Read Hrangkhol 1 RÊNGHAI 20 Bible Online

1 RÊNGHAI 20 - Hrangkhol bible

1 RÊNGHAI 20

¹Suria rêng Benhadada’n a sipaihai a bukkhôma, rêng sômthum inhnihaiin an sakor le tâlihai inhmangtirin tâ an sâna. Samari khua panin an idoihai phut a ni.

²Ama’n khopui sûnga mi a tîra, Israel rêng Ahaba kuang khan,

³“Ni irchongna murdi le nin dôngma le nin nâihai le irpe ta roi,” tiin a ngoa.

⁴Khan Israel rêngin “O rêng inthang ka pu, ni iti angin keima le ki inei murdi hi ni ta a ni,” a tia.

⁵Benhadada’n Ahaba kuang mi a tîr nôka, “Nin sumruhai le rângachak, nin dôngma le nin nâihai leh irpe roi ki ti nâkin,

⁶nangtûk hiang zoro hin ki mihai zuang tîrhai ki ti; ni in le ni mi lian ualhaiin zuang irfang an ta, nin irchonhai nangni la pe an ti,” a tia.

⁷Khanchu Israel rêngin a rama hruaitu murdi a bukkhômhaia, an kuang khan, “Hi mi hin ni that inhek ving a itum a nih ti nin inhriat, ki dôngma, ki nâihai, ki sumru le rângachak a ni nghia, pêk ki lei inkung a ni,” a tia.

⁸Khan hruaituhai le mipuihaiin, “A hê la no’n lân, a izong ite pe no ro,” an tia.

⁹Khanchu Ahaba’n Benhadada kuang mi a tîra, “Reng inthangtak ka pu kha hiang hin va hril ro, ni siahlo hin ni izong masa chu a sa ki tia, khannisian, inhnunga ni izong nôk hi chu nuam ma ung a tia” tiin mi a itîrhai khan an va hrila.

¹⁰Khan Benhadada’n hiang hin a hong hril nôka, “Samari khua irhmangtir chit hrangin ki mi tamtak zuang tîr ki ta, ite inzôk no ni ung. Khaang khan ki tho no tâkin chu, Pathianhaiin an inuam angin ni soisak ri sehai” a tia.

¹¹Khan Israel rêngin, “Sipai hrâthai chu irdoi mân ni loiin, irdoi zoia kêng chong an la irpâk ngai ti va hril roi,” a tia.

¹²Khan Benhada le a rual rêng danghai le an puan ina zu an in laiin, kha thu kha an inhriata, a sipaihai chu khopui doi ta hrangin thu a pêkhaia, an irsiam ta.

¹³Kha laitaka khan, deipu inkhat hi rêng Ahaba kuang a honga, “RENGPA’N hiang hin a ti; hi sipai tamtakhai hi chihai viat no ro, a vuan ni kuta nang pe ki ti; khanchu, RENGPA ki nih ti inhria ni ti,” a hong tia.

¹⁴Khan Ahaba’n “Tu’n mo a ir-ôi hrang?” a tia. Deipu khan, RENGPA’N hiang hin a ti, “Ram dang hruaituhai sipaihai inthangsuakhai khan ir-ôihai an ti,” a tia. Ahaba’n, “Tu’n mo hruai hrang?” a tia. Deipu khan, “Nangma’n,” a tia.

¹⁵Khanchu Ahaba’n ram dang hruaitu hnuaia sipai hrât takhai a koi bukhaia, an rêngin irzahni sômthum an ni, Israel sipaihai khom a koi bukhaia, sângsari an ni.

¹⁶Khan sûna irdoi an phuta Benhadada le a rual danghai rêng sômthum inhnihai chu an puan ina a sân an len ruia.

¹⁷Ram dang hnuaia sipaihaiin an hong panhaia, Benhadada râl vêngtu khan, “Samari khua ata sipai an hong suak ta,” a tia.

¹⁸Khan ama khan, “Irngeina thu hril hranga mo, a ni doi hranga mo an ini, a hringin lei chelpaihai roi,” a tia

¹⁹Ram danga sipai irchunhai khan an doihaia, sipai a zuituhai leh khan,

²⁰mi tukhom an irdîna om chu an thathaia, Suriahai chu an intân tâka. Israelhai khan an irzûlhaia, Suria rêng Benhadada chu a sakor chung chuang zât senkhathai leh an intân suak hrâma.

²¹Israel rêngin a va pana, sakor le tâlihai chu a doia, Suria mihai chu a thathai oka.

²²Khan, rêng Ahaba kuang deipu a honga a kuanga khan, “Fe’n lân sipai intam sa ro, irdîn takin thil irfûkpuihaiin lân, nakum sâla chu Suria rêngin nang doi nôk hrang a ni,” a tia.

²³Khan Suria rêng kuanga a hnung zuihaiin, “Israel Pathian chu tâng ram Pathian a nia, khasika ei inhnê loi a ni, phâizôla doi inlân chu inhnêhai ei ti,” an tia.

