Read Hrangkhol 2 RÊNGHAI 12 Bible Online

2 RÊNGHAI 12 - Hrangkhol bible

2 RÊNGHAI 12

¹Israel rama Jehua kum sari an lal kuma khan Joasa khom Judai rama an lala, Jerusalema kum sômminli an lala. A nu chu Berseba khuaa mi Zibi a ni.

²Ochai Jehoiada ikaihruai ngai a ni sikin a dam sûng chu RENGPA nuam lam tho ngai mi a ni.

³Khannisian nam danghai pathian biakna hmunhai chu masan thei loiin a oma, mihaiin thil an la inhlan thei mai a ni.

⁴Jehoiada’n ochaihai chu a koi bukhaia, tempila thilinhlan balamin thil pêk an hong chôi ngai a ni, senkhat chu thilinhlana khan pe ngêt hranga hril a ni sikin, lômna thilpêkhai chu sataka se hranga hril an ni.

⁵An sinthotuhaiin kha sumhai kha a chôitu chu ochai sinthotuhaiin dong an ta, tempil siam insatna’n an ihmang ngai a ni.

⁶Kum sômhni inthum Joasa an lal zoi khomin tempil chu siam insat loiin a om maia.

⁷Jehoiada le ochai danghai chu a koihaia, “Itina mo tempil nin la isiam insat mai loi hi? Atûn ata chu nin poisa dôn ngai kha dôn ta no roi, a siana nin isia ngêt hrang a ni ta; khan kêng tempil siam insat a ini ta hrang,” a tia.

⁸Ochaihaiin mihai kuang ata tangka la ta loi le tempil siat siamtu ni loi chu a sa an tia.

⁹Ochai liantak Jehoiada’n bôm a siama, a sîng a’r-ôngtira, maichâm kôla tempil lûtna chang tiang a siaa. Tempil lûtna bula ochai lei ompu khan Pathian kuanga thilpêkhai lâk ngaitu khan a lei lâka, bôm sûnga khan a thona.

¹⁰Bôm sûnga sum a tam tena chu rêng lekha irziaktu le ochai Jehoiada chu an honga, tangka sum chu an hâl inzôia, irkhîsiarin an siaa.

¹¹An irkhî zoiin chu tempil siam insatna sin enkoltuhai kuang an pêka, annihaiin sinthotu mistirihai hlo an pêka.

¹²Lungtukhai le a sintuhaiin tempil siam insatna hrang thing le lung an irchôka, poisa hmangna hrang hmuna poisa an pêkhaia.

¹³Tholôm poisa chu tangka ru le berbu hai, bekul le meiser enkolna hmangrua hai, sumru le rângachak thil chi dang dang siamna’n chu hmang nuam viat mahai.

¹⁴Sin thotuhai hlo le neinun irchôkna vaiin an hmang a ni.

¹⁵Sin thotuhai chu mi diktak an nia, an poisa hmang lam khom ite enpui nang mahai.

¹⁶Sual irbôlna le siatna man thilinhlan balama an thilpêkhai chu sia sa ni maka, ochaihai dongtum pial a ni.

¹⁷Kha laia khan, Suria rêng Hazaela’n Gath khua a rûna, an hnêa, Jerusalem khom rûn a tuma.

¹⁸Juda rêng Joasa’n a matona rêng Jehosafata hai, Jehorama hai le Ahazia haiin RENGPA ta hranga an thilpêkhai chu a lâka, ama ipêk khom belsain; tempil le rêng in sum bôma rângachak murdi chu a rêngin rêng Hazaela chu thilpêkin a pêk tâka, a sipaihai chu Jerusalem ata a hruai suakhai ta.

¹⁹Reng Joasa thiltho dang murdi chu Juda rênghai thurchi irziakna lekhabua a chuang;

²⁰Joasa chu a rualhai inhni leh an khitphiarhaia.

²¹A thattuhai chu Simeata nâipa Jozakara le Somera nâipa Jehozabada an ni. A thia, Davida khopuia rêng thâna an phûma, a nâipa Amazia chu a’rthûlin an lal nôk ta.