Read Hrangkhol 2 RÊNGHAI 2 Bible Online

2 RÊNGHAI 2 - Hrangkhol bible

2 RÊNGHAI 2

¹RENGPA’N Elija chu irvân tiang kêllaiherin a hruaina hrang zoro a hong tunga. Elija le Elisa chu Gilgal ata an fea, lampuia an fe laiin,

²“Hi hin lei om ro, RENGPA’N Bethel nei hrangin a ni tîr,” Elija’n a tia. Elisa’n, “Pathian hring le ni hringna sâlin nang ki ti, lei om no ning,” a tia. Bethel hmuna an fe suam ta.

³Kha laia deipu pâl omhai khan, Elisa kuang an va fea, “A vuan hin ni pu hi RENGPA’N a ilâk hrang a nih ti mo nin hriat?” an tia. Ama’n “Kin hriat dâihrek hi roi,” a tia.

⁴Elija’n Elisa kuang, “Hi hin lei om ro, RENGPA’N Jeriko-a fe hrangin a ni ti,” a tia. Elisa rêkin chu, “Pathian hring le a hringna sâlin nang ki ti, nang om pe ual no ning,” a tia. Khanchu, Jeriko-a khan an fe suam nôk tâka.

⁵Khataka deipu rual omhai chu Elisa kuang an honga, “A vuan hin RENGPA’N ni pu hi a ilâk hrang a nih ti mo nin hriat?” an tia. Ama’n, “Kin hriat, dâihrek hi roi,” a tia.

⁶Elija’n Elisa kuang, “Hi hin lei om ro, RENGPA’N Jordan dunga fe hrangin a ni ti,” a tia. Elisa’n hiang hin a sâma, “Pathian hring le ni hringna hin, nang om pe no ning,” a tia.

⁷An fe nôk suama, deipu sômringa’n an zuia, hla vit ata an thîrhaia, Jordan dung kôla khan an ngîra.

⁸Elija’n a puan ar kheka, a thepin, vadung tui a vîka, a’rsen phata, tui tôn viat loiin an irkâna,

⁹Tui an irkân zoiin chu, Elija’n Elisa kuang, “Nangma rengata ilâkin ki om mân, imo nang tho pe inlân ni nuam?” a tia. Elisa’n, “Ni’rtha man bâk hni ang hi dong ki nuam,” a tia.

¹⁰Elija’n, “Thil intak tak ni izong a ni; khannisianlân, an ni lâk lai tak ni ni hmu’n chu chang ni ta, ni ni hmu no’n chu chang no chi ni,” a tia.

¹¹Fe puma an chong lai takin, mei sakor le mei tâli ikai an honga, an laia a senhai raka. Elija chu kêllaiherin irvân tiang an lâkin a vuangpui tâka.

¹²Elisa’n a hmua, “Ka pa, ka pa, Israelhai hruaitu inthang, ni ife tâk mo?” a tia. A hmu no tena chu, a puansilhai a kheka, bong hniin an potthêra.

¹³A chunga Elija puan zuang tâk chu a lâka, a kîr nôk ta. Jordan tui kôla khan a ngîra.

¹⁴A chunga Elija puan zuang tâk kha a lâka, tui kha a vîknaa, “Kho mo Elija Pathian RENGPA chu,” a tia. Tui a hei vîkin chu tui kha a’rsen phata, Elisa chu varâl a’rkân thei tâka.

¹⁵Jeriko-a om deipu sômringahaiin an hmua, “Elija irtha dong ang kha Elisa chunga a iom a ni ta hi te,” an tia.

¹⁶Ama irtongpui hrangin an fea, a makunga an khûksadela, “Irngai ro, mi hrâttak tak sômringa kin oma, ni pu chu RENGPA irtha’n a hruaia kho tiang tânga mo, phâia mo a imâksan rak a ni ngânin te, lungkham takin keini’n va zong kin ti,” an tia. Elisa’n, “Va zong no roi,” a tia.

¹⁷Elisa ta hranga inzak rak ang dôrin an ngên sikin, “Va fe roi,” a tia.

¹⁸Kha tena chu mi sômringahaiin sûn thum an zonga, hmu mahaia, Jeriko-a Elisa a om laiin an kîr nôka, “Fe no roi nangni ki ti kha te,” a tia.

¹⁹Jeriko khuaa mi a senkhathai Elisa kuang an honga, “Kin khua hi ni ihmu tâk angin kho hoitak a nia. Khannisianlân, kin tui fâk a sa no sikin nâi inhring thei ma ung,” an tia.

²⁰Ama’n, “Berbu thara michi se unglân, ni hong pe roi,” a tia. An lâk pea.

²¹Tuikuanghaia khan a fea michi a phul pehaia, “RENGPA’N tuihai chu a’rthiangtir tâka, tûte thi pai ta no chin ni,” a tia.

²²Atûn ten hin Elisa iti angin tuihai hi a irthiang tâk a ni.

²³Kha hmun ata kha Bethel khuaa a fe tâka; lampuia a fe laiin kho sûng rengata nâipang an honga, innuisanna hrang takin, “Lukol, lukol, kîr nôk ta ro,” an tia.

²⁴A hong irheiin chu a hmuhaia, RENGPA irhmingin khomâk a sâmhaia. Rampui ata savompui inhni an hong suaka, nâipang sômminli inhni an sê thathai zela.

²⁵Khatak ata chu Samari khua tiang a pan nôk ta.