Read Hrangkhol 2 RÊNGHAI 23 Bible Online

2 RÊNGHAI 23 - Hrangkhol bible

2 RÊNGHAI 23

¹Rengin Judai le Jerusalema upahai a bûmhaia.

²Judai le Jerusalema om ochai le deipuhai, mipuihai, inriang le irchonghai, an rêngin tempila an honga, kha tempila an ihrût thuthung bu kha rêngin an rênga inhriat hrangin a tep suaka.

³Ngîrna hranga an isiama khan rêng kha a ngîra, RENGPA hnungzuia a thupêk zôma, a thu’nkung le a thudikhai zôm hrangin RENGPA kuang thu an inkunga. Lungrîl pêk tak le diktakin thuthungna thu lekhabua chuanghai pom ngit hrangin an inkunga. Mipui murdihai khomin kha thuthung kha pom ngit hrangin an inkunga.

⁴Reng khan ochai inlaltak Hilkia le a hnuaia ochai danghai le mikot hrungtuhai khom RENGPA tempil sûnga Baal hai Aseri le vân ârsi an ibiakna thil tuidung irhôra khan a hâla, a’rvâm kha Bethel-a khan an chôitirhaia.

⁵Juda khopui le Jerusalem vêla nam dang pathian biakna hmun irsânga thil inhlantu hranga Juda rênghaiin ochai an lei isia, Baal kôla, misa le tha kôlhaia ârsi le irvâna thil omhai kôla thilinhlan murdi kha a mâka.

⁶RENGPA tempil sûnga pathiannu Aseri irlim an iphun kha a lâka, Jerusalem dâi Kidron irhôra khan a hâla, a’rvâm chu an hmet india, vântâng thânmuala khan an thek ta.

⁷Tempila notizuarhai omna, Aseri biakna hranga, nuhaiin puan an ikhôngna hmun khom a set pehaia.

⁸Judai ram sûnga khopui tamtaka Geba le Berseba kâra om ochaihai a hruaihaia, nam dang pathian ta hranga thilinhlanna hmunhai an siat pehaia, khopui lûtna vei tianga inkhâr, khopui optu Josua isiam mikot kôla maichâm kêlhai illim an ibiak ngai khom an siat pehaia,

⁹khaanga ochai lei changhai kha chu tempila Pathian biak phalhai maka, an rual ochai danghai kôla an bai chol pol loi man tum ti no chu fa thei mahai.

¹⁰Molekhai, an nâipasalhai an that thei ta loi hranga Hinom irhôra Tofet kha a soisak ngheka.

¹¹Juda rênghaiin misa ta hranga thil inhlan hrang sakor an ipêkhai kha chu tempil inkhâr tuala khan, sorkâr mi liantak Nathan-meleka omna in ata hla ok loiin an siahaia. Khahai kha hrêpaiin, a kaia an ikai ngai tâli chu a hâlpaia.

¹²Reng in le Ahaza in chung inzôla an maichâmhai le tempil sûnga maichâm inhni Manasea isiamhai leh khan a sutpaihaia an siat pehai vinga, Kidron irhôra a paia.

¹³Jerusalem nisua tianga oliv tâng sim tianga Sidon pathian intirom Asterothi illim, Moab pathian intirom Khemosa, Amon-hai pathian hmumâkom tak Milkoma illim an biakna hrang hmun irsâng Israel rêng Solomona isiamhai kha maimang an changhai vinga.

¹⁴Josia’n lungphunhai chu ar chûm khoihaia, pathiannu Aseri irlim kôla tûngsam thing an iphun khom a tan irkita; kha hmunhaia khan mihriam ru a sia pehaia.

¹⁵Israelhai hruai insualtu Nebata nâipa Jeroboama’n bethel khuaa Pathian biakna hranga maichâm a isiamhai khom Josia’n an siatpaia, a lunghai an khoihaia. Aseri irlim khom a hâlpaia.

¹⁶Josia’n a hei thîr vêla, mual inkhata khan thân a hmua, a choia, mihriam ruhai kha ar fuanga maichâma khan a hâla, Khaanga thil hong om hrang chu matona kût hmang laia rêng Jeroboama’n maichâma thil ar hlan laia deipu’n thil a lei insîr kha Josia’n a hei insâp vêlin chu kha laia thu lei insîrtu

¹⁷deipu thân a hmua, “Tu thân mo?,” a tia. Bethel khuaa mihaiin, “Judai ram ata hong deipu, hi ni thil thohai len sîrtu thân a ni,” an tia.

