Read Hrangkhol 2 RÊNGHAI 6 Bible Online

2 RÊNGHAI 6 - Hrangkhol bible

2 RÊNGHAI 6

¹Deipu irchuhaiin Elisa kuang khan, “Kin omna in hi a chîn hrai sikin,

²Jordan tui kôla fe’n lân, ei omna hrang in lian ual zu sin kin ti,” an tia. “Fe roi,” a tia.

³Anni laia mi inkhatin, “Lungkham takin nang khom zuang ro,” a tia. “O, a ni le zuang ki ti,” a tia.

⁴An rêngin an fe tâka, Jordan dung an zu tungin chu thing an tana.

⁵Mi inkhat thing a tan lai takin, a hrei ar khek pea, tuia a tâk pea, “Ka pu itina hrang ma ni ta, mi ta kêng kin ihmang,” a tia.

⁶Pathian mi khan, “Kho taka mo a itâk?” a tia. A tâkna lai tak chu an khîk irhmua.

⁷Thing ôn a tana, a zu dêngnaa, hrei chu a hong kêlsuaa, “La ta ro,” a tia; a hon bana a lâk tâka.

⁸Suria rêngin Israel rêng doi a tuma, kho hmun tianghai hin mo an inruanghai hrang ti a rualhai leh an hrila.

⁹Pathian mi Elisa’n, Israel rêng kuang khan, “Hi hmunhai hin chu fe no roi, Suria rênghaiin nangni an inruang hrang kêng a ni,” a ti pe thiaia.

¹⁰Israel rêngin Pathian mi iti pena hmuna omhai chu a hrila, an le’rtûng irman vinga; voi tamtak an hrilhai a ni.

¹¹Suria rêng chu irmang a phana, a rualhai a koihaia, “Israel tianga kop ei laia hin tu mo a ini nin hril roi” a tia.

¹²A hruaituhai laia mi inkhat hin, “Keini laia hin hianga milung inchong inkhat lua om ma ung, an chungtakpu, Israel laia, deipu Elisa’n, ni in sûnga ni thu hril murdi khom, Israel rêng a ihril mai a ni,” a tia.

¹³Ama khan, “khôn mo a om va zong roi, mi tîr ki ta, va chel roi,” a tia. “Dothan khuaa a om” an tia.

¹⁴Khanchu, sakor le tâlihai irfûkin sipai tamtak a tîra, kha khua kha zâna an va irhuala.

¹⁵Pathian mi siahlo ruatharte an laia a ngîra, zînga a thoiin chu, a suaka sipai tamtak le sakor leh tâli hmangin an khua an irhual chu a hmua, a pu kuang khan, “Ka pu dik loi kêng a ni ta! itin mo ei itho ta hrang? eini tianga ni san hrang an tam,” a tia.

¹⁶Khan, Elisa’n, “Chi no ro, anni tianga kop nêkin eini tianga kop an tam ual,” a tia.

¹⁷Elisa a chongchaia, “O RENGPA ni mit ni zuang inmeng pe ta ro,” a tia. RENGPA’N ruathartepa mit chu a zuan vâr pea, a hmuhaia, Elisa omna hmun sak tiang pang chu mei sakor le mei tâli om rem rum a hmua.

¹⁸Elisa chu, RENGPA kuang a chongchaia, “An mit inchotir pehai ro,” a tia. Elisa iti angin an mit an chotir pehaia.

¹⁹Elisa’n an kuang, “Hi hi lampui ni mah, nin mihriam hong zong omna khua lak ni maka, a omna hmuna nangni hruai ki ti,” a tia. Samari khuaa a hruaihai tâka.

²⁰Samari khua an va tungin chu, Elisa’n, “O RENGPA hihai mit hi invâr pehaiin lân hmu ta ri sehai,” a tia. RENGPA’N an mit an vâr pehaia, an hmu thei tâka. An thîrin chu Samari khua a ni pehai tâka.

²¹Israel rêngin Elisa kuang, “Thatpaihai ning mo,” a tia.

²²Elisa’n, “Khandai le thala nin irdoipuia nin ichelhai lua that loiin te, an fâk hrang bu le tui pehaiin lân fâkin inhai sianlân, an pu kuang tiang inkîrtirhai ro,” a tia.

²³Bu tamtak a er pehaia, an nêka, an khop tena chu an suahaia, an pu kuang tiang an fe ta. Suria rêng sipaihaiin chu Israel ram chu doi ngam ta mahaia.

²⁴Zoro sôt ian hnunga chu Suria rêng Benhadada’n sipai a bukhaia, Samari khua panin ar hualpuihaia.

²⁵An irhual sôt tâk sikin Samarihai chu a sân an châm tâka, sakuartung lu inkhat hi tangka sômriatin an zuara, phervali gram khat irzahni hi tangka ringa man a nia.

²⁶Israel rêng chu kul bangbul irfangin a fea, nu inkhat hin, “Ni changpui ro, o rênginthang ki rêngpa,” a tia.

²⁷“RENGPA’N nang a san no’n chu bu le khura sahriak khom nei ta ma ung hi te,” a tia.

²⁸Rengin, “Imo ni itihna?” a tia. Ama khan, “Hi nupang hin ni nâi kha hong hruaiin lân, a vuan fâk ei ta, nangtûk ki nâi fa nôk ei ti, a tia.

²⁹Ki nâi chu kin suanga, kin fâk tâka. Nangtûk chu ni nâi hong hruaiin lân, fa ei ti ki tia; khannisianlân a nâi chu a thuppaia,” a tia.

³⁰Rengin kha thu kha a hon hriatin chu a puan an potthêra; kulbang ar fang maia, mipuiin an enin chu a puan hnuaia bora puan a sil chiana.

³¹“A vuan misa a tâk mân hin Safata nâipa Elisa lu hi ki lâk no zelin chu RENGPA’N a nuam a ningin ni soisak ri se,” a tia.

³²Elisa chu a in sûnga a toia, ulian danghai leh rêngin mi a tîra, kha an mi tîrpa tung mân Elisa’n ulianhai makunga khan, “Irngai roi, hi mi that ngaipa hin ki lu la hrangin mi a hong itîr a ni. A mi hong tîrpa chu in khârkhum unglân, lei danh khak roi. Kha a hong zuitu irhâi khan a pu rêng kalchôi irhâi mo ni mah?” a tia.

³³A lan sîr laiin rêng chu a hong tung zel tâka. “Hiang dôra chardong nin lâktirtu chu RENGPA a nia! itin mo RENGPA thu ki la irngai mai hrang,?” a tia.