Read Hrangkhol 1 RÊNGHAI 18 Bible Online

1 RÊNGHAI 18 - Hrangkhol bible

1 RÊNGHAI 18

¹Kum thum ten khua a châr zoiin chu, “Ahaba kuang fe ro, rua inthotir hrang ki ni a ti, va ti ro,” a tia.

²Elija chu Ahaba kuang a va fea, Samari rama a sate’n châm a tâka,

³Khan, Ahaba’n rêng in enkoltu Obadia a koia, ama hi RENGPA chi mi a nia.

⁴Jezebeli’n RENGPA deipu a that lai khan, Obadia hin deipu irzakhat a hruaia, pâl hnia zêkin sômringa ngain rôla a thuphaia, bu le tui a pêkhaia.

⁵Ahaba’n Obadia kuang khan, “Tho vadung murdi chaiin tui la va zong rei ba, sakor le saringseihai hi ei saninhringhai theina hrangin hloisûl sana va zong ei ti; khano’nchu, ei sialhai hi ei inchânhai zoi hrang kêng,” a tia.

⁶Khanchu an fena hrang ram chu an irzêka, Ahaba le Obadia chu mual da danga an fe tâka.

⁷Obadia chu a fe maia, lampuia khan Elija a’rtongpui thuta, Obadia hin ama hi a len hriat ngaia, kûnin chubai a mûka, a kuang khan, “Ka pu Elija, nang mo ni ini?” a tia.

⁸Ama khan “O keima ki ni, fe’n lân ni pu kuang Elija hin a om va ti ro,” a tia.

⁹Khan Obadia’n, “Imo ki itho insual tâk, ni siahlo hin thi hranga Ahaba kuanga pêk ni itum?

¹⁰RENGPA ni Pathian hring sâmin nang ki hril, ka pu’n ramhai hi mi murdi’n an zong lai tak a ni. Hi hin om mah titu chu rêng in hmu ngai mahai a nih ti felna hrangin khomâk a irsâmtirhai ngai a ni.

¹¹Nangma rêkin chu, ka pu kuang fe’n lân, Elija kha hin kêng a om ti thu va hril hranga ni ni iti,” a tia.

¹²Nang ki rotsan zoi le hin, RENGPA irtha hin ki inhriat loina tiang nang hruai a ta, Ahaba ki va hrila, nang a hmu nôk no’n chu a ni ithatpai hrang kêng. Khannisian kei ni siahlo hi ki thoibop ata RENGPA biaktu kêng ki ni.

¹³Ka pu hin Jezebeli’n, “RENGPA deipu a thathai laia ki sintho kha ni inhriat loi ma ni? RENGPA deipu irzakhat pâl hnia zêkin rôla ki thuphaia, bu le tui ki pêk ngai a ni.

¹⁴Atûn ka pu kuanga fea, Elija hin a om, ti thu va hril hranga ni ni iti hi chu a ni lei ithat nuam hrang a ni,” a tia.

¹⁵Elija khan, “A sin ki itho ngai RENGPA itinrêng chunga rêng mihringhai zârin a vuan hin Ahaba kuang kin inlang ngêt hrang a ni,” a tia.

¹⁶Obadia chu Ahaba irhmupui hrangin a fea, a va hrila, Ahaba chu deipu Elija irhmupui hrangin a fe nôka.

¹⁷Ahaba’n Elija a hmu’n chu a kuang, “Israel ram inbuaituhai mo ni lei iom?” a tia.

¹⁸Elija’n, “Israelhai inbuai ngai ma ung, nangma le ni pa kêng an buaihai ngai nin ni. RENGPA thupêk zôm loiin, Baal kêng nin ibiak.

¹⁹Khasikin, Israel mi murdi ni hmupui hrangin Karmel tânga koihai ro; Baal deipu irzaminli sômringa le Asera deipu irzaminli Jezebeli infâhai kha hong hruaihai ro,” a tia.

²⁰Ahaba khan Israel ram murdia thang an theia, Baal deipuhai chu Karmel tânga a koihaia.

²¹Elija chu mipui lai ata a ngîra, an kuang, “Sirirkain i dôr ten mo nin iom hrang? RENGPA hi Pathian nin iti a ni’n chu biak unglân, Baal nin biakin chu biak sabak roi,” a tia. Mipuihai chu an ngûi chit tâka.

²²Elija’n mipuihai kuang, “RENGPA deipu la dam sun ki nia, Baal deipuhai chu irzaminli sômringa an la ni.

²³Sechal inhni hong kai unglân, inkhat chu Baal deipuhai hrangin thathai sianlân; inchârin thing chunga sehai sian, hâl no ri sehai. Sechal dang chu keima’n sinsiam ki ta, thing chunga sia ki ta hâl ual no ning.

