Read Hrangkhol 2 SAMUELA 5 Bible Online

2 SAMUELA 5 - Hrangkhol bible

2 SAMUELA 5

¹Kha hnung chu Israel nam murdihai chu Hebrona Davida kuang an honga, a kuang “Kin thisen irzompui ni nia.

²Zoro lei fe tâka khan Saula chu ei chunga an lal lai khom khan irdoina buala Israelhai hruai ngaitu a ni; RENGPA khan ni kuang, ‘Ki mi Israelhai hruai ni ta, an chunga hruaituin om ni ti,’ a iti a ni,” an tia.

³Khanchu Israel hruaitu murdi’n Hebrona rêng Davida kuang an honga, Reng Davida khan Hebrona khan RENGPA makunga an kuang thu a thunga. Anni khan Davida kha Israelhai chunga rêng hrangin sahriak an irthutira.

⁴Davida an lal phuta khan kum sômthum mi a ni, kum sômminlia inlal a ni.

⁵Hebrona khan Judahai chunga kum sari le tha ruk an lala, Jerusalema Israelhai le Judahai murdi chunga kum sômthum inthum a inlal a ni.

⁶Davida le a mihai kha, kha rama om Jebus mihai rûn hrangin Jerusalema an fea; khahai khan Davida hong lût thei loi hrangin an iama. Davida kuang, “Hin hong lût thei viat no chi ni; mitcho le ke’nbâihai luan nang lei khap thei an ti,” an tia.

⁷(Khannisianlân Davida khan an Zion kulpui kha a lâka, kha kha Davida khopui a hong inchangtir a ni.)

⁸Kha nî khan Davida’n a mihai kuang, “Jebus mihai ki ingamhai dôr chu that irhmang ngam mo nin om? Mitcho le ke’nbâihai doi nuamhai chu tui luangna zuiin lût khum ri sehai,” a tia. (Khasika khan mitcho le ke’nbâihai kha RENGPA ina an ilût hrang ni mah iti a lei ini tâk a ni.)

⁹Kulpui kha a lâk zoiin chu Davida kha, kha hmuna khan a om tâka, “Davida Khopui,” iti a ni ta. Davida khan Milo sûng tianga irthokin a kôlvêla khan khopui kha a siam tâka.

¹⁰RENGPA itinrêng sin thei Pathian kha a kuang a om mai sikin, Davida chu a hong iroiinpui u ual a ni ta.

¹¹Khan, Tura rêng Hirama’n Davida kuang mi a tîra, meisâr thing a thona, kut theithiamhai le lung suktuhai a tîrhai saa, Davida rêng in chu an sin pea.

¹²Davida kha RENGPA’N Israel mihai chunga rêng hrangin a namindeta; a mi Israelhai sikin ram kha a isiam insa a nih ti an hriat suak ta.

¹³Davida khan Hebrona irthokin Jerusalema a’rthon hnunga khan, dôngma le lâksîr a nei belsaa, nâipasal le nâinupanghai a nei intam ual tâka.

¹⁴Jerusalema a nâi neihai chu Samua, Sobaba, Nathana, Solomona,

¹⁵Ibara, Elisua, Nefega, Jafia,

¹⁶Elisama, Eliada le Elifeleta hai an ni.

¹⁷Filistia mihaiin Davida kha Israel mihai rêng hrangin sahriak an irthutir ti an hriatin chu an sipai murdi kha Davida chel hrangin an irthoka. Davida khan a len hriata, kulpuia a lei zu fea.

¹⁸Filistia mihai kha Refaim phâizôl an hong tunga, kha khan an irzara.

¹⁹Davida khan, “Filistia mihai doi hrangin ki ife hrang mo?,” tiin RENGPA a chongpuia. RENGPA khan Davida kuang, “Doi ro, Filistia mihai chu ni kuta nang ki ipêk ngêt hrang a ni,” a tia.

²⁰Khanchu Davida kha Baal-perazim-ah a fea, kha khan Davida’n Filistia mihai chu an hnê tâka. “RENGPA’N ki râlhai chu tui tial sai ang dôrin ki makunga an chê zoi tâka,” a tia. Khasikin kha hmun irhming hranga khan Baal-perazim a iti a ni ta.

²¹Filistia mihaiin laizâm an tho lai khan an millimhai an mâksana; Davida le a mihai khan an lâkpai tâka.

²²Kha hnung chu Filistia mihai kha an fe nôka, Refaim phâizôla an irzar nôka.

²³Davida’n RENGPA a hong chongpui nôka, ama khan, “Hitaka irthokin chu doi no ro; an hnung tiang fe’n lân irhualhai ro, thingtheimu kung irdîna khin hong doihai roh.

²⁴Thingtheimu kung rêla lui irhâi nin hriat tena châng ro! Filistia sipaihai doi hrangin ni matona keima RENGPA ki suak ta tihna ni a ti,” a tia.

²⁵Khan, RENGPA’N thu a ipêk angin Davida khan a thoa, Filistia mihai chu Geba-a irthokin Gezer dênin an irzûlhai tâka.