Read Hrangkhol 2 RÊNGHAI 17 Bible Online

2 RÊNGHAI 17 - Hrangkhol bible

2 RÊNGHAI 17

¹Ahaza chu Judahai rêng kum sômhleihni a ni kumin, Ela nâipa Hosea chu Israel rêng a nia, Samari khuaa kum kuak an lala.

²RENGPA mithmua thilsual a thoa, matona Israel rênghai ang dôra sual chu ni ual maka.

³Assuria rêng Salmanesera’n a doia, Hosea khom a le’rpêk saa, kum tin khâzana a chôipuihaia,

⁴Kum khat chu Hosea’n Aigupta rêng Soa kuang palai a tîra, a changpui hrangin a ngêna, a kum tin khâzana chôia Assuria kuanga a ipêk ngai kha pe nuam ta maka. Salmanesera’n kha thu kha an hriatin, Hosea a chela, zêl ina a khum tâka.

⁵Salmanesera’n Israel ram chu a doi tâka, Samari khua kha ar huala; kum thum ar hual tena chu,

⁶Hosea kum kuak an lal kumin, Samari khua chu Assuria rêngin a lâk tâka; Israelhai chu suakin a hmanghai ta. Assuria rama a hruaihaia, senkhat chu Hela khuaa an omtirhaia, senkhat chu Gozan bial Habor tui kôla le Media ram khuaa an omtirhaia.

⁷Israelhaiin an Pathian RENGPA rengata thilsual an tho sikin, Samari khua chu a isiat a ni ta. Aigupta rêng kut ata a sensuaka, Aigupta rengata a hruai suaka; khannisian, pathian dang an biaksan ta.

⁸Nam dang, anni ata inhnotsuakhai omdân kha an lâka, Israel rênghaiin thil saloi tak an itho ngai kha an la tho nuam maia.

⁹An Pathian nuam loi lam tak Israelhaiin an thoa; an omna khua a chîn le a lian hmun tina, nam dang pathian biakna hmun irsâng an siamhai maia.

¹⁰Mual le tâng tam dôrin, thingkung sa le inhrip omna dôra lung millim le pathiannu Aseri irlim thing an phun insiphaia.

¹¹Ram ata RENGPA inhnotsuak tho dân angin nam dang maichâmhaia khan rimhoi an hâla. An thilsual thohai khan, RENGPA chu a ning an inmurtir uala.

¹²RENGPA thupêk, millim biak loi hrang a iti zôm nuam loiin an oma.

¹³RENGPA’N Israelhai le Judahai hril hrangin a tirtôn le deipuhai a tîr ngaia, “Nin omdân intirom hi masan unglân, nin irchibulhai laia ki dân pêkna lekhabua chuang ki siahlo deipuhai ihril; ki thupêk le ki inkunghai zôm unglân, tiin.

¹⁴Khannisian, zôm nuam viat mahaia, an puhai angin tukullian an songa, an Pathian RENGPA chu iam nuam viat loiin an oma.

¹⁵A thupêkhai kha zôm nuam loiin an oma, an pahai le thuthung chu an mâksana, an irchutirna inkhat khom zôm nuam loiin an oma. Chanlamboi thu, millimhai biakin an oma, RENGPA’N an omdân la no roi” a ti an kôla nam danghai omdân an lâka.

¹⁶RENGPA an Pathian thupêk murdi chu an hnôla, dâr thîrin sehrâtte irlim inhni an irkula, chubai an mûka. pathiannu Aseri irlim an siama, ârsi chubai an mûka, Baal sin an thoa.

¹⁷An nâinu le nâipahai khom nam dang pathian makunga hâlirvôm thil inhlanin ram khohri le mitphil theihai leh irthopin. RENGPA mithmua thil saloi tinrêng tho hrangin an irpêk lût a ni; khasikin, a ning an inmurtir a ni.

¹⁸Israel mihai chunga RENGPA ninginmur, a hmu loina hmuna a’rzûlhaia, Judahai vai an iom tâk a ni.

¹⁹Judahai khomin an Pathian RENGPA thupêkhai zôm ual loiin, Israelhai tho dân angin an oma.

