Read Hrangkhol 1 THURCHI SUINA 11 Bible Online

1 THURCHI SUINA 11 - Hrangkhol bible

1 THURCHI SUINA 11

¹Hebron khuaa Davida kuang Israel mi murdihai an fea, “Ni thisen irzompui kin nia,

²rêng Saula an lal lai khom khan Israel mihai chu irdoina hmuna ni hruaihai ngaia. RENGPA ni Pathian khomin, ki mi Israelhai hi ni kai hruaiin an roirêltu ni ni, tiin ni len kunga,” an tia.

³Israel hruaituhai murdi chu Hebron khuaa Davida kuang an fea, Davida’n RENGPA kuang khan an rêngin thu a thungpuihaia, hriak nâlin a oma, Samuela hmangin RENGPA inkung ang khan Israelhai rêng a ni tâka.

⁴Reng Davida le Israelhai chu an fea, Jerusalem khua an doia, kha zoro khan chu Jebus an iti ngai a ni, Jebus mi a phuta omhai khom an la iom mai a ni.

⁵Jebus mihaiin, “Kho sûng hong lût thei viat no chi ni,” an lei tia. Khannisian, Davida’n Zion kul chu a lâk tâka, kha kul omna mual kha, Davida khopui tih a ni ta.

⁶Davida khan Jebus mi a that masatak chu sipai ulian tak inchangtir ