Read Hrangkhol 1 RÊNGHAI 12 Bible Online

1 RÊNGHAI 12 - Hrangkhol bible

1 RÊNGHAI 12

¹Rehoboama chu Sekem khuaa a fea, kha hmuna khan rêng inthang hrangin Israel hmâr tianga omhai an irbukkhôma.

²Nebata nâipa Jeroboama chu Solomona a chi sikin Aigupta rama a rota, a thi ti thu inhriatin a hong nôk tâka.

³Hmâr tianga Israelhai khan an va pana, Rehoboama hai leh an fe suam tâka, a kuang khan,

⁴“Ni pa khan chu a sân a ni hmanga, kin phur a nin riktir pe ok ngaia, nangma’n chu ni ni hmang khomin kin phur nin zâng pe ualin lân, nin khua le tuia om kin ti,” an tia.

⁵Rehoboama khan, “Sûn thum zoia zuang nôk unglân,” a tia. Mipuihai chu an chîn ta.

⁶Reng Rehoboama’n a pa Solomona dam laia a iompui ulianhai ar donhaia, “Hi mihai hi itin mo ki iti pehai hrang?” a tia.

⁷Anni khan, “Hi mihai hi sataka enkol ni nuamin chu, an izong hi satakin donhaiin lân, khanchu ni ta hrangin iamom takin kumtuangin om an tih tiin,” an sâma,

⁸ulianhai ihril kha pom nuam maka, thoithar, ama rualhai ar donhai nôka.

⁹“Hi mihai hi kin phur nin zângtir pe ual ro tihai hi, itin mo ki iti pehai hrang?” a tia.

¹⁰Ama rualhai thoitharhaiin chu, “Hihai hin, ni pa khan kin phur a nin riktir pea, nangma’n nin zângtir pe ual roh tihai hi, hiang hin ti pehai ro; ki kutte khom hi ka pa kong nêkin chu ngar ual a ti.

¹¹Ka pa’n nin phur a inriktir a ni’n chu, keima len vângin chu kha nêka rik nang ni bôk pe nôk ki ti. Hmolin nangni a vîkin chu, keima’n chu, sakor isep angin nin chunga chuangin nangni sep ki ti,” ti roh an ti pea.

¹²Sûn thum zoia chu Jeroboama le Israel mihai chu Rehoboama iti angin an hong pan nôka.

¹³Reng khan ulianhai iti pe chu zôm nuam maka, kha mihai kha henhrum takin a le’rkôkhaia.

¹⁴A rualhai iti ang khan, kha mihai kuang khan, “Ka pa khan nin phur a inriktir ok a ni mo? keiin chu nangni bôk pe sa ki ti, hmolin nangni a vîka, keiin chu sakor isep chung chuang irchu angin nangni soisak ki ti,” a tia.

¹⁵Silo khuaa deipu Ahija Nebata nâipa’n Jeroboama kuanga a ihril kha a tak a chang theina hrangin RENGPA khan a intitir a ni. Hi sika hin kêng rêngin mipuihai kha a idonhai nuam loi.

¹⁶Israel mihai khan rêngin an thu irngai pehai mah ti an inhriatin chu rêng kha an irdona. “Davida rama imo kin dongtum hrang? Jesaia irchihai laia imo kin dongtum nei hrang? Davida irchihai chu an om balamin om ri sehai,” an tia. Israel mihaiin chu an in tiang an rotsana.

¹⁷Judai rama Israel mi omhai chunga vai Rehoboama chu an lal tâka.

¹⁸Reng Rehoboama chu sintho hranga a ihmanghai hruaitu Adonirama chu Israelhai koi hrangin a tîra. Ama chu lung leh an lei dêng that ti an hriatin chu Rehoboama chu a tâlia a chuanga, Jerusalem tianga intânin a fea.

¹⁹Kha tena chu hmâr tiang rama om Israel mihai chu Davida irchihai lai ata atûn ten hin tehel an izong tâk a ni.

²⁰Israel mihaiin, Jeroboama chu Aigupta ram ata a hong ti an inhriatin chu, an irbukkhômna ngaia an koia ama chu Israelhai rêng hrangin an siam ta. Juda namhai vai kêng Davida tianga om an ni ta.

²¹Reng Rehoboama Jerusalem a tungin chu, Benjamina mi le Juda mihai laia sipai hrâttak takhai nuaikhat sîngriat (1,80,000) a bukhaia. Hmâr tianga om Israelhai chu ama hnuaia om hranga doi hrangin ar siampuihaia.

²²Khannisian, Pathian mi Simeia kuang khan, RENGPA thu a zuang tunga.

²³Juda rêng Solomona nâipa Rehoboama kuang khan, Juda nam pumpui le Benjamina namhai le mi dang omhai kuang,

²⁴“RENGPA’N hiang hin a ti, nin urêng Israelhai chu doi no roi, nin rêngin rot nôk ving roi, an sintho hi keima itho kêng a ni, tiin a hril,” an tia. Khaang khan RENGPA thupêk zômin an mâni in tiang an kîr nôk ving ta.

²⁵Israel rêng Jeroboama’n Efraima tâng rama Sekem khua kha irkulin, zoro sôtnote a oma. A suak nôka, Penuel khua chu a’rkul nôka.

²⁶Jeroboama’n chu, “Ram hi Davida in sûng mihaiin lua nôk ta ri sehai mani! ti’n an chonga;

²⁷Mihai chu Jerusalema RENGPA kuang irbôlin an fe maia a ni’n chu an pu Rehoboama Juda rêng hong thop an ta, ni thatpaina an ti,” a tia.

²⁸Khaanga thil ar ngaitua zoiin chu, rângachakin sehrâtte irlim inhni a siama, a mihai kuang khan, “Nin ta hrangin Jerusalema fe mai mai nangni an tak pe hrang sikin, hi hi nin Pathian, Aigupta ram ata nangni hruai suak kha a ni hi,” a tia.

²⁹Khan inkhat chu Bethel-a a siaa, inkhat dang chu Dana a siaa.

³⁰Mihaiin Bethel le Dan khuaa fein thil an lei tho’nsual tâka.

³¹Jeroboama’n chu, tâng sîphaia Pathian biakna hmun a siama, Levi irchi khom ni loi, a inunuam ochai hrangin an thanghai tâka.

³²Jeroboama’n chu Judai rama kût an inei ngai angin, tha riatna ni sûn sôm sûn ringa ni sûn chu, kût hmang ni sûn an danga. Bethel maichâma khan, rângachaka siam sehrâtte kutsinhai kuang khan ar bôl tâka. Tâng sîp irbôlna hmuna ochaihai a isia ang khan Bethel-a khan ochaihai a siahaia.

³³A tha riatna sûn sôm sûn ringa ni sûn Israel mipuihai hranga sûn inkung kût ni khan Bethel-a a fea. Maichâma khan irbôlna thil an hlan ta.