Read Hrangkhol 1 RÊNGHAI 9 Bible Online

1 RÊNGHAI 9 - Hrangkhol bible

1 RÊNGHAI 9

¹Reng Solomona’n tempil, rêng in le a danghai a sin zoiin chu,

²Gibeon-a a om lai ang khan RENGPA chu a kuang an lâr pe nôka.

³RENGPA khan a kuang, “Ni chongchaina ki len hriata, hi tempil ni isin hi kumtuanga nin ni biakna hmun ni hrangin kin thang ta. Hrung ki ta, enkol mai ki ti.

⁴Ni pa Davida angin iamom tak le dik takin ki sin ni thoa, ki dânhai le ki thupêkhai ni zômin chu,

⁵ni pa Davida kuanga ki chonginkung, nir chihai chu Israelhai rêng hong chang irzôm mai an tih tia ki chonginkung kha a tak hon changtir ki ti.

⁶Nang le nir chihaiin a ni zui nin hnônga, nin rota ki thupêkhai zôm loiin, pathian dang nin biakin chu,

⁷ki mi Israelhai chu an ni lua hrang ram ki ipêkhai rengata inhnothai ki ti. Hi tempil nin ni biakna hrang hmun hranga ki inhlan irthiang sai khom hi rotsan ki ti. Rammuala nam tinhaiin Israelhai chu êsêlin innuisan ni an ti.

⁸Hi tempil hi siat ving a ta, a hmupuhai dôrin a’rkhêl ti an ta, ‘Itho sikin mo RENGPA’N hi ram le tempil hi a isoisak’? ti an ti.

⁹Mihaiin, an irchihai Aigupta rengata hruai suaktu RENGPA an Pathian an rotsan sika a ni hi te, pathian dang an zonga, a sin an tho sika RENGPA hin a isoisak a ni hi, tiin sâmhai an ti,” a tia.

¹⁰Solomona’n chu RENGPA tempil le ama in chu kum sômhni sûngin a sin zoia,

¹¹Tura rêng Hirama’n sidar thing meisâr thing le rângachakhai le a innang murdi, hi inhai sinna hrangin a pêka.

¹²Hirama’n khuahai kha a va hmu’n chu lôm thei rak maka.

¹³Khanchu, Solomona kuang khan, “Urêngpa hihai ang hi mo ni ni ipêk?

¹⁴Ite lua khom hmang ruk loi, Kabul ram a ni hi,” a tia. Atûn ten hi irhming hi a irput a ni ta. Hirama’n Solomona kha rângachak her sômminli chu a lei thon nôk tâka.

¹⁵Reng Solomona’n tempil hai, ama inhai, khopui nisua tiang lua bit hrangin kul bang siam hrangin sinthotuhai nakhrât pôl a neia. Khanchu, hi khua hai, Hazor, Megido, Gezer hai hi a siam insathaia.

¹⁶Aigupta rêng Faroa khan Gezer khua a doia, a hâlpaia, mihai khom a thatpaihai vinga, a nâinu Solomona dôngma an dongtira.

¹⁷Solomona’n a siam insat nôka; sintho hranga nakhrât pâlhaiin Beth Horon, chuanhnuai hai,

¹⁸Baalath khua, Judai ram ramchâra Tamar khua a siam insatirhai sa.

¹⁹Thil siakhômna khua, sakor le sakor tâli omna khua, Jerusalem, le Lebanon le a ram sûng hmun tina siam insat nanghai chu a siam zoi tâka.

²⁰Hi nam Amor, Hit, Periz, Hiv le Jebus mihai hi,

²¹Israelhaiin Kanaan ram an lûta khan thathai zoi loi, Solomona’n sintho hrangin nakhrât pâl a ihmanghai irchi chu atûn ten hin suak angin an om mai ta.

²²Solomona’n Israel mi tukhom suak angin hmang ngai maka, sipai hrang le hruaitu hrangin chu a hmanghai.

²³Solomona’n a sintuhai enkol hrangin mi irzaringa sômringa an om.

²⁴Solomona dôngma Aigupta rêng nâinu chu Davida khopui ata ama hrang piala a in sina khan ar thona, kha zoiin chu khopui nisua tiang chu an bit zoi tâka.

²⁵Solomona’n RENGPA ta hranga maichâm a isiam chunga khan hâlirvôm thilinhlan le fâk hranghai thilinhlanin a kuma voithum an hlana. RENGPA hrang mirimhoi a hâla. Khanchu, tempil sin zoi a ni.

²⁶Reng Solomona’n Edom rama Eloth kôla Agaba irkuang irngamna Eziongeber khuaa irkuang tamtak a siama.

²⁷Reng Hirama’n irkuanga mihai kha, Solomona changpui hrangin a tîrhaia.

²⁸Ofir rama an fea, rângachak her sângkhat irzaminli a va lâka, Solomona an va pêk ta.