Read Hrangkhol 2 RÊNGHAI 7 Bible Online

2 RÊNGHAI 7 - Hrangkhol bible

2 RÊNGHAI 7

¹Elisa’n, “RENGPA thu hi irngai hi ro, nangtûk hiang zoroa hin Samari khuaa baidi a sa chi her thum le barli bai her ruk, tangka sumru inkhat leh ircho thei nin ti, a iti kêng,” a tia.

²Reng hrung ngaitu sipai hruaituin, Pathian mi chu hiang hin a sâma, “RENGPA’N irvân tukver inhongin rua inthotir khomsian, khaang khan chu tung ual le irhoi ma!” a tia. Elisa’n, “A hmu chu hmu thei ni ta, fa thei ual no chi ni,” a tia.

³Samari khua pên tiang khan inphâr minli hi an oma, “Itho sika mo a thi ringot nghâkin ei iom hi?

⁴Kho sûnga lûtin lân, khano’nchu phîngchâmin ei ithi hrang kêng, hitaka om mai hi chu. Tho Suriahai hnuaia va irpelût ta ei ti, an nuam le ni thathai sian; a that tak chu ni ngam ual no nihai,” an tia.

⁵A zîngbup tena chu Suriahai kuanga fe hrangin an irsiama, Suriahai omna an va tungin chu tûte lei om mahaia.

⁶RENGPA’N Suriahai kha sakor tâli le sakor intân irhâi an hriattirhaia, “Israel rêng hin Hit rêng Aigupta rênghaiin ni doi hrangin an hong irsiam a ni hi,” an ti a ni.

⁷Khasika, a zîngbupa hin bâk lêng angin an isuak a nia, an in sakuartung le an in tuala thilhai mâksanin an irotsan pher phur a ni ta.

⁸Inphârhaiin tual an va tungin chu, in inkhata an lûta, an va thup irsiata, a danga an irthon nôka, khaang ngêtin an tho nôka.

⁹An chonga, “Ei tho dân hi a idik ta loi kêng. A vuan hin zoro a la om, ei dâihreka khovâr ei nghâkin chu an ni la isoisak hrang kêng; khasikin thurchi sa hi rêng in sûng mihai inhrilhai ei ti,” an irtia.

¹⁰Khua kul mikota khan an fea, mikot hrungtu kuang khan, “Suriahai tuala kin va fea, tûte lei om mahaia, tûte chongpui hrang lei om mahai. An sakorhai, an sakuartung chu an la khithaia, an inhai khom a om balamin a la om chiana,” an tia.

¹¹Mikot hrungtuhai kha rêng in sûnga an va fea, an hrilhaia;

¹²zâna rêng chu a thoia, a rualhai kuang khan, “Suriahaiin an ni irdoitir dân hi nangni hril ki ti. An khuaa kin châm hrang hi an inhriata, an in mâksanin ramkâra an irbîk nih a ti, kho sûng ata hong suak an ta, a hringin chelhai ei ta, an khua lua pehai ei tih an irti ni a ti,” a tia.

¹³A rualhai laia mi inkhatin, “Hi khuaa mi hi ei irchêk ok tâka, ei thi ok tâk sikin, sakor ringa ei la neia, a chunga chuang thei inthang ei ta, hi thu hi van fel ri sehai,” a tia.

¹⁴Mi an inthanghaia, rêngin sakor tâli inhni a pêkhaia, Suria sipaihai thurchi inhriat infel hrangin a tîrhaia.

¹⁵Kha mihai kha Jordan vadung an va dêna, Suria sipaihai puandiar mâk zen zun an va hmua, an hong kîr nôka rêng kuang an hong hrila.

¹⁶Samari mihai chu an khua ata an suaka, Suriahai hmun khuar chu an lût khumhaia. RENGPA iti angin baidi a sa zât her thum le barli her ruk, tangka sumru inkhatin an zuara.

¹⁷Israel rêngin ama hrung ngaitu sipai hruaitu kha mikot hrung hrangin a lei phun khera. Elisa hmu hrangin rêng leh an honga, a iti angin sipai hruaitu chu mipuiin an bôma a thi tâka.

¹⁸Elisa’n, “Nang, hiang tik zoro hin baidi a sa chi her thum le barli her ruk, tangka dârkhat man ni ti,” a tia.

¹⁹Kha sipai hruaitu khan, “RENGPA’N irvân tukver inhongin rua inthotir thei khomsian kha dôrpa kha chu intungtir ual no ni,” a tia. Elisa’n hiang hin a sâma, “A hmu chu hmu thei ni ta, a fâk chu fa thei no chi ni,” a iti a ni kha te.

²⁰Khaang khan a hong om tâka, khua kul mikot kha mipui an bita, an ihneng that a ni ta.