Read Hrangkhol 2 RÊNGHAI 15 Bible Online

2 RÊNGHAI 15 - Hrangkhol bible

2 RÊNGHAI 15

¹Jeroboama inhnina chu Israel rama kum sômhni sari an lal kumin,

²Amazia nâipa Uzia chu kum sôm kum ruk mi a nia. Judahai rêng a nia, Jerusalema kum sômringa kum hni an lala. A nu chu Jerusalem mi Jekoli a ni.

³A pa Amazia angin RENGPA mithmua thil sa a thoa, nam dang pathianhai biakna hmun chu insiat nuam maka, mihaiin thilinhlanin mirimhoi an la ihâl mai a ni.

⁴Khasikin, rêng kha RENGPA’N a zuang tôna, a dam sûnga inphâr, a bingin an isia a ni ta.

⁵A nâipa Jothama’n rêng in sûngkua chu a hruaia, Judai ram chu a ilua a ni ta.

⁶Uzia sintho danghai chu Juda rênghai thurchi irziakna bua a chuang.

⁷Uzia chu a thia, Davida khopuia rênghai irphûmna thâna an phûma, a nâipa Jothama chu ama irthûlin an lal tâka.

⁸Uzia chu Judai rama kum sômthum kum riat an lal kumin, Jeroboama nâipa Zekaria chu Israel rêng a hong nia, Samari khuaa tha ruk an lala.

⁹Ama matona rêng danghai angin, RENGPA mithmua thilsual a thoa, Israelhai a ihruai insualna sual kha, masan thei loiin.

¹⁰Jabesa nâipa Zaluma khan Zekaria chu a khitphiara, Ibleam khuaa a thata, ar thûlin an lal ta.

¹¹Zekaria sintho danghai chu Israel rênghai thurchi irziakna lekhabua a chuang.

¹²Jehua kuanga RENGPA thuhril, “Ni’rchi chu irlo minli dênin Israelhai rêng nih an ti,” a iti angin a hong ichuk a ni ta.

¹³Uzia chu Juda rêng, kum sômthum kuak a ni kumin Jabesa nâipa Saluma chu Israel rêng a nia. Samari khuaa tha khat an lala.

¹⁴Gadia nâipa Menahema chu Tirza rengata Samari khuaa a honga, Saluma chu a thata, ar thûlin an lal tâka.

¹⁵Saluma sintho danghai chu Israel rênghai thurchi irziakna lekhabua a chuang.

¹⁶Tirza rengata Menahema a hong hro lai khan Tapua khua chu ama thu hnuaia an om nuam no sikin, an siatpaia, a sûnga omhai le a ram vêla omhai chu a thathaia, nupang inrâi laihai khom an phîng vun a sunthêr pehai a ni.

¹⁷Uzia chu Juda rêng kum sômthum kuak a ni kumin, Gadia nâipa Menahema chu Israel rêng a nia. Samari khuaa kum sôm an lala.

¹⁸RENGPA mithmua thilsual a thoa, Nebata nâipa Jeroboama thilsual tho, Israelhai hruai insualna sual kha a dam sûngin masan thei maka.

¹⁹Reng Tiglat Pilesera’n Israel ram a doia, Menahema’n tangka sumru her sîngthum sângminli a lei pêka, ni nuampui a tih iti sabeiin.

²⁰Menahema’n Israel mi irchonghai tangka sômringain a suthaia, kha sum kha a pêka; khanchu, Tiglat Pilesera chu an ram tiang a fe nôk ta.

²¹Menahema sintho danghai chu Israel rênghai thurchi irziakna lekhabua a chuang.

²²A thia, an phûma, a nâipa Pekahia chu a’rthûlin an lal nôk ta.

²³Uzia chu Juda rêng kum sômringa a ni kumin, Menahema nâipa Pekahia chu Israel rama an lala, Samari khuaa kum hni an lala.

²⁴RENGPA mithmua thilsual a thoa, Nebata nâipa Jeroboama thilsual tho, Israelhai hruai insual kha masan nuam loiin,

²⁵a sipai hruaitu inkhat Ramalia nâipa Pekahia’n Gilead khua mi sômringahai leh an khithaia. Pekahia chu Samari khua kul Argob le Aria kôla an thata. ar thûlin an lal nôk ta.

²⁶Pekahia sintho murdi chu Israel rênghai thurchi irziakna lekhabua a chuang.

²⁷Uzia chu Juda rêng kum sômringa inhni a ni kumin, Remalia nâipa Pekahia chu Israel rêng a nia. Samari khuaa kum sômhni an lala.

²⁸RENGPA mithmua thilsual a thoa, Nebata nâipa Jeroboama thilsual tho Israelhai hruai insualna masan loiin a oma.

²⁹Pekahia inlal zoro hin Assuria rêng Tiglat Pilesera hin Ijon khua, Abela Bethmaka, Janoa, Kades le Hazor khua hai lâkin, Gilead ram, Galili ram le Naftalia ramhai a lâk saa, mipuihai chu Suria rama a thonhaia.

³⁰Uzia nâipa Jothama chu Judahai rêng kum sômhni a chang kumin, Ela nâipa Hosea’n Pekahia chu khitphiarin a doia, a that tâka, ar thûlin an lal ta.

³¹Pekahia thiltho danghai chu Israel rênghai thurchi irziakna bua a chuang.

³²Remalia nâipa Pekahia chu Israel rêng kum hni a chang kumin, Uzia nâipa Jothama chu,

³³kum sômhni ringa mi a nia, Judahai rêng a changa, Jerusalema kum sôm kum ruk an lala, a nu chu Zadoka nâinu Jerusi a ni.

³⁴A pa Uzia sintho angin RENGPA mithmua thil sa a thoa.

³⁵Nam dang pathian biakna hmun irsânghai chu masan loiin; mihaiin thil an la inhlan nôk maia, thil rimhoi an la ihâlna mai a ni. Tempil hmâr tianga inkhâr hi Jothama isiam a ni.

³⁶Jothama sintho danghai chu Juda rênghai thurchi irziakna lekhabua a chuang.

³⁷An lal lai hin RENGPA’N Suria rêng Rezina le Israel rêng Pekahia chu Judai ram doi hrangin a hong tîr a ni.

³⁸Jothama chu a thia, Davida khopui rênghai thâna an phûma, a nâipa Ahaza chu a’rthûlin an lal nôk ta.