Read Hrangkhol 1 THURCHI SUINA 10 Bible Online

1 THURCHI SUINA 10 - Hrangkhol bible

1 THURCHI SUINA 10

¹Filistia le Israelhai chu Gilbo tânga an irdoia, Israel mi tamtak thatin an oma, mi danghai le Saula ineihai leh an intâna.

²Filistia haiin an phâkhaia, Saula nâi inthum Jonathana, Abinadaba le Malkisua, hai an thathaia.

³Saula chu a sate’n an doia, thal leh an kâpa a pop inna oka.

⁴Ruatharte a râlthuam chôitu kuang, “Ni khandai phôiin lân, ni that ta ro, Filistia mi sertan loihaiin nin dôi hrai an ti,” a tia. Khannisian ruathartepa khan a chi hrai sikin that ngam maka. Khasikin Saula hin a khandai a lâka a bingin ar vita.

⁵Ruathartepa khom khan Saula thi kha a va hmu’n chu, ama khandai a phôia ar vit that nôk ta a ni.

⁶Saula le a nâi inthumhai chu an thia an inlalna khom a hek ta a ni.

⁷A sipaihai an rota, Saula le a nâihai an thi ti an inhriatin Jereel phâia omhai khan khua kha an mâksana, Filistia mihai kha an honga an hong lua tâka.

⁸Zînga chu Filistia mihaiin an ithathai râlthuam irfuang hrangin an suaka, Gilbo tânga Saula le a nâihai ruak an va hmua.

⁹Saula lu chu an lâka, a râlthuam khom an lâka, khanchu Filistia ram hmun tina, hi thil lômom tak hi an milimhai le an mihai hril hrangin thanginthei an tîra.

¹⁰Saula râlthuamhai chu an Pathian tempila an siaa, a lu chu an Pathian Dagona tempila an târa.

¹¹Gilead rama Jabez khuaa mihaiin Filistia-haiin Saula an isoisak dânhai an inhriatin chu,

¹²an pasal sahai an irthok suaka, Saula le a nâihai ruak an var fuanga, Jabes khuaa an hong chôia, ama kha seso thing hnuaia an phûmhaia, sûn sari bu an ngheia.

¹³RENGPA ata an sin insiatna sikin Saula chu a thi tâka, RENGPA thu a zôm no sikin.

¹⁴RENGPA irhletpui loiin mithi irthahai irdon sikin RENGPA’N a irthattir a ni, a ram chu Jesaia nâipa Davida kuang a pêk ta a ni.