Read Hrangkhol 1 RÊNGHAI 5 Bible Online

1 RÊNGHAI 5 - Hrangkhol bible

1 RÊNGHAI 5

¹Tura rêng Hirama’n Solomona chu a pa Davida thûl hranga sahriak pol a ni tah ti thu an hriatin chu palai a tîra, a pa Davida leh rual an le’rchang sikin.

²Solomona’n Hirama kuang hiang hin he a bê nôkhaia.

³“Ka pa Davida khan chu a kôlvêla ram danghai leh an le’rdoi ngaia, RENGPA’N a râlhai an hnêtir zoi mâka chu RENGPA a Pathian biakna hrang tempil sin thei mah ti chu nin hriata.

⁴Atûn chu RENGPA ki Pathianin ki kôlvêla ram danghai leh a ni irngeitira, râl le nin buai dang ite om ta maka.

⁵RENGPA khan ka pa Davida kuang, ni nâipa rêngtoihmun luatu hin chu ki’rhming chôiindômna hrangin tempil la sin a ti; tia a lei inkung ang tâk khan, RENGPA ki Pathian irhming roiinpuina hrangin tempil sin ki itum tâk a ni.

⁶Atûn hin Lebanon tânga sidar thing ni hong thak hrangin thu pehai ro; ki mihai le ni mihai sin suamhai sianlân, ni mihai chu ni izong dôr an hlo pehai ki ti. Sidon mihai anga thing tuk thei mi tûte nei ma ung ti lak nin hriat infel,” a tia.

⁷Hirama’n Solomona chongbâi an hriatin chu a sân a lôm oka, a kuang khan, “Hin nam roiinpui tak chunga roirêl hranga nâipa vârtak Davida irchia pêktu RENGPA chu a vuana hin inpâkin om ri se,” a tia.

⁸Hirama’n Solomona kuang khan, “Ni chong hong bê chu ki len hriata, sidar le meisâr thing chu ni innang dôr nang pe ki ti.

⁹Ki mihaiin thing chu Lebanon tâng ata tuipui dunga zuan tha an ta, bukkhômin a siana hrang hmun ni itina dênin nang zuan tung pe an ta, an sinsiam zoi tena ni mihaiin hmang an ti. Nang khomin ki mihai hi an fâk hrang chu ni lei ipêkhai nang a ti,” a tia.

¹⁰Hirama’n sidar le meisâr thing a innang dôr chu a pêk tâka.

¹¹Solomona khomin Hirama chu bai tui zât nuaiminli le oliv hriak tîn irzaminli, a mihai fâk hrang a pêka. Khaang khan a kum tin Solomona’n Hirama kha a pêka.

¹²A lei inkung tâk angin RENGPA’N chu Solomona chu vârna a pêka, Solomona le Hirama chu rual satak an ni ual uala, irngeina thu an thunga.

¹³Solomona’n chu Israel ram pum huapin sintho nuam loihai inphûtin mi sîngthum lai a neihaia.

¹⁴Adonirama chu an nihai enkoltu’n a siama, an nihai kha buk thumin a zêkhaia, mi sîngkhatin tha khata irthûlin Lebanon-ah an hong oma, in sûng tiang tha hni hniin an sintirhaia.

¹⁵Solomona’n neinun pêl mi sîngsari le lungtuk thei mi sîngriat tâng rama khan a neihaia.

¹⁶Khakhêla, sinthotuhai enkol hrangin mi sângthum irzathum a dônhaia.

¹⁷Reng thupêk ang takin lung a sôi zât chi lian ta takin tempil lungphûma irchuan hrangin an hong chôia,

¹⁸in sintuhai, Solomona mihai, Hirama mihai le Gebal khua mihai le lung le thinghai chu tempil irfûkpui hrang lam takin an siam tâka.