Read Hrangkhol 2 RÊNGHAI 4 Bible Online

2 RÊNGHAI 4 - Hrangkhol bible

2 RÊNGHAI 4

¹Deipu pâlkhat laia mi inkhat dôngma chu deipu Elisa kuang a honga, “Ka pu, ni siahlo ki pasal chu a thia, ni inhriat angin Pathian chi mi a nia; a lâkai len tângnapa’n ki nâipasal hni suaka intânga, ki pasal intângna tuam hrangin ni lâk pe hrangin ar siam,” a tia.

²Elisa’n, “Imo nang ki itho pe ta hrang! ni ina neinun sa ni inei mo a om” a tia. Ama khan, “Ite nei ma ung, oliv sahriak bûr chînte inkhat vai ki nei,” a tia.

³Elisa’n, “Fe’n lân ni tualbômhai bûr, ni theidôr va’rfuangin lân.

⁴Ni nâihai leh in irkhârkhum unglân, a bit dôr chu a bingin se thiai unglân,” a tia.

⁵A fea, a nâihai leh in an irkhârkhuma, bûr rong chu a nâihaiin an lâka, ama’n a thun insiphaia.

⁶An bûr irfuang a thun insip zoiin chu, “Bûr dang hong zong nôk roi,” a tia. Anni khan, “Bûr dang om ta ma,” an tia. Sahriak khom kha a kang tâka.

⁷Pathian mi kha a va hrila, ama’n, “Fe’n lân, sahriak kha va zuar ta ro, nin lâkaihai chu tuam unglân, a la zôk chu ni nâihai leh fa roi,” a tia.

⁸Sûn khat chu Sunam khuaa Elisa a fea; kha khuaa khan nupang irchongnu a oma. Elisa chu bunêk a koia, kha ni rengata chu Sunam khua a fe paiin chu, kha nu kuanga khan bu anh a fâk ngaia.

⁹A pasal kuang, “Hi ni hong hro ngaitupa hi Pathian mi irthiangtak chu nih a ti.

¹⁰Tho in sûnga a riakna hrang tentan siam pe inlân, zâlhmun, dokâng, le toihmun do pe inlân, a ni hong hro rikipa a omna hrangin,” a tia.

¹¹Sûn khat chu Elisa a hong nôka, a zâlhmun hranga tentana khan sôl a’rngama.

¹²Sunam nupangnu koi hrangin a hnungzui Gehazia chu a tîra, nupangnu chu a honga.

¹³Elisa’n Gehazia kuang, “Hi nu hin a nin ren bâka, imo ei itho pe ta hrang? Reng mo, sipai hruaitu chongpui a inuam mo a om irdon ro,” a tia. Kha nu khan, “Mâni irchipuihai laia om kêng ki nia, ite innang nei ma ung,” a tia.

¹⁴Elisa’n, Gehazia kuang, “I tak mo ki itho pe ta hrang?” a tia. Ama’n, “Nâipasal chu nei ma, a pasal lak a tar ok tâka,” a tia.

¹⁵Elisa’n, “Hin hong hi ri se,” a tia. A honga, mikota a ngîra.

¹⁶Elisa’n a kuang khan, “Nakum hiang tika hin chu nâipasal pom tah ni ti,” a tia. Kha nu khan, “Pathian mi ni nia, minlak thu ni hril no ro,” a tia.

¹⁷Elisa iti lam angin nâi a vonga, a kum nôk a phâkin chu nâipasal a nei tâka.

¹⁸Nâipang chu a hong lian tîr tîra, voikhat chu a pa kôla bu âttuhai leh an bu âtna hmuna a fea.

¹⁹A pa kuang khan, “Ki lu, ki lu,” a tia. A siahlo kuanga khan, “A nu kuang puakin lân fepui ro,” a tia.

²⁰A siahloin a nu kuanga puakin a fepui tâka, sûn sôt a nu’n a poma, a thi pe tâka.

²¹Elisa omna tentana a lûtpuia, a zâlhmuna an zâla; a suaka, in a khârkhuma.

²²A pasal a koia, “Siahlo inkhat leh sakuartung inkhat hong tîr ro, Pathian mi kuang la va fe hi rong, hong kîr nôk zôi ki ti,” a tia.

²³Ama’n, “Tha thar kût khom ni maka, Sabat ni khom ni ual maka, itho sikin mo a vuan sûn kher a kuanga fe ni inuam?” a tia. Khan ama khan, “Fe a nang a ni,” a tia.

