Read Hrangkhol 1 RÊNGHAI 2 Bible Online

1 RÊNGHAI 2 - Hrangkhol bible

1 RÊNGHAI 2

¹Davida thi hrang zoro a hong nâi tâk sikin a nâipa Solomona chu hiang hin chong a bêa.

²“Mihai ang dênin kei khom ki ithi hrang a ni sikin, puihling takin omin lân, chi viat no roh.

³RENGPA ni Pathianin nang a inphût murdi tho’n lân, a lampui hro ro, a thu’nkung le a thupêkhai, om hrang dân a iti le a thu nan hriattir, Mosia dân bua a irziakhai chu zômin lân; khan ni sintho murdi, ni fena hmun tina, thangsua ni ti.

⁴RENGPA khan, nir chihai khom irdîn takin om an ta, lungrîl le thu takin ki thupêkhai an zômin chu Israel rêngtoihmun hi lua thei mai an ti, tia a lei inkung kha a tak chang a ti.

⁵Zeruii nâipa Joaba hin ki milung a innatir hi inhre mai ro; Israel sipai hruaitu inhni, Nera nâipa Abnera le Jethera nâipa Amasa a that kha. Râl hek hnunga irdoi om anga tho’n thisen phuba an ilâk thu kha, mi dik thisen an insuak hi mo ki ipêk a ni, keima hrangin a sân a intak a ni.

⁶A tho hrang dân chu inhre zel ni ti, tar kûnin dam no ri se.

⁷Gilead mi Barzilaia nâihai chu lung inkhamhaiin lân, ni bu nêkna hmuna bu innetirhai roh. Ni urêngpa Absaloma chi sika laizâm ki tho lai khan, an lungkhamna ki idong a ni.

⁸Khanchu Bahurim khua mi Benjamina irchi, Gera nâipa Simeia hi ni kuanga om a nia; ama hi Mahanaim pana ki fe lai khan deng a ni len theitira; khannisian, Jordan-a ni don hrangin a lei zuanga, ama khan, khandaiin nang that no ning tiin RENGPA irhming lâkin thu ki len kunga.

⁹Khannisianlân, denginthei loiin chu insua no ro, pasal puihling ni nia, a tho hrang lam chu inhria ni ti. A tar tena ni that hrang sikin,” a tia.

¹⁰Davida chu a thia, Davida khopuia an phûma.

¹¹Israelhai chunga kum sômminli an lala, kum sari Hebron-a, kum sômthum inthum Jerusalema.

¹²Solomona chu a pa irthûlin an lal tâka, a ram chu indetin a om ta a ni.

¹³Hagithi nâipa Adonija chu Solomona nu Batsebi kuang a fea, ama khan, “Rual sa pana, ni ni hong ipan chu ma ni?” a tia. Adonija khan, “O rual sa pana nang ki hong ipan chu a ni,” a tia.

¹⁴Ama khan, “Ni kuanga hin hril nuam ki nei” a tia. “Batsebi’n hril ro ba,” a tia.

¹⁵Ama khan, “Ram hi ki ta a lei ni bak tâka, Israelhai murdi’n an rêng enin an ni en ti khom nin hriata; khannisian thil a hong danglam tâka, ram chu ki urêngpa dongtum a hong ni tâka, RENGPA lei irfûktir chu a ni.

¹⁶Atûn chu thil inkhat nang a nghi ki nuam, a sa ni tipui thei hrâm ro,” a tia. Ama khan, “I thil ual mo a ini tâk?” a tia.

¹⁷Adonija khan, “Lungkham takin rêng Solomona ni chongpui pe ro, nangma thu chu hnôl ngam no nia, Sunam mi Abisagi hi dôngma’n nin neitir sianlân,” a tia.

¹⁸Batsebi khan, “A ni, rêng chu nang lei chongpui pe ki ti,” a tia.

¹⁹Batsebi chu Adonija ta hrangin rêng Solomona kuang a fea; rêng chu ama lôm hrangin a lei thoia, kûnin chubai a mûka, a rêngtoihmuna a toi nôka, rêng nu ta hrangin toihmun dang an hong pêka, a chang tiang an toitira.

²⁰Reng nu khan, “Thil chînte nang ki nghi nuama, a sa ni tipui hrâm theiin lân,” a tia. Reng khan, “Imo a ini tâk? ka nu a sa nang tipui ki ti,” a tia.

²¹Ama khan, “Sunam mi Abisagi hi ni urêngpa Adonija dôngma hrangin pe ro,” a tia.

²²Reng Solomona’n a nu kuang, “Itho sika Sunam mi Abisagi hi Adonija ta hranga ni izong pe mo? rêngtoihmun khom hi zong pe sa zelin lân; ka upa a nia, ama hranga, a lei sanhai ochai Abiathara le Zeruii nâipa Joaba ta hrang khomin,” a tia.

