Read Hrangkhol 1 RÊNGHAI 19 Bible Online

1 RÊNGHAI 19 - Hrangkhol bible

1 RÊNGHAI 19

¹Khan Ahaba’n Jezebeli kuang, Elija sintho murdi chu deipuhai khandaia a ithathai thu a hril.

²Jezebeli’n Elija kuang khan, “Deipuhai chunga ni itho angin nangtûk, hiang zoro hin nang ki that no’n chu pathianhaiin an inuam angin ni lo ri sehai, a sate’n deng nin theitir ri sehai,” a tih tia hril hrangin mi a tîrhaia.

³Khan Elija’n a chia, irbîkna a lei zonga, Judai rama Beerseba a hong tunga, a siahlohai a mâkhaia,

⁴ama chu sûn sôtin ramchârna hmuna a oma, thing daihlîm hnuaia a toia, thi hrangin a’rzonga, “Inruk ta ma ung, o RENGPA, ki hringna hi ni lapai pe ro, ki hrangin thi a sa ual ta,” a tia.

⁵Thing hnuaia toiin a in irnghil tâka, vântîrtônin a kaithoia, a kuang khan, “Thoiin lân fa ro,” a tia.

⁶Khanchu a hei en vêla, a luthuna khan baitiam le tuiûm hi a lei oma. Khanchu a fâka, a ina, a zâl nôk tâka.

⁷Khan RENGPA vântirtôn a zuang nôka, a kaithoi nôka, “Thoiin lân fa ro, ni fena hrang lak a la hla zana,” a tia.

⁸Khanchu a thoia a fâkin a ina, fâk a zong sikin a hong hrât uala, Pathian tâng Horeb a tung dênin sûn sômminli le zân sômminli lam a ni.

⁹Kha hmuna rôl inkhata hin riak hrangin a lûta, RENGPA’N a kuang khan, “Elija hi hmuna hin imo ni itho?” a tia.

¹⁰“Itinrênga hin RENGPA tah hrangin sathnem ki’rngaia, khannisianlân, Israelhaiin ni thuthung an zôm no sikin, ni maichâm an insiata, ni deipuhai khom khandaiin an thathaia, keima vai hi a dam sun ki ni tâka, kei khom hi ni that hrangin an ni izong mai a ni,” a tia.

¹¹RENGPA’N a kuang khan, “Hong suakin lân, tâng sîpa hin hongin lân, RENGPA makunga hin hong ngîr ro,” a tia. RENGPA chu a hong nâia, phâivuapui hrât tak a hong thoa, tânghai a chima, lungpuihai a chim remruma; khannisianlân, phâivua kâra khan RENGPA chu om ual mah. Phâivua a chumin chu hnîngnu a hong inhnîng nôka, hnîngnu kâra khom khan RENGPA om ual maka.

¹²Khan hnîngnu a tho zoiin chu mei a hong suaka, kha mei laia khom khan RENGPA chu om maka, mei a hong suak zoiin chu irhâi irnêma chong an hriata.

¹³Elija’n an hriatin chu a songkol irfual leh a hmâi a hîpa, rôl kotbâia hin imo ni itho? a tia.

¹⁴Elija’n, “Itinrêng chunga RENGPA hrang sathnem ki’rngaia, khannisianlân, Israelhaiin ni thuthung zôm loiin, ni maichâmhai an insiata, ni deipuhai an thathaia, kei vai hi a dam sun ki ni tâka, keima khom hi ni that an ni tum a ni,” a tia.

¹⁵RENGPA’N a kuang khan, “Ramchârna tiang khan kîr nôkin lân, Damaska khuaa lût ro, Hazaela kha Suria rêng hrangin sahriak pol roh.

¹⁶Nimsia nâipa Jehua khom kha Israel rêng hrangin sahriak pol roh. Khanchu Abel Mehola khuaa, Safata nâipa Elisa chu ni’rthûla deipu sintho hrangin sahriak pol sa roh.

¹⁷Khan Hazaela khandai ata zôk murdi khom Jehua’n nangni that a ta, Jehua khandaia zôk khom Elisa’n nangni that a ti.

¹⁸Khannisian, Israel rama hin Baal chubai la mûk ngai loi le la tum ngai loi mi sângsari, keima hrang hôi ki ti,” a tia.

¹⁹Elija chu a suaka, Safata nâipa Elisa-hai khan sehrâtchal bop sômkhat inhni âl an lei inkaitirhaia, Elisa’n bop sômkhat inhnihai kha a hôlhaia. Elija’n a va pana, a puansil chu an siltira.

²⁰Khanchu Elisa’n a sialhai chu a mâksanhaia, Elija a zui ta. Elija kuang khan, “Ka nu le ka pa chubai va mûkhai bak ki ta, khanchu nang zui ki ti,” a tia. Elija khan, “Va fe ro, ni chunga ki thil tho kha nin hriat kha te?” a tia.

²¹Elisa chu a hong kîr nôka a sialhai chu a thathaia, a sin thôna rua thinghai chu bu anh suangna’n a hmanga, a hme chu mihai semhaiin an fâka, kha hnung chu Elija zui hrangin a suaka, a sin a itho pe a ni ta.