²⁴Nangni Baal deipuhaiin nin pathian koi nin ta, kei khom RENGPA koi ki ta, mei ikâng masa tak chu Pathian dik ni a ti,” a tia. Mipuihai khan, “O, khaang khan ni ri se,” an tia.

²⁵Elija’n Baal deipuhai kuang khan, “Nangni nin tam ual sikin sechal hi sinsiam bak unglân nin pathian koi roi, a hâl chu hâl no roi,” a tia.

²⁶Khan, anni hranga sechal chu an lâka, an sinsiama, “O Baal ni zuang sâm ta ro,” tiin zîng ata sûn sôtin an khêka, an maichâm siam chu namhrualin an khêka. Khannisianlân, ite sâmhai maka.

²⁷Sûna chu Elija’n innuipumin, “khêk ual roi ba, Pathian a ini loi ma ni? a la insâp mani ramfe itin ma ni, aninole khual a inzin ma ni! a in irnghil mani, kaithoi roi ba,” a tia.

²⁸An khêk inring ual uala, an lei itho lam angin, chemte le ufeiin thisen suak rarakin an irvit phopa.

²⁹Misa kôlkai dênin irbôlna hmuna khêkin, tûte a sâmtu om loiin, ite irhâi inhriat hrang om loiin an oma.

³⁰Elija’n mipuihai kuang khan, “Hong nâi ual hi roi,” a tia. Mipuihaiin an va nâia, RENGPA maichâm chiam remrum chu a siam insa nôka.

³¹RENGPA nir hming chu Israel ti an tih tia Jakoba nâi sômhleihnihai hrang bîka lung sômhleihni chu Elija’n a lâka.

³²Kha lung leh khan RENGPA hrangin maichâm a siama. Maichâm kôla khan khur a choia, tui litar sômkhat minli keng thei a nia.

³³Maichâm chunga khan thingher a siaa. Mipuihai kuang khan, “Sehrâtchal kha thatin thing chunga khan se unglân, Bêl minli vêl tui thun inbit unglân, hâlirvôm thilinhlan le thinghai hi buakkhum roi,” a tia.

³⁴An buakkhum vinga, voithum rak an buak irzo zoiin chu,

³⁵maichâm kôla tui siana a ichoi khom kha an buak irzo vinga.

³⁶Khohloi irbôlna zoroa chu deipu Elija’n maichâm chu a hong nâia, a chongchaia, “O RENGPA Abrahama, Isaka le Jakoba Pathian, Israelhai Pathian ni ni le ni thupêkin hi thil ki ini le ni loi atûn hin târinlang roh.

³⁷O RENGPA ki chongchaina irngaiin lân, ni sâm ro! khanchu hi mihai hin RENGPA Pathian chu ni nih ti an inhriat theina hrang le irletin nangma tiang an hong kîr theina hrangin,” a tia.

³⁸RENGPA’N mei a zuang tîra, hâlirvôm thilinhlanhai le thing le lunghai chu a kâng irvôm vinga, irnêng khom sen vungin a kânga, khura tui khom an dôp inhekpaia.

³⁹Mipuihaiin kha thil kha an hmu’n chu irnênga an khûksadela, “RENGPA hi Pathian chu a ni, RENGPA hi Pathian tak lele chu a ni hi te,” tiin an khêk suak tâka.

⁴⁰Elija’n mipuihai kuang khan, “Baal deipuhai tûte insuahai loiin chelpaihai ving roi,” a tia. An chelhaia, Elija’n Kison phâiruama a hruaihaia, khataka khan an thathai ving ta.

⁴¹Elija’n Ahaba kuang, “Tho atûn chu fâkin in ta ro, rua zuang tho hrang a ni ta,” a tia.

⁴²Ahaba chu fâk nêk zong hrangin a fea. Elija chu Karmel tâng sîp panin a fea, hnuai tiang kûnin, ar khûk le ar khûk kâra a lu a siaa.

⁴³Khan a siahlo kuanga khan, “Fe suakin lân, tuikhanglian tiang thîr ro,” a tia. Khanchu a thoia, a hei thîr vêla; ite hmu ma ung a tia. Elija’n khaanga tho hrangin voisari vêl a tîra.

⁴⁴Voisari changna tena chu a siahlo khan, “Tuikhanglian rengata kuttum tiata sûm a hong so,” a tia. Elija’n a siahlo kuang khan, “Fe’n lân, Ahaba chu a tâli sinsiam lat sian suak lat hrangin va hril ro, ropuiin danna a ti,” a tia.

⁴⁵Sôtloite hnunga chu sûm dum irvân dâpin an langa, phâivua a hong thoa, ropuivânsâng a zuang thoa, Ahaba chu a tâli lâkin a chuanga, Jereel tiang intânin a fe ta.

⁴⁶RENGPA sinthotheina khan Elija chunga a tunga, a songkol irfual chu a kong tiang a khit indeta, Jereel panin Ahaba khêlpaiin a fe ta.