²⁴Sakuartung chu ar siam infel zoiin chu a siahlo kuang khan, “A hrât thei dôra hrâtin sakuartung hi chalai ro; ite nang ki ti mâka chu ir-ial viat no ro,” a tia.

²⁵Elisa omna Karmel tâng panin an suaka. Hlataka an la om laiin Elisa’n a lei hmuhaia, a hnungzui Gehazia kuang khan, “En ro, Sunam-ah nupangnu kha a hong so,

²⁶a pasal le a nâihai chu an dam mo tiin lei va don lat ro,” a tia. Ama’n “Kin dam,” tiin a lei sâma.

²⁷Tânga Pathian mi kuang khan a tungin chu a ke a chel pe khaka, Gehazia’n, namirthîn a tuma, khannisian Pathian mi khan, “Ite tho pe no ro, a milung a na pe a ni, RENGPA lakin a ni thupa, ni la hril maka,” a tia.

²⁸Nupangnu khan, “Ka pu nâipasal mo nang ki nghi? ni huang no roh mo nang ki iti ni ma kha?” a tia.

²⁹Gehazia kuang khan, “Irsiamin lân, ki khianghrol hi chôiin lân fe roh. Mi ni irtokpui khom chubai mûk no’n lân, chubai nang an mûk khomin donhai viat no roh. Ki khianghrol hi nâipang hmâi chunga va’rnghat ro,” a tia.

³⁰Nâipangte nu khan, “RENGPA mithi le mihring irhming sâmin ki hril, ni hong no’n chu kei khom fe viat no ning,” a tia. Khanchu, a thoia nupangnu chu a zuia.

³¹Gehazia chu maton tiang a lei fea, nâipang hmâia khianghrol a lei khanga; khannisian ite danglam maka, a om balamin a om maia. Elisa irtongpui nôk hrangin a lei hong kîra, “Nâipang chu thoi ta ma,” a hong tia.

³²Elisa chu in a va tunga, nâipang chu a thia, a zâlna khan a lei zâla.

³³A lûta, an ruai vaiin an irkalkhuma.

³⁴Zâlhmuna khan nâipang chu an bokdela, a hmûr le a hmûr, a mit le a mit, a kut le a kut, a’rtôn irhlômpuia; khaanga a thopuiin chu nâipang takpum chu a hong lum irphuta.

³⁵Zâlhmun ata a chuma, hnuaia voihni vêl ar lôi zoiin a lui nôka, nâipang chunga khan an bok nôka, nâipang chu voisari a ha a hong riala a hong hring nôk tâka.

³⁶Gehazia chu a koia, “Sunamnu kha hong koi ro,” a tia. A hong koia, a zuangin chu, “Ni nâipa hi pom ta ro,” a tia.

³⁷A tentan sûnga khan a lûta a ke bula khûksadel pumin, a nâipa chu a pom suak tâka.

³⁸Voikhat chu, ram pumpuia châm a tâk laiin Elisa chu Gilgal-a a fea, deipuhai ar chutirhaia; a siahlo kuang khan, “Bêl lian kha lan lân, deipu irchulaihai fâk hrang inchuan ro,” a tia.

³⁹An laia mi inkhat chu rama, anh-a thâk sa hrang zong a fea, hruirâng i zât mani khôk a hong pom hluka, a zena anh-a khan a thâk sa tâka.

⁴⁰Fa hrangin an chomin chu, “Ei Pathian mihai an bêla hin tûr a om,” an tia, fa thei ta mahaia.

⁴¹Ama’n, “Baidi hong la nôk roi” a tia. Bêla khan a thâka, a mihai kuang khan, “Thur roi fa thei ta nin ti,” a tia.

⁴²Baal-salisa rengata mi inkhat a honga, Pathian mi chu bai dang (barli) sômhni le buvûi a hong chôi pea; “Hi mihai hi infatirhai ro,” a tia.

⁴³A siahlo khan, “Itina ni iti mo? hi tê leh hin ulian pâl irzakhat vêl an iruk hrang” a tia. Ama’n, “Sem phot ro, fa ri sehai, RENGPA’N fahai sian fa zoi no nihai a iti kêng” a tia.

⁴⁴Khanchu, a semhaia an fâka, RENGPA iti ang khan fa zoi loiin an om ta.