²⁴“Reng sômthum inhnihai kha an thuneina sutpaihaiin lân, an irthûl hrang mi dang pehai roh.

²⁵Khanchu sipai ni lei inchân ang dôr chie kha la thar nôkin lân; sakor le tâli ni inei dôr ngêt ang kha irsiamin lân, khanchu, Israelhai chu phâizôla doihai ei ta inhnêhai ngêt ta ei ti,” an tia. Khanchu Benhadada’n an iti angin a pompuihai tâka.

²⁶Khan kum nôk, sâla chu Benhadada’n a sipaihai a koi bukhaia, Israelhai doi hrangin Afek khuaa a fepuihaia.

²⁷Israelhai khom an irkoibuka, fâk hrang an sin siama. An hong suak tâka, Suriahai vaiin hmun hnia omhmun an khuara. Suriahai enin chu Israelhai chu kêltehai tômtea irbukkhôm ang an ni. Suriahai chu ram pumpuia an sip vinga.

²⁸Khan deipu inkhat hi Israel rêng Ahaba kuang a honga, “RENGPA’N hiang hin a ti; Suriahaiin RENGPA chu tâng ram Pathian a nia, phâizôl Pathian chu ni mah an ti sikin hi sipai tamtak hi ni kuta nang ki pêk, nang le ni mihai hin RENGPA ki nih ti nin inhriatna hrangin,” a tia.

²⁹Khan sûn sari sûng chu Suriahai le Israelhai chu an omhmun ata an irsiama, sûn sari nî tena chu an irdoi tâka. Israel sipaihai khan Suria sipai nuaikhat vêl sûn khatin an thathaia.

³⁰A la damhai chu Afek khua sûnga an intân lûta, a khua kulbang chimin sînghni sângsari a del thathai nôka; Benhadada chu khopui sûnga an tân lûta, a in ikil irthupnaa ar bîka.

³¹Khan a mi la damhaiin a kuang khan, “Irngai roh Israelhai chu an nun a hoi ti thu kin inhriat, bora puan silin kin ringa hruizêlin, Israel rêng kuanga fe hrangin ni phal ro, khanchu nang an zôk khom a ni thei,” an tia.

³²Khanchu, bora puan sila hrui inhliin Israel rêng kuang an fea, “Ni siahlo Benhadada’n, lungkham takin nin zôk ri se a ti,” an tia. Ahaba’n, “A la idam chu ma ni? ki urêngpa kêng a ini,” a tia.

³³Khanchu mihaiin chonghoiin, “O ni urêngpa a ni,” an tia. Reng khan, “Va fe unglân hong hruai roi,” a tia. Benhadada chu a hong suaka, Ahaba’n a kuang, tâlia chuang hrangin a ti pea.

³⁴Khan Benhadada’n, “Ka pa’n ni pa khua a lei ilâk pehai chu nang pe nôk ki ta, ka pa’n sum irvaina hmun Samari khua a isiam ang khan Damaska khua siam ni ti,” a tia. Khan Ahaba’n, “Khaanga chonginkung tâk sikin nan sua ta ki ti,” a tia.

³⁵Khanchu deipu laia mi inkhatin RENGPA thupêkin a deipu chanpui inkhat kuang, “Ni hei vîk ta,” a tia. Ama khan vîk nuam maka.

³⁶Deipu khan, “RENGPA thu ni zôm no sikin ni ni rotsan tika, kâmkeibakneiin nang sê that ri se,” a tia. A hei suaksana, kâmkeibakneiin a sê that ta.

³⁷Deipu khan, mi dang a va hmu nôka, “Ni hong vîk ro,” a ti nôka. Ama’n chu a satea nain a vîka, a pop ta.

³⁸Deipu khan, hmêl thupna’n a hmâi puan leh a tuama, Israel rêng hong hrang nghâkin lampuia a lei oma.

³⁹Khan rêng a hongin chu, deipu khan a len sama, “Ni siahlo hi irdoina hmuna ki fea, mi inkhatin râl a hong tuanga, ama hi ensui ro, a rotin chu ar thûl nangma nang that hrang, khano’nchu, tangka irzathum ni ichôi hrang, a ni tia.

⁴⁰Ni siahlo hin thil dang ki tho lai takin a ni lei rot pe tâka,” a tia. Israel rêngin, “Ni idik loi a ni, a mô chu nangin pêl ni ti,” a tia.

⁴¹Kha renga khan deipu’n a mit tuamna a sûta, Israel rêng khan deipuhai laia inkhat kha a nih ti an hriat suak tâka.

⁴²Khanchu deipu’n rêng kuang khan, “RENGPA’N hiang hin a ti, mithi hranga ki iti nin sua sikin, a thi irthûlin thi ni ti, a mihai tuangtum khom ni mihaiin tuang an ti,” a tia.

⁴³Khanchu Israel rêng chu a ning an mur pea, nuar pumin Samari khuaa a fe tâka.