Read Hrangkhol 1 RÊNGHAI 1 Bible Online

1 RÊNGHAI 1 - Hrangkhol bible

1 RÊNGHAI 1

¹Davida chu a hong ulianin a sân a tar tâka, puanlum an insiltir khomin a lum inhre thei ta maka.

²A siahlohaiin a kuang khan, “Ka pu ni kôla oma, nang a enkol hrangin dôngmate nang zong pe kin ti. Ama khan ni kôla nang zâl pe a ta, khan kêng lum takin ni izâl thei hrang,” an tia.

³Khanchu, Israel ram pumpuia dôngmate hmêl sa an zonga. Sunam mi, Abisagi an va hmua, rêng kuang khan an hong hruai ta.

⁴Khanu kha dôngmate hmêl satak a nia, rêng kha a enkol ta, a kôla ompuiin, khannisianlân, rêng khan ite irpôlpui ma.

⁵Hagithi le Davida nâipa Adonija chu rêng nâi la damhai laia a lutîr tak a ni sikin rêng chang hrangin a lei irsabeia; tâli le sakor chung chuang thei le ama hrung hrang mi sômringa a len thanghai vinga.

⁶A pa lakin, “Itho mo hianga ni irsiam irsak hi” lei ti pe ngai maka. Ruatharte hmêl satak Absaloma hnuai renga mi a ni.

⁷Adonija’n chu Zeruii nâipa Joaba le ochai Abiathara hai vai a lei hrilhaia. Ama sanin an lei changpui ngaia.

⁸Ochai Zadoka, Jehoiada nâipa Benaia, deipu Nathana, Simeia, Reia le mi hâitak Davida enkoltuhaiin chu Adonija kha zui nuam mahaia.

⁹Adonija khan Enrogel kôla khan Zebelet lungpui kôla khan irbôlna belra le sehrâtchal a martak tak a lei inhlan tâka. A urêng rêng nâi murdihai le Judai ram rêng inzakomhai a bukkhômhaia.

¹⁰Deipu Nathana, Benaia, mihai rêng enkoltuhai le a sangpa Solomona chu koihai maka.

¹¹Nathana’n chu Solomona nu Batsebi kuang khan, “Hagithi nâipa Adonija hi kin pu Davida inhre loiin rêng a chang tah ti lan hre mak che mo?

¹²Atûn hin ni zôk theina hrang le ni nâipa Solomona zôkna hrang lam nang hril ki ti.

¹³Reng Davida kuang va lûtin lan, a kuang ‘O rêng inthang, ka pu, ni siahlo kuang hin, Solomona hi ki’rthûla rêng hrang chu a ni, ki rêng toihmun lua a ti, ni iti mo ni ma? itin tâk mo Adonija te rêng a ichang tâk hi te? va ti ro,’ a tia.

¹⁴Reng chu ni chongpui lai takin hong lût ki ta, ni ihril murdi thopin nang san ki ti,” tiin a hrila.

¹⁵Batsebi chu rêng omna hmuna a va fea, rêng chu a sân a tar tâka, Sunam mi Abisagi leh an lei oma.

¹⁶Batsebi khan rêng chu khûksadelin chubai a mûka, rêngin chu “Imo ni indit ti ro,?” a lei tia.

¹⁷Ama khan, “Ka pu ni suaknu kuang hin RENGPA ni Pathian irhming sâmin, ni nâipa Solomona hi ki’rthûlin rêng chang a ta, ki rêngtoihmun lua a ti, tia ni inkung a nia.

¹⁸Khannisianlân, Adonija kêng rêng a ini ta, nang ka pu lakin inhre mak chea,

¹⁹sehrâtchal le sa a mar saihai thatin, rêng nâipahai le ochai Abiathara le sipai ulian Joaba hai a koihaia, ni siahlo Solomona chu koi loiin a thoa,

²⁰ka pu Israelhai hin rêngtoihmuna tu mo ni intoitir hrang ti an inghâk mai a ni.

²¹Hi thu hi nin fel no’n chu, ka pu kei le ki nâipa Solomona chu ni thi zoiin chu dohasa kêng kin irhlo hrang,” a tia.

²²Khaanga rêng a chongpui lai takin deipu Nathana kha a hong lûta.

²³Deipu Nathana khom a hong tiin rêng kha an hrila. rêng kôla khan kûnin a hmâi hnuai enin chubai a mûka.

²⁴Nathana khan, “Ka pu rêng inthangtak hin Adonija chu ki’rthûlin rêng chang a ta, ki rêngtoihmun lua a tih ni lei iti ma ni?

²⁵A vuan hin ar siamin sehrâtchal tamtak le belra mar saihai thatin, rêng nâihai le sipai ulianhai le ochai Abiathara hai a koi bûmhaia, atûn son an fâkin an inêk a ni so, rêng Adonija dam sôt ri se tiin an ikhêk a ni.

²⁶Kei ni siahlo hi ochai Zadoka, Jehoiada nâipa Benaia le ni siahlo Solomona hai chu nin hril mahai.

²⁷Hihai hi ka pu rêng inthangtak iti a ni lele’n chu, ka pu hi a thi zoi le a rêngtoihmun lua hrangin a siahlohai hi a ihril nuam loi a ni hi tena?” a tia.

²⁸Reng Davida’n, “Batsebi kha hong koi roi,” a tia. Reng kôla khan a va lûta, a kôla a ngîra.

²⁹Reng khan hiang hin a hrila, “Chardongna tinrêng ata nin zôk ngaitu RENGPA irhming sâmin ni kuanga ki inkung tâk chu thangsua ngêt ngêt ki ti.

³⁰Ni nâipa Solomona chu keima irthûlin inlal a ta, ki rêngtoihmun hi lua a ti,” a tia.

³¹Batsebi chu a hmâi hnuai enin rêng chu chubai a mûka, “Ka pu, rêng Davida chu dam sôt ri se,” a tia.

³²Khan, rêng Davida khan, “Deipu Zadoka hai, deipu Nathana hai, Jehoiada nâipa Benaia hai ni hong koi pe roi,” a tia. Khan, anni chu rêng kuang an va fe tâka.

³³Reng kôla khan an honga, rêng khan an kuang, “Mi lianhai hruai unglân, ki nâipa Solomona kha ki sakuartung chunga inchuangtir unglân, Gihon-a hruai sa roi.

³⁴Ama khan ochai Zadoka le deipu Nathana haiin Israelhai rêng hrangin sahriak pol ri sehai. Bekul tum unglân, ‘Reng Solomona chu dam sôt ri se,’ tiin khêk roi.

³⁵Ama chu irzôn unglân, ki rêngtoihmuna toi sianlân, ki’rthûlin inlal ri se. Ama hi Israel le Judai ram sûnga roirêltu hrangin ki inkung a ni,” a tia.

³⁶Jehoiada nâipa Benai khan, “Amen, ka pu, ni Pathian RENGPA’N namindet ri se.

³⁷RENGPA chu, ka pu inlaltak kuang a iom ngai angin Solomona kuang khom om sianlân; ka pu rêng Davida rêngtoihmun nêkin a rêngtoihmun chu indet ual sianlân,” a tia.

³⁸Ochai Zadoka, deipu Nathana, Jehoiada nâipa Benaia, Kret mihai le Pelet nuhai chu an fea, Solomona chu Davida sakuartung chunga an inchuangtira, Gihon hmuna an hruaia.

³⁹Ochai Zadoka’n hmun irthianga sahriak siana ûm a lâka, Solomona chu a pola. Bekul an tuma, mi murdi’n, “Reng Solomona dam sôt ri se,” an tia.

⁴⁰Mipui murdi’n ama chu an zuia, theihlehai tumin a sate’n raiinfân takin an oma, an irhâi chu hnuai intor diaiin an om a ni.

⁴¹Adonija le a ibûmhai murdi chu ruai an inthe zoiin chu, an irhâi kha an in hriata, bekul irhâi an inhriatin chu Joaba’n, “Khopui sûnga an irhâi inring dur dur chu imo a omzia a ini tâk?” a tia.

⁴²Kha thu a hril lâi takin ochai Abiathara nâipa Jonathana a hong tunga, Adonija’n, “Hong vak hi ro,” “Nang chu ruatharte fel tak ni nia, thurchi lômom hon hriat le nir hoi?” a lei ti pea.

⁴³Jonathana khan, “Ite ual hon hre ma ung, ei pu Davida’n chu Solomona kha rêng an changtir ta.

⁴⁴Rengin ochai Zadoka deipu Nathana, Jehoiada nâipa Benaia, Kret mihai, Pelet mihai chu ama hrung hrangin a tîrhai. Ama chu rêng sakuartung chunga an inchuangtir ta.

⁴⁵Ochai Zadoka le deipu Nathana’n chu Gihon-a khan rêng hrangin sahriak an pola, khatak ata raifân takin an hong kîr nôka, an irhâi khopui intorin a oma.

⁴⁶Solomona chu rêngtoihmun luain a om ta.

⁴⁷Mi lianhai khom an honga, ei pu Davida kuang khan, ‘Ni Pathian khan Solomona chu nangma nêkin roiinpuitir sianlân, nin rêngtoihmun khom nangma nêkin inlal ual ri se,’ tiin an lômpuia.

⁴⁸Reng khom khan a zâlhmun rengata lômpuina chubai a mûka, ‘RENGPA Israelhai Pathian, a vuana ki rêngtoihmun ki’rthûla nir hmutirtu chu inpâkin om ri se,’ tiin lômthu a ihril a ni,” a tia.

⁴⁹Kha tena chu Adonija le a mi fialhai khan an chia, an intânsan zoi ta.

⁵⁰Adonija khan Solomona kha a ngîkin a chi tâka, a thoia maichâm irkî chelin a om ta.

⁵¹Solomona kuang khan, “Reng Solomona a siahlo khandaia that loi hrangin thu inkung sianlân, a ti,” tiin Solomona chu an va hrila.

⁵²Ama’n chu “Iamom takin a omin chu a sam malkhat khom tôn viat no ning. A sualna hmu dok a ni’n chu thi a ti,” a tia.

⁵³Reng Solomona’n mi a tîra, maichâm ata an va hruai suaka, Adonija chu a honga, rêng Solomona chu kûnin chubai a mûka, “Ama’n chu, ni in tiang va fe ta ro,” a tia.