²³Reng Solomona’n RENGPA irhming sâmin hiang hin chong ar chama, “Adonija’n chu a thina hrang a izong a ni no’n chu Pathianin a inuam angin a ni lo khoma a satea dengthei khomin a tia.

²⁴Atûn hin RENGPA’N a chonginkung anga ka pa rêngtoihmuna nin toitirtu le nin dettu, kin sûngkua inlalna nin dingtu hringna zârin ki hril, a vuana Adonija hi chu thatpai hrang a ni,” a tia.

²⁵Reng Solomona’n Jehoiada nâipa Benaia chu a tîra, Adonija chu a doia, a thatpai tâka.

²⁶Reng khan, Abiathara kuang, “Ni khua Anathot-a khan rot ta ro, thi mai theia om kêng ni ni: atûn zel chu that la ni ual no chi ni. Ka pa Davida hmâikunga itinrêng RENGPA bôm ni le’rzôn ngai sikin,” a tia.

²⁷Solomona’n Abiathara chu RENGPA ochai a nina sin a pai pea, Elia in sûng mihai chungchâng Silo khuaa RENGPA ihril chu a tak a chang ta.

²⁸Kha thu kha Joaba’n a len hriata, Absaloma tiang a kopna hi, Adonija tianga lei kop ngai a nia, khanchu RENGPA ina a lûta, maichâm irkî chelin a oma.

²⁹Joaba chu RENGPA puan in sûnga a lûta, maichâm kôla a toia, “Fe’n lân, va that ro,” a tia.

³⁰Khanchu a va hrila, ama’n chu, “Ni suak, hi hmuna hin la thi chian rong,” a tia. Benaia’n, Joaba khan hiang hin a ni lei don, itinrêng chu a va hrila.

³¹Reng khan, “A iti ang takin va thatin lân, phûm zel roh. Kei le ka pa in sûng mihai vai Joaba’n mi fel thisen a insuak ata hi kin dik ti an langna hrangin.

³²Ka pa Davida inhre loiin mi inhni a doihaia. RENGPA khan an thisen suakna man tuam ri se. Khan mi inhni, Nera nâipa Abnera, Israel, sipai ulian le Jethera nâipa Amasa Juda sipai ulianpu kha, ama irthûla that le invûng an ini a nia.

³³An thisen suak man chu Joaba le a’rchihai lu chunga kumkhua’n chum mai ri se. Davida le ar chi le a in sûng mi le a rêngtoihmunhai chu RENGPA’N siam insa pe mai ri se,” a tia.

³⁴Jehoiada nâipa Benaia kha a hong fea, Joaba kha ar doipuia, a that ta.

³⁵Rengin Jehoiada nâipa Benaia chu sipai ulian tak hrangin Joaba hmuna a sia tâka, ochai Zadoka chu Abiathara irthûlin an omtir ta.

³⁶Rengin Simeia an koitira, a kuang, “Jerusalema in sinin lân, kha khan omin lân, khô te suak no roh.

³⁷Ni suaka, Kidron phâi nir kânin chu ni thi a nih ti inhre ro; ni thisen mô chu nangma’n pêl ni ti,” a tia.

³⁸Simeia’n rêng kuang khan, “A ni, RENGPA ka pu’n ni iti lam ang takin ni siahlo hin tho ki ti,” a tia. Simeia chu Jerusalema a om chian ta.

³⁹Kum thum zoia chu Simeia siahlohai laia inhni chu Gath khuaa rêng Maaka nâipa Akisa kuang tiang an intâna. Mihaiin Simeia kuang khan, “Ni siahlohai Gath khuaa an om,” tiin an hrila.

⁴⁰Kha rêng khan, Simeia’n a sakuartung a’rsiamtira, a siahlohai zong hrangin Gath khua tiang Akisa kuang an fea. Simeia’n a siahlohai chu Gath khua rengata a hruai kîrhai nôka.

⁴¹Simeia chu Jerusalem ata Gath khuaa a fea, a hong kîr nôk ti thu Solomona an inhrila.

⁴²Reng khan Simeia chu a koia, a kuang khan, “Hmun danga ni suakin chu ni suak ni taka thi ni ti, tiin RENGPA irhming sâmin khomâk nang ki sâm ti nang ki lei ihril pe mo ni ma? kha lai khan chu nang khomin ki kuang, a ni, zôm ki tih ni tia.

⁴³Itho mo RENGPA kuanga ni chonginkung ni izôm loina, thu nang ki ipêk ni izôm loi?,” a tia.

⁴⁴Rengin Simeia kuang khan, “Ka pa Davida chunga ni isualzia lak nin hriat vinga, atûn chu RENGPA’N ni sualna man nang thuan a ti.

⁴⁵Kei chu sat ni vur a ta, Davida rêngtoihmun chu RENGPA makunga det takin ngîr a ti,” a tia.

⁴⁶Rengin Jehoiada nâipa Benaia chu thu a pêka, ama kha a var doipuia, a that ta. Solomona chu det takin an lal mai ta.