Read Hrangkhol 2 RÊNGHAI 13 Bible Online

2 RÊNGHAI 13 - Hrangkhol bible

2 RÊNGHAI 13

¹Ahazia nâipa Joasa chu Judai rama kum sômhni inthum an lalna kum a niin chu, Jehua nâipa Jehoahaza khom Israel rêngin an lala. Samari khuaa, kum sômhleihni an lala.

²Reng Jeroboama Nebata nâipa angin RENGPA ta hrangin thil sual a thoa, Israelhai a hruai insualhaia, a thil saloi thohai masan nuam maka.

³Khasikin Israelhai chunga RENGPA ning an mura, Suria rêng Hazaela le a nâipa Benhadaba’n Israelhai chu inhnê hrangin a’rsabeia.

⁴Jehoahaza chu RENGPA makunga a chongchaia, Suria rêngin Israelhai deng an theitirhai lam a hmuin a chongchaina a zuang sâm nôka.

⁵RENGPA’N Israelhai kôla a san hrang a tîr pehai ngaia. Suriahai ata chu a sansuakhaia, irtharngam takin an om nôk ngai.

⁶Nebata nâipa rêng Jeroboama in sûng mihaiin Israelhai an ihruai insualna dikloi ata irlet nuam loiin, an la sual maia, Asera illim chu Samari khuaa khan an la donsui mai ngaia.

⁷Jehoahaza chu sipai tômte a nei tâk sikin, sakor chung chuang mi sômringa, tâli sômkhat le kea fe sipai sîngkhat vai a neihai tâka, Suria rêngin an hnê hrai sikin, kea pil vâiphin sir angin a isirbe a ni.

⁸Jehoahaza thil tho danghai chu, a ihâi lam dân chu Israelhai thurchi irziakna lekhabua a chuang.

⁹A thia, a nâipa Jehoasa’n ar thûlin a inlal nôk a ni ta.

¹⁰Judai rama Joasa kum sômthum sari an lal kumin Jehoasa chu Israel rêng a nia; Samari khuaa kum sômhleiruk an lala.

¹¹Ama khomin RENGPA mithmua thilsual, Israel rêng Nebata nâi Jeroboama’n Israelhai a hruai sualna kha masan thei loiin a sunzom maia.

¹²Jehoasa thil tho dang Judahai rêng Amazia le an irdoia, a ihâi lam dân thuhai chu Israel rênghai thurchi irziakna lekhabua a chuang.

¹³Jehoasa chu a thia, Samari khuaa rênghai thâna an phûma. A nâipa Jeroboama inhnina chu ar thûlin an lal nôk ta.

¹⁴Deipu Elisa chu a thipuina hrangin natna tuangin zâlhmuna a zâla, thi anai pe tâk sikin rêng Jehoasa’n a va pana; “Ka pa, ka pa, Israelhai inzôktu roiinpui tiin,” a châ tâka.

¹⁵Elisa’n a koia, “Thal ngul nei le thal chi danghai ni pe hi roi,” a tia.

¹⁶Israel rêng kuang khan, “Thal ngulnei hi chel ro,” a tia. A chel zoiin chu Elisa’n rêng kut intûkin, “Sak tianga tukver kha inhong hi roi” a tia. an inhong pea.

¹⁷“Thal kha hei kâp ta” a tia. A hei kâpa, deipu Elisa’n, “Suria inhnê hrang RENGPA thal ni ni, Suriahai le Afek-ah irdoi nin ta, an hnêtu ni ni ti,” a tia.

¹⁸Elisa’n rêng kuang khan, “Thal dang kha la nôk ro,” a tia. A hei lâka, “Irnêng kha sun ro,” a tia, voithum a suna a mong tâka.

¹⁹Pathian mi kha a ning an mur pea, voiringa voiruk khom sun ro, Suriahai chu inhekhai zoi ni ti, voithum kêng ni inhnêhai hrang a tia.

²⁰Elisa chu a thia, an phûm tâka, kum a hong thar rikipin Moabhaiin Israel ram an hong doihaia.

²¹Mi inkhat hi a thia, phûm an irsoi lai takin Moab rual pâl khat an honga, Elisa thâna khan an van boka an intâna. Kha pa ruak leh khan Elisa ru a zu tônin chu a hong hring zela, a ngîr suak tâka.

²²Jehoahaza dam sûng chu Suria rêng Hazaela’n Israelhai chu deng an theitira.

²³Khannisianlân, RENGPA’N lung a thunghaia, insiat chit an ini hrang a nuam no sikin, Abrahama, Isaka le Jakoba hai kuanga a thuthung chu a’rngaiinnatin, irnghil thei maka, atûn ten hin a la irngaisâng a ni.

²⁴Suria rêng Hazaela chu a thia, a nâipa Benhadada chu ar thûlin an lala.

²⁵Jehoahaza nâipa Jehoasa’n Hazaela nâipa Benhadada kut ata a pa Jehoahaza khua le tui an ilâkpai pehai chu a lâk kîr nôka, an irdoina voithum an hnêa, Israel ram khuahai chu a sutpai zoi tah a ni.