Read Hrangkhol 2 RÊNGHAI 1 Bible Online

2 RÊNGHAI 1 - Hrangkhol bible

2 RÊNGHAI 1

¹Israel rêng Ahaba a thi zoiin chu Moabhai chu kha Israelhai leh ir-en nuam mahaia.

²Reng Ahazia chu Samari khuaa a omna in chung sîpa a tâka, a na oka a dam le damloi hrang thua Filistia Ekron khuaa pathian Baalzebuba irdon hrangin mi a tîra.

³RENGPA vântîrtônin Tisbe mi Elija kuang, “Thoiin lân, Samari rêngin mi a itîrhai irtongpui hrangin fe roh. Israel rama Pathian a iom loi ma ni, itho sika Ekron pathian Baalzebuba irdon ni ife?.

⁴RENGPA’N hiang hin a ti, ni omna zâlhmun ata kha chum thei ta no chi nia, thi hrang ni ni ta, ti pe hrangin a tîra.” Elija chu a fe tâka.

⁵Rengin mi a itîrhai khom an hong nôk lata, an kuanga, “Itho mo nin hong ikîr nôk lat?” a lei tia.

⁶Anni’n, “Mi inkhat leh kin irtoka, a tîrtu rêng kuang khan kîr nôk unglân, RENGPA’N hiang hin a ti, Israel rama Pathian a iom loi ma ni Ekron pathian Baalzebuba irdon hranga mi ni itîr? ni zâlna hmun ata chum thei ta no chi ni, ni ithi hrang tâk a ti, tiin hril roi,” a ni ti, an tia.

⁷“Hi thu nangni hriltu hi i ang mihriam mo a ini?” a tia.

⁸Anni khan, “Pa mul tamtak nei mi a ni; savun kongkhit ar buna,” an tia. Ama khan, “Tisbe mi Elija ni a ti,” a tia.

⁹Rengin a sipai hruaitu, sômringa sipai leh a tîra. Anni khan tâng sîpa Elija lei toi an va hmua, a kuang, “Nang Pathian mi, rêngin zuang ro nang a ti,” an tia.

¹⁰Elija’n, “Pathian mi ki niin chu irvân ata mei zuang ta sianlân, nang le ni mi sômringahai kha nangni kâng that ri se,” a tia. Irvân ata mei a zuang tâka, sipaihai chu an hruaitupa leh a kâng thathaia.

¹¹Rengin sipai dang sômringa le hruaitu a tîrhai nôka. Ama’n hiang hin a tia, “Nang Pathian mi, rêngin zuang lat ro nang a ti,” a tia.

¹²Elija’n, “Pathian mi ki niin chu, irvân ata mei zuang ta sianlân, nang le ni rualhai kha nangni kâng that ri se,” a tia. Pathian mei chu a zuang tâk zela, hruaitu leh a sipaihai chu a kâng thathai vinga.

¹³Rengin sipai le hruaitu dang sômringa sipai a tîrhai nôka. Tânga a hong luia, Elija hmâikunga a khûksadela, “O Pathian mi, kei le ki sipaihai hi lung nin khamin lân, kin hringna hi ni hôi pe roh.

¹⁴Sipai hruaitu inhni le an sipaihai irvân ata meiin a kâng thathai tâka, keini hi chu lungkham takin nin zôk ta ro,” an tia.

¹⁵RENGPA vântîrtônin Elija kuang, “A rualin fe roi chi no ro,” a zuang tia. Khanchu, a thoia, anni pâla khan an fea, rêng irhmupui hrangin.

¹⁶Reng kuanga khan, “Ekron pathian Baalzebuba irhmupui hrangin mi ni itîr ma ni? Israel rama Pathian irdon hrang ni iiam loi mo? ni zâlna hmun ata kha chum ta no chi ni, ni ithi ta hrang kêng,” a tia.

¹⁷Elija ihril RENGPA iti angin Ahazia chu a thi tâka. Ahazia hin nâipasal nei maka, Judai rama rêng Jehosafata nâipa Jehorama inlal zoro kum hnina tena chu a sangpa Jorama chu ama irthûlin an lal nôk ta.

¹⁸Reng Ahazia sintho danghai chu Israel rênghai thurchi irziakna bua a chuang.