Read Hrangkhol 1 RÊNGHAI 11 Bible Online

1 RÊNGHAI 11 - Hrangkhol bible

1 RÊNGHAI 11

¹Solomona’n Faroa nâinu dok ni loiin nam dang dôngmatehai lung ar thungpuihaia, dôngma hrangin Moab mi, Amon mi, Edom mi, Sidon mi le Hit mihai dôngma’n a neihaia.

²RENGPA khan Israelhai kuang, “Nam dang dôngmatehai dôngma’n neihai no roi, an pathianhai zuipuihai sa nin ti,” a ti inhriat chakin a neihaia.

³Solomona’n rêng nâi irzasari dôngma’n a neia, lâksîr irzathum a neihai sa, a dôngmahaiin an ihruai insual tâk a ni.

⁴A hong tar hnungin chu, a dôngmahaiin an pathian biak hrangin an ihruai tâk a ni, a pa Davida ang khan RENGPA a Pathian mit tung thei ta maka.

⁵Sidon mihai pathiannu Asterothi le Amon mihai pathian intirom tak Milkoma chu a izui a ni ta.

⁶Solomona’n RENGPA mithmuin thil saloi a thoa, a pa Davida ang khan iamom loiin a oma.

⁷Jerusalem nisua tianga Moab mihai pathian intirom tak Khemosa biakna hmun a siama, Amon mihai pathian intirom tak Milkoma biakna khom a siam saa.

⁸Nam dang mi a inei, a dôngmahai pathian kuang mirimhoi hâlna le irbôlna hmunhai a siam pehaia.

⁹RENGPA Israelhai Pathian chu a kuang khan voihni vêl an lâr pea, nam danghai pathian biak loi hrangin a ti pe khoma,

¹⁰Solomona’n RENGPA thu irngai maka, Pathian ar heisan ta,

¹¹RENGPA chu Solomona chunga a sate’n a ning an mura, a kuang, “Nangma leh ei thuthung chu êsêl takin nin siata, ki thupêkhai zôm ta mak chea, khasikin ram chu nang sutpai nôk ki ta, ni mihai laia mi inkhat kuang pe ni ta a tih ti nang ki hril.

¹²Khannisianlân, ni pa Davida zârin ni dam sûng chu ni no nia, ni nâipa roirêl sûngin kha thil kha chu inlangtir ki ti.

¹³Ram pumpui nang sut zit no ninga, ki siahlo Davida le ki ta hranga ki inding Jerusalem sikin nam inkhat chu la chang a ti,” a tia.

¹⁴RENGPA khan Solomona doi hrangin Edom rêng irchia mi Hadada chu an phûta;

¹⁵matona khan Davida le Edom mihai an irdoia, Davida sipai ulian Joaba chu an mi thathai phûm hrangin a hong fea.

¹⁶Joaba le a sipaihai chu Edom rama tha ruk an oma, kha hmuna an om sûngin pasal murdi chu an thathai vinga.

¹⁷Hadada chu a pa siahlohai leh Aigupta rama an rota, nâipangte a la ni sikin.

¹⁸Midian ram an suaksana, Paran-ah an fea, mi senkhatin an zuia, Aigupta-a an oma, rêngin an omna hrang ram, in le loi fâk le nêk hrang a pêkhaia.

¹⁹Hadada chu rêngin a tûng zoi sikin rêngnu Tahpenesi urêngnu chu Aigupta rêngin dôngma’n an neitira.

²⁰A dôngma khan nâipasal Genubata a neipuia, rêng nâi danghai angin rêngnu khan a enkola.

²¹Davida thi thurchi le sipai ulian Joaba thi thu Hadada’n Aigupta ram ata a len hriata, rêng kuang khan, “Kin rama nin fetir nôk ta ro,” a tia.

²²Reng khan, “Imo ni iti na?” “Imo a’rsam ti ni inhriat, nin rama fe ni irzuk,” a tia. Hadada’n, “Ite ual chu irsamna nei ma ung; Khannisian, nin fetir ta hi ro,” a tia. Edom rêng Hadada chu Israelhai râl inhnê intak tak a hong ni ta.

²³Pathianin Eliada nâipa Rezona chu Solomona an hmumâktira, Rezona chu a pa Hadadezera, Zoba rêng kuang ata a rota.

²⁴Irhel pôlhai hruaitu a chang tâka, hi hi Davida’n Hadadezera an hnêa, a râlhai le a mihai chu an suaka, Damaska khuaa an oma, a zuituhai khan Suria ram rêng hrangin an inkunga,

²⁵Solomona dam sûng chu Israelhai râl a ichang a ni ta.

²⁶Solomona doitu mi dang inkhat chu a hnungzui laia mi Jeroboama, Nahata nâipa, Efraima ram Israel khua mi, a nu chu Zeruii, meithâi a ni.

²⁷A tehelzong lam chu hiang hin a ni, Solomona’n Jerusalem nisua tiang ram a lua inbita, kulhai a siam insata,

²⁸Jeroboama chu ruatharte feltak le takirtâi tak a nih ti inhriatin Manasea bial le Efraima bial sûnga sinthotuhai enkol hrangin a hmanga.

²⁹Sûn khat chu Jerusalem ata Jeroboama chu a honga, Silo khua ata hong deipu Ahija le ram hnuaia an irtoka.

³⁰Ahija’n a songkol irfual a khek pea, Jeroboama kuang inhni inchangin ar ekthêr pea,

³¹Jeroboama kuang, “Thêr sôm hi nangin la ro; RENGPA Israelhai Pathianin hiang hin a ti. Irngai ro, Solomona ram hi sutpai ki ta, nam sômhai hi, nangma nang pe ki ti.

³²Ki siahlo Davida zârin Israel ram pumpui ki ta hrang bîka ki inhlan, Jerusalem sikin nam inkhat chu chang ri se.

³³Ama’n chu Sidon mihai pathiannu Asterothi hai, Moab mi pathian Khemosa, Amon mi pathian Milkoma hai zômin, ki lampuia irlôiin, le ki mihai mithmua thil dik a tho no sikin,

³⁴khannisian Solomona chu ram pumpui chu sut ving no ninga, ki siahlo Davida ki inthang le ki dân thupêkhai zômtu sikin a dam sûng chu inlaltir ki ta.

³⁵A nâipa kut rengata ram chu sutpai ni a ti, nam sômkhat nang pe ki ta.

³⁶Nam khat chu a nâipa pe ki ti, an ni biakna hranga ki inthang Jerusalem khuaa Davida irchihaiin roirêl an ti.

³⁷“Nangma rêk chu ram liantak chunga roirêl ni ta, Israelhai rêngin om ni ti.

³⁸Ki siahlo Davida anga, ki thu zôma, ki dân ngîka, ki mithmua satakin ni omin chu ni kuang om mai ki ta, Israelhai rêngin nang phun ki ta; Davida kuanga ki inkung angin, nir chihaiin ni hnunga khom roirêl mai an ti.

³⁹Solomona sualna sikin Davida irchihai chu dengintheitirhai ki ti, kumtuangin chu ni ual no ni,” a tia.

⁴⁰Solomona khan Jeroboama chu that a tum tâka, Jeroboama chu Aigupta rêng Sisaka kuang a rota, Solomona thi mâka chu a iom a ni ta.

⁴¹Solomona thurchi dang, a sin thôna le a vârna thuhai chu Solomona thurchi irziakna bua a chuanga.

⁴²Israel ram pumpuia kum sômminli sûng Jerusalema roi a rêla.

⁴³Solomona chu a thia, a pa Davida khopuia an phûma, a nâipa Rehoboama chu a pa irthûlin an lal nôk ta a ni.