Read Hrangkhol 2 RÊNGHAI 11 Bible Online

2 RÊNGHAI 11 - Hrangkhol bible

2 RÊNGHAI 11

¹Reng Ahazia thina thu a nu Athali’n an hriatin chu rêng in sûng mihai an thattirhaia.

²Ahazia nâipa Joasa irchia mi ithat zoi loi, rêng Jorama nâinu Jehosebi, Ahazia farnu’n a thup inrûk a ni. A dontu leh tempil hmun khata hin Athali hmu thei loina hrangin thup inrûk a nia, thatpai theiloi a ni.

³Athali inlal zoro kum ruk sûng chu Jehosebi khan tempila thupin, a ienkol a ni.

⁴A kum sarina tena chu ochai inlaltak Jehoiada’n rêng hrungtu Keret sipai irzakhat hruaitu le rêng in hrungtu sipaihai chu a koibukhaia; an thiltho tum chu a hrilhaia, tempil sûnga khomâkirsâmin a sa a tipuia, rêng Ahazia nâipa Joasa chu a hmua.

⁵Khan ama’n, “Nin tho tum chu hiang hin a ni: nin laia irngam nia hong hranghai hi hmun thuma sena, hmun khatin rêng in chu hrung ri sehai.

⁶“Hmun thuma hmun khatin Sur lampui hrung unglân; a dang hmun khathaiin a hrungtuhai hnunga lampui hrung roi,

⁷a hrungtu pâl hni Sabat nia irngam hranghaiin rêng in hrung hrangin tempila an iom hrang a ni.

⁸Reng Joasa hi khandai kêlsua saia chôiin nin ihrung hrang a ni, a fena hmun tina zui unglân; a hong nâi murdi chu lei thathai roi,” a tia.

⁹Sipai hruaituin Jehoiada thu suak chu an zôma, an sipai Sabat nia irngam hranghai le sintho hranghai chu an hong hruaihaia.

¹⁰Tempil sûnga an ihrê insa rêng Davida ufei le a phohai chu sipai hruaituhai kuta an pêka.

¹¹Tempil maton tiang khandai kêlsua sai chôiin rêng in hrung hrangin ar tângtirhaia.

¹²Jehoiada’n Joasa chu a hruai suaka, rêng lukhum chu an khumtira, rêng om hrang dân hrang irziakna bu chu a pêka; Joasa chu sahriak a pola, rêng a chang tâka. Mipuihaiin an kut an inbên dur dura, “Reng chu dam sôt ri se,” an tia.

¹³Rengnu Athali’n a hrungtuhai le sipaihai irhâi an hriatin, mipui irbukna tempil tiang inrang takin a fe suaka.

¹⁴Reng thar chu rênghai ngîrna hmun hranga inkungna tempil lûtna bang bula khan a lei ngîra. Sipai hruaitu le bekul tum theihaiin an le’rhuala, mipuihai chu raifân takin an len nui dur dura. Bekul an tuma. Athali chardongin, a puan an potthêra, “An ni ihuang kêng a ni hi te,” a tia.

¹⁵Jehoiada’n tempil irkulna sûnga Athali that chu a sa ti maka, sipai hruaituhai kuang khan, “Sipai irtânghai laia hruai suak unglân, a san hranga hong murdi lei thatpaihai roi,” a tia.

¹⁶Athali chu an chela, rêng in tiang panin an hruaia, sakor mikot an itina hmuna khan an thatpai tâka.

¹⁷Ochai, Jehoiada’n rêng Joasa le mipui chu RENGPA mi ni hrangin chong an kungtirhaia. Reng le mipuihai kâra thuthung a siama.

¹⁸Mipuihai chu Baal tempila an fea, an insiata, maichâmhai insiatin, millimhai chu an vîk siathai vinga. Baal ochai Matana chu a maichâm kôla khan an thata. Ochai Jehoiada’n tempil hrung hrangin mi a siaa.

¹⁹Reng hrungtu Keret sipai irzakhat hruaitu, rêng in hrungtu sipai hruaitu leh khan, tempil rengata rêng chu reng ina an hruaia, mipuiin an zuia. A hrungtuhai mikota Joasa chu a lûta, rêngtoihmunna khan a toi tâka.

²⁰Mipuihai chu a sâna raiinfânin, Athali chu rêng ina an that sikin, kho sûnga ite buaina om ta mah.

²¹Khanchu Joasa khom kum sari a niin Judai rama rêng a chang tâka.