²⁰RENGPA’N Israel murdi chu a ihnôlhai a ni ta, deng an theihaia, râl ichiom tak takhai kuta a pêkhaia, a hmu phâk loina hrang hmuna a tîrhai ta a ni.

²¹RENGPA’N Israelhai kha Judahai leh a’rsentirhai zoiin, Nebata nâipa Jeroboama chu rêngin an siama, RENGPA mâksan hrangin Israelhai chu a hrilhaia, sual saloi tak a inthotirhai a ni kha.

²²Jeroboama hnung an zuia, thilsual a itho dôr, anni khomin an thoa.

²³A siahlo deipuhai hmanga a ihril angin a hmuphâk loina rama a inhnotpai sabak a ni ta. Khanchu, Israel mihai chu Assuria rama atûn ten hin sala an intâng a ni ta.

²⁴Assuria rêngin Babulon hai, Kuth hai, Iva hai, Hamath le Sefarvaim khuaa omhai chu a hruaia; Israel suaka hruaia omhai irthûlin Samaria rama an omtira; kha khuahai kha an luaa an iom a ni ta.

²⁵An om phut laiin chu RENGPA biakna lam châng inhre loiin; kâmkeibaknei a tîra, a sêhaia.

²⁶Assuria rêng chu Samari ram khuaa mihriam siahaiin kha rama an Pathian dân inhre loiin an oma, khasikin chung Pathianin kâmkeibaknei a sê hranga a itîr a nih ti thu a hrila.

²⁷Rengin, “Suaka kin ichel ochai inkhat kha insuain lân, an ram Pathian dân irchutira, an laia oma irchutirhai hrangin tîr roi,” a tia.

²⁸Khanchu, Israel ochai inkhat Samari khua ata suaka an ichel chu a fea, Bethel-a a lei oma; khatak ata mihaiin RENGPA biak hrang dân ar chutir ta.

²⁹Samari rama om tâkhaiin anni millim an siamhaia. Israelhai Pathian biakna hmun hranga an isiama khan an siaa, pôl tamtakhai khomin an omna hmun tina millim an siamhai maia.

³⁰Babulon ata honghaiin Sukoth Benot illim an siama, Kuth mihaiin Nergal-a illim an siama, Hamath-haiin Asima illim,

³¹Iva mihaiin Nibaza illim le Tartaka illim, Sefarvaim haiin an pathian Andramelek le Anamelek illim kôla an nâinu le nâipahai hâlirvôm thilinhlan hrangin an thathaia.

³²Hi mihai hin RENGPA chu an ibiak tâk a ni, an laia tukhom ochai an changtirin chu nam dang pathian biakna hmun irsânga ochai sin an inthotira, an thilinhlan hrang an lei irfûk pehai ngai a ni.

³³RENGPA chu an biaka, an hongna ram tho dân angin an pathianhai an ibiak sa mai ngai a ni.

³⁴A vuanhai tena an tho dân milui an la itho mai a ni. RENGPA chu an ibiak taktak thei loi a ni, a dân le a thupêk, Jakoba irchi, Israel irtihai laia pêk chu an izôm loi a ni.

³⁵Israel mihai le RENGPA’N a thuthunga, “pathian dang biak no roi, chubai khom mûk no roi, an sin khom tho no roi, an kôla thil khom inhlanhai no roi.

³⁶A zoi tâkhai le thei taka Aigupta ram ata la suakhai thu hi zôm roi, chubai ni mûk nin ta, thil khom nin inhlan hrang a ni.

³⁷Nin ta hranga ki irziak, dân le thupêkhai hi nin izôm mai hrang a ni, pathian danghai thu nin izôm hrang ni ma.

³⁸Thuthung nangni ki isiam pehai hi nin irnghil viat hrang ni ma.

³⁹Kei nin Pathian, RENGPA thu hi nin izôm hrang a ni; khanchu nin râlhai ata nangni sansuak ki ti,” a tia.

⁴⁰Khannisianlân, kha mihai khan an mikuar lût no ni, an tho tum chu tho mai an ti.

⁴¹Hi mihai hin RENGPA chu chubai ar hmingin an imûk a ni, an millim chubai mûk an la irhnik ual a ni, an irchihai khomin atûn ten an la itho mai a ni.