Read Hrangkhol 2 RÊNGHAI 9 Bible Online

2 RÊNGHAI 9 - Hrangkhol bible

2 RÊNGHAI 9

¹Kha zoroa khan deipu Elisa’n deipu ruatharte nâipang tak hi a koia, “Irsiamin lân, hi sahriak bûr hi chôiin lân, Ramot Gileada va fe roh.

²Ni va tungin chu Nimsia tupa Jehosafata nâipa Jehua zong suakin lân, a omna ina lûtin lân, a rualhai lai ata in sûngrîla hruai lûtin lân,

³a lu chunga hi oliv hriak hi buak pe’n lân, ‘RENGPA’N Israelhai rêng hrangin sahriak nang a ibuak a ni ta, tin lân. Mikot inhongin lân suakpatin lân, ir-ial ta no ro,’ a tia.

⁴Deipu ruatharte nâipang chu Ramot-gilead-ah khan a fea.

⁵A va tungin chu sipai hruaituhai an le’rbukkhôma. “Ni kuanga thu hril hrang ki nei, sipai hruaitu,” a tia. Jehua’n, “Kin laia hin tu hi mo ni ichongpui nuam?” a tia. Ama khan, “O sipaihai hruaitu nang kha ni nih nang ki ichongpui nuam chu,” a tia.

⁶A thoia, in sûnga a lûta, a lua sahriak a buaka, “Israelhai chunga rêng hrangin sahriak nang ki buak ta a ti a ni,” a tia.

⁷“Ni pu Ahaba in mihai that ni ta, ki siahlohai thisen, RENGPA siahlohai thisen Jezebeli insuakhai thisen phuba chu an chunga ki ilâk hrang a ni.

⁸Ahaba irchihai chu thatpaihai hlet ni ta, nâipang khom ulian khom pasal chu hek ving an ti.

⁹Ahaba in mihai chu Nebata nâipa Jeroboama in mihai le Ahija nâipa le Baasa in mihai ang khan soisakhai ki ti.

¹⁰Jezebeli chu Jezreel-a uihaiin a hme fa an ta; tûte a phûm hrang om loiin,” a tia. Inkhâr kha an honga, a suakpat tâka.

¹¹Jehua chu a puhai lai ata a hong suaka, mi inkhatin, “I thurchi ma ni tâk? mi’ntopa kha i lo hranga ni hong ihruai mo?” a tia. Jehua’n, “A izong chu nin inhriat kha te,” a tia.

¹²Anni khan, “Inhre ma ung dua, hril ro ba,” an tia. RENGPA’N “Israel rêng hrangin sahriak nang ki buak ta kêng a ni, a iti mo ni ma,” Jehua’n a tia.

¹³Sipai hruaitu danghaiin an puan an kheka, Jehua omna hrangin an dâpa, bekul an tuma, “Jehua hi rêng a ni ta,” an tia.

¹⁴Nimsia tupa, Jehosafata nâipa Jehua’n Jehorama chu a khitphiara.

¹⁵Jorama chu Suria rêng le Ramot khuaa irdoi lai khan sipai lei nei tâk a nia. Jezreel khuaa lei irngam hranga fe a ni, Jehua’n a rualhai kuang khan, “Keima tiang nin kopin chu Ramot khuaa irthokin Jezreel mihai kôla tûte thurchi hril hrangin insua no roi,” a tia.

¹⁶A tâli chunga a chuanga, Jezreel khua panin a fea, Jorama chu la dam infel maka, Juda rêng Ahazia’n a va pana a lei om lai tak a ni.

¹⁷Jezreel in irsâng chunga râl entu khan Jehua le a rualhai hong lai chu a hmuhaia, “Sakor chunga chuang mi tuhai mani ki hmu,” a tia. Jorama’n, “Râl an ini le ni loi eninfel hrangin sakor chuang thei mi inkhat va tîr roi,” a tia.

