Read Hrangkhol 1 RÊNGHAI 4 Bible Online

1 RÊNGHAI 4 - Hrangkhol bible

1 RÊNGHAI 4

¹Reng Solomona chu Israel mi murdihai rêng a nia.

²Hihai hi a mi lian hmanghai chu an ni. An ochai chu Zadoka nâipa Azaria a ni.

³Ziaktu lian chu Elihorefa le Sisa nâipa Ahija an ni. Ahiluda nâipa Jehosafata chu thurchi irziaktu a ni.

⁴Jehoiada nâipa Benaia chu sipai hruaitu a ni. Zadoka le Abiathara chu ochai an ni.

⁵Nathana nâipa Zabuda chu rêng ochai le rêng changhai enkoltu a ni.

⁶Ahisara chu rêng in enkoltu a ni:

⁷Solomona’n Israel ram pumpui chu bial sômkhat inhniin a khoia, an rêngin hruaitu a phunhai chita. Khahai khan rêng hrang le a in sung mihai fâk hrang an pêk ngai a ni. Hruaitu inkhatin tha khata an fâk inruk hrang kum sôtin an itum ngai a ni.

⁸Hihai hi an hruaituhai irhming le an omna bial irhminghai chu a ni; Efraima tâng ram Benhura.

⁹Makaz, Salbim, Beth-semes, Elon le Beth-hanan khua hruaitu chu Bendekera a ni.

¹⁰Arubot le Soko hai le Hefer ram murdi enkoltu chu Benheseda a ni.

¹¹Dor bial pumpui enkoltu chu Ben-Abinadaba a ni. Ama hin Solomona nâinu Tafati dôngma’n a neia.

¹²Tanak le Megido Zerethan dep Zezreel hnuai, Beth-san ata Abela Mehola le Jokmeam dênin, Beth-san ram pumpui enkoltu chu Ahiluda nâipa Baana a ni.

¹³Gilead rama Ramot khua, Manasea irchi, Jair in mihai omna khua Gilead rama mihai, Basan ram, Argob biala kul le thîr mikot nei khua sômruk hai enkoltu chu Idoa nâipa Ahinadaba a ni.

¹⁴Mahanaim khuaa Idoa nâipa Ahinadaba.

¹⁵Naftalia bial enkoltu chu Ahimaaza a ni. Ama hin Solomona nâinu Basemathi dôngma’n a neia.

¹⁶Asera le Bealot bial enkoltu chu Husaia nâipa Baana a ni.

¹⁷Isakara bial enkoltu chu Parua nâipa Jehosafata a ni.

¹⁸Benjamina bial enkoltu chu Ela nâipa Simeia a ni.

¹⁹Gilead ram, Amor rêng Sihona ram Gilead, Oga ram, Basan huama enkoltu chu Uria, Gebera nâipa a ni. Hi mi sômkhat inhnihai khêla ram pumpui chunga hruaitu inkhat a la om sa a ni.

²⁰Judahai le Israelhai chu tuipui kôla chiai tam nêkin an punga, raifân taka fâk nêkin an om a ni.

²¹Solomona chu Eufrates tuidung ata Aigupta ram dep Filistia ram dênin roi a rêla. Kha ram pumpuia khan Solomona kuang omna man chôiin an oma, Solomona dam sûng chu a khua le tuia tep sa an ni.

²²Solomona’n a sûn tina bai sa ual chi a innang ngai chu, her sângkhat le a saloi ual chi chu her sîngkhat a ni;

²³Sechal mar sômkhat, ram sial sômhni, belra irzakhat le sakhi, sazuk, sarza le ârhmehai an ni.

²⁴Solomona’n Eufrates tuipui nitâk tiang Tifsa khua ata Gaza dênin roi a rêla. A kôlvêla ram danghai leh khom an irngei a ni.

²⁵Solomona dam sûng chu Judahai le Israelhai ata Beerseba dênin lungngam takin mâni grep irhuan le theipui bila an om thei a ni.

²⁶Solomona’n, tâli ikai hrangin sakor sîngminli le sakor chung chuang thei zât sîngkhat le sânghni a neia.

²⁷Ram optuhaiin mâni sintum chita rêng Solomona le a bu nêkna hmuna bunêk ngaihai ta hrangin an ngaitua delhai ngaia, ite irsamtirhai ngai mahai.

²⁸Kha mihai khan a dônte’n sakor, tâli ikai sakorhai ruk bak hrangin fapôl le barli an pêk ngai a ni.

²⁹Pathianin Solomona chu vârna le inhriatna inthûk tak a pêka, lungrîl ngaituana irzat suisuak phâk loi rak a pêka.

³⁰Solomona chu nisua tianga mi vârhai le Aigupta mi vârhai nêkin a vâra.

³¹Rammuala mi vârtak a ni. Ezra mi Ethana, Mahola nâi Hamana Kalkola le Darda hai nêkin a vâr uala, hmun tin le ram tina a’rhming a inthang a ni.

³²Thuvâr sângthum a phuaa, hla sângkhat le ringa a phua saa.

³³Chîmu thurchi Lebanon tânga sidar thing ata kulbanga mông thei dênin an hriat vinga. Ramsa, vate le bokvâka fe ngai dôr le nga thurchi khom an hriat hlet a ni.

³⁴Rammuala rêng murdihaiin Solomona vârzia irchu hrangin an mihai a kuang an itîrhai ngai a ni.