chôia, Jordan phâi fe thalin zân sôt an fea.

⁸Isbosetha lu kha Hebrona Davida kuang an hong chôia, rêng kuang khan, “En ro, hi nang that tum ni râl Saula nâipa Isbosetha hi; RENGPA khan ki rêngpa phuba kha a vuan hin Saula le ar chi chunga a ilâk pe tâk a ni,” an tia.

⁹Davida khan Rekaba le Baana kha a sâmhaia, an kuang, “RENGPA ki lungzîngna murdi ata ni saninzôktu hringna irhmingin ki iti a ni.

¹⁰Thurchi sa zuang tung hrang irngaiin, Saula kha a thi ta, tiin mi inkhatin a ni zuang hrila, ama kha ki chela, Ziklag khua khan ki thata; ama kha thurchi sa zuang intung mâna ki lei ipêk kha a ni.

¹¹Mi fel ama insûngluma, a zalhmuna om, Saula an ithat thisen man khan nin chunga ki inphût nôk ual, atûn hin irnêng ata nangni irhmangtir hrang ki ni,” a tia.

¹²Kha hnung chu Davida khan a ruathartehai kha thu a pêkhaia, anni kha Rekaba le Baana kha an thata, an kut le ke an tan pehaia, Hebron dîl kôla khan an inkhâihaia. Isbosetha lu kha an lâka, Hebrona Abnera thâna an phûm tâka.