¹⁸Josia’n, “Inthem viat no roi, a ruhai khom hiang hin om chian ri se,” a tia. Khanchu a ruhai khom tûte’n inthem loiin an oma, Samari khuaa mi deipu ru khom ite inthem mahai.

¹⁹Israel ram hmun tina Israel rênghaiin nam dang pathian biakna hmun siamhai an siata, kha rênghai khan kêng RENGPA milung an inchuktir loi a ni. Bethel khuaa maichâm a insiat ang khan an siatpaia.

²⁰Khaanga sinthotu ochaihai a thata maichâma khan mihriam ru a hâla, Jerusalema a hong kîr nôk ta.

²¹Thuthung lekhabua irziak angin an Pathian RENGPA chôiindômna’n mipuihai chu ferkân kût hmang hrangin Josia’n a ti pehaia.

²²Hi zoroa kût roiinpui hi Israel rêng, Juda rêng tu roirêlna hnuaia khom la om ngai ma.

²³Khaangin Josia rêng kum sômhleiriatna kuma hin Jerusalema ferkân kût an ihmang a ni.

²⁴Ochai inlaltak Hilkia’n tempila dân lekhabu a imana chuang, dânhai chu an zôm theina hrangin Josia’n Jerusalem khua le Judai ram ata kutzia en theihai mi chinginrîla thi len tumhai ngai, in sûngkua pathian lei biakhai, millim le nam dang pathian biakhai khom an paitirhaia.

²⁵Lungrîl taka thutakin theitôp insuakin RENGPA sintho le Mosia dân zôm hi tian ata tu rêng khom la om ngai mahai, hi zoi khom hin a om khom om ta no nihai.

²⁶Reng Manasea sintho sika khan Judahai chunga RENGPA ning an mura, atûn ten khom hin a la inmur mai a ni;

²⁷“Israelhai chunga ki itho ang kha Judahai chunga khom tho ki ti, Judahai chu ki ihmu phâk loina rama inhnotsuakhai ki ti. Ki omna thân hmun, ki inkung tempil chu suaksan ki ti,” a ti a ni.

²⁸Josia sintho danghai chu Juda rênghai thurchi irziakna lekhabua a chuang.

²⁹Josia inlal lai hin Aigupta rêng Nekoa khan a sipaihai Eufrates tuia Assuria rêng changpui hrangin a hruaia. Reng Josia hin lei khâl a tuma. Megido le an irdoina hin a thi ta a ni.

³⁰A rualhaiin a ruak chu tâlia an bânga an chôia, rênghai thâna an phûm ta. Judahaiin Josia nâipa Jehoahaza kha rêngin an inthanga, hriak an pol tâka.

³¹Jehoahaza chu kum sômhni inthum a niin Judahai rêng a changa, Jerusalema tha thum an lala. A nu chu Libna khuaa mi Jeremia nâinu Hamutali a ni.

³²A puhai angin RENGPA mithmua thilsual a tho a ni.

³³Aigupta rêng Nekoa khan Hamath biala Ribla hmuna suakin an tânga, an lal zoro a ihêk a ni. Aigupta rêngin Judahai chu sumru her sângringa le rângachak her sômringa an chôitirhai a ni.

³⁴Reng Nekoa’n Josia nâipa inkhat Eliakima chu a pa irthûlin rêng an changtira, a’rhming a thûl pea Jehoiakima a iphua a ni, Jehoahaza chu Aigupta rama a hruaia a thi ta a ni.

³⁵Reng Jehoiakima chu Aigupta rêngin khâzana chôi an phûta, pe ngêt hrang mipuihai kôla ar chong an riang ti loiin an phûthai a ni.

³⁶Jehoiakima chu kum sômhniringa a niin Judahai rêng a changa; Jerusalema kum sômhleikhat an lala. A nu chu Ruma khuaa mi Pedaia nâinu Zebidi a ni.

³⁷A puhai ang dênin Jehoiakima’n RENGPA mithmua thilsual a tho a ni.