¹⁸An itîrpa chu Jehua hai omna a va tunga, “Rengin rual sa anga hong ni ini le ni loi an hriat nuam,” a tia. Jehua’n, “Nangma inhriat ite nang ma, hnung tiang khan fe nôk ro,” a tia.

¹⁹Râl hrungtu khan, “Mi honghai khan, ei mi tîr chu a va huanghaia, hong kîr nôk ta ma,” a tia.

²⁰An hruaitu khan, a tâli chu invêt angin a chalaia Jehua angin a om a tia.

²¹Reng Jorama’n, “Ki tâli sinsiam unglân,” a tia. An sinsiam zoiin chu Juda rêng Ahazia le an tâlihaia chuangin Jehua var hmupui hrangin an suaka. Nabota irhuana an va hmua.

²²Jorama’n, “Jehua, a sat lama ni ihong chu ma ni?” a tia. Jehua’n, “Ni nu Jezebeli’n millim biak le irdoi hmang thu inthang kâra hin thil sa lam hril hrangin itin mo a ini thei hrang?” a tia.

²³Jorama’n, “Ahazia hi, hi mihai hin that an itum a ni,” tiin a khêka, a tâli a kai irhêla, an tâna.

²⁴Jehua’n a thalngul chu a thei dôra irnak songin a kaidoka, Jorama hnung tiang a kâpa, a thalin a milung irbutak a va toka, a tâli chunga khan a thi tâka.

²⁵Jehua’n a hnung zuitu Bidkara kuang khan, “A ruak so Nabota irhuana pai roi. Jorama a pa Ahaba hnungzui, a sakor kin chuang laia Ahaba chungthu RENGPA ihril kha inhretir mai roh.

²⁶Nabota le a nâihai mizâna an thi dânhai kha kin hriat mai a ni; khasikin hi hmuna hin ki la isoisakhai hrang a ni; a iti kha, Jorama ruak chu a lâka, Nabota irhuan sûnga, RENGPA iti angin pai roi,” tiin a hnungzuitu kha a hrila.

²⁷Juda rêng Ahazia’n hi thilhai hi a hmu’n a tâli leh Beth Hagan tiang a fea, Jehua’n, a’rzûla, a rualhai kuang khan, “A tâlia chuangpu so that roi,” a tia. Ibleam kho kôla Gur pana a fe laiin an kâp inphopa, Megido tiang a fea; kha hmun khan a thipui tâka.

²⁸A rualhaiin a ruak chu tâli chunga chôiin Jerusalema an chôi tâka, Davida khopui rêng thâna, an phûm ta.

²⁹Ahaba nâipa Jorama kha Israel rêng kum sômhleikhat a ni kumin Ahazia hi Judai ram rêng a ni.

³⁰Jehua’n, Jezreel a hong tung ti Jezebeli’n an hriatin chu a mit an hânga, a sam sinsiam indanglamin rêng in irsângtak ata a thîra.

³¹Kul mikota Jehua hong lût lai khan, “Ama puhai thattu Zimria, khan a sat lama hong mo ni ni?,” tiin a khêka.

³²Jehua chu a hor heia, “A ni san hrang mo nin om?” a tia. Hruaitu inhni inthum tukvera an hong suaka.

³³Jehua’n an kuang, “Zuang namtha roi,” a tia. Khanchu, Jezebeli chu an namthâka, a thisenin a sûta, bang le sakorhai khom a sût chita, a ruak khom an inrâk phiar saa.

³⁴In sûnga Jehua a lûta, bu a nêka, “Kha nupang sualnu ruak kha phûm roi, rêng nâinu a ni sikin,” a tia.

³⁵Phûm hrang an va fea, a lu, a ru le a kut le ke ti no chu hmu hrang om ta mah.

³⁶Jehua an hong hril nôka, “A siahlo Tisbe mi Elija bâia RENGPA ihril, Jezebeli chu Jezreel khuaa uihaiin fa an ta,

³⁷an ifâk mihlia chu tu ruak mo a inih ti inhre thei loi rakin ar thek indara a iti kha a hong itung a ni ta,” an tia.