Read Hrangkhol 1 RÊNGHAI 10 Bible Online

1 RÊNGHAI 10 - Hrangkhol bible

1 RÊNGHAI 10

¹Seba rêngnu’n Solomona irhming inthang thu an hriata, thu’ntakhai irdon infel hrangin Jerusalema a honga.

²Hnung zuitu tamtak neiin, saringsei tamtak a hruaihai saa, lung mantam Mosola le rângachak hai chôiin, Solomona le an irhmua, a irdon nuam murdi ar dona,

³A irdon murdi Solomona’n a hril pe thei vinga; ite intak ti viat reng nei maka.

⁴Seba rêngnu khan Solomona vâr dân kha a hmua, a in sin hoitak khom a hmua.

⁵Solomona fâk zong an irfûk pe dân hai, a siahlohai omna inhai, rêng sinthotuhai sin irzêk dân hai, an tukfam sa lam dânhai, a enkoltu hai tukfam sa lam, tempila hâlirvôm thilinhlan a inei intam lamhai a hmu’n chu, a’rkhêl tiin a enhaia, a mit insim loi rakin.

⁶Rengnu khan Solomona kuang, “Ni sinthohai le ni vâr lamhai kin ram ata ki inhriat hi a dik a ni.

⁷Ki honga, ki mitin ki hmu mân chu lei iam thei ngai ma unga, khannisian, ni vârna le nir chong lamhai hi a chimrip lua an insîr loi kêng a lei ini, an insîrhai nêka roiinpui a ni.

⁸Ni dôngmahai chu râlvân satak an ni! ni siahlo ni kôla sinthotuhai khom hi râlvân satak an lei ini! pial a ni,

⁹ni Pathian RENGPA chu inpâkin om ri se, ama chu ni chunga hin a lôma, Israelhai rêngin nang a isiam a ni. Ni Pathianin Israelhai lung a thunga, dik taka an chunga roirêltu hrangin, nang a indit a ni hi,” a tia.

¹⁰Thilpêk hranga a ichôi chu a pêka, rângachak her sângminli vêl, mosola tamtak, le lung mantam tamtak tak a pêk sa a ni. Mosola thil mirimhoi itiklai khom kha dôra tam a la iman ngai loi,

¹¹Hirama irhming hai, Ofir ram ata rângachak zuang pêltuhaiin Almug thing le lung mantam tamtak an zuang chôi sa.

¹²Reng khan kha thinghai kha RENGPA tempil le rêng in irkulna’n a hmanga, hlasak inhoitirna perkhuang le a danghai sinna’n an hmanga, khaang dôra tam Almug thing Israel rama lâklût la ni ngai maka, a hmu khom la hmu ngai mah.

¹³Reng Solomona’n Seba rêngnu chu a izong murdi a pêka, khakhêla, a thil zuang chôi nêka tam a pêk a ni. Khanchu, a zuituhai leh khan an ram tiang an kîr nôk ta.

¹⁴Solomona’n a kum tin rângachak her sîngthum le sângthum a hmu ngaia.

¹⁵Irvai mihai le dukan thotuhaiin an tho manhai an pêk ngaia, Arabia rênghai le Israel rama bial tina ram optuhaiin an pêk saa.

¹⁶Solomona’n pho lianpa hai, rângachak siana khêng irzahni a siama, pho inkhat sinna khan rângachak her sari a hmang a ni.

¹⁷Pho chîn ualhai chu rângachak her hni vêl polin a inluan sa ngai a ni, phohai chu Lebanon roiinpui an iti sûnga khan an siaa, rângachak inluan saiin.

¹⁸Reng toihmun irthiang chu sâiha leh siam a nia, rângachaka inluan a ni.

¹⁹Rengtoihmun a luina leidâk khuat ruk neiin a siama, tûkbân neiin, leidâk sîr tiang khan kâmkeibaknei irlim an ngîrtira,

²⁰sômkhat inhninaa rêngtoihmun hnung tiang khan, sehrâtchal lu irlim a oma, a sîr tianghai khan kâmkeibaknei irlim a om sa, khaang dôra rêng toihmun hoi le roiinpui chu kho rama khom la om ngai mah.

²¹Solomona khilâthai chu rângachak inzen a ni, Lebanon rampui an iti in sûnga an fâk zongna bêlbûrhai khom rângachaka siam ving a ni. Solomona zoro lai khan chu sumruhai hi inhlu rak maka, a hmangna khom om rak mah.

²²Irkuang a neihaia, rêng Hirama irkuanghai leh khan an irkopa, Tarsis tianga fein, kum thum zoia an hong kîr ngaia, rângachak hai, sumru hai, sâiha le zôngte hai le vahrohai an irkat ngai a ni.

²³Reng Solomona chu rêng danghai nêkin ar chonga, a vâr khom a ivâr ual a ni.

²⁴Pathianin a kuang vârna a ipêk kha irchu hrangin ram tina mihaiin an hong ipan ngai a ni.

²⁵A kuanga hong murdihaiin sumru le rângachaka siam, puan mani, râl doina neinun, mosola, sakor, le sakor puak pêl theihai an hong ipêk ngai a ni. Hiang hin a kum tin an ipêk ngai a ni.

²⁶Solomona’n sakor tâli sângkhat irzaminli le sakor chung chuang thei sîngkhat sânghni a neia. Senkhat chu Jerusalema a siaa, a danghai chu khopui hmun da danga a siahaia,

²⁷An lal sûng chu sumru chu lungtehret anga tamin Jerusalema khan a tama. Sidar thing khom mual puia bit angin a bit khak a ni.

²⁸Rengin mi a idônhai khan Musri le Kue ata sakor an thon suaka;

²⁹Aigupta rama sakor tâli an thon sa. Hit mi le Suria rênghai kuang sakor tâli inkhatin sumru irzaruk le sakor inkhatin sumru irzakhat sômringa’n an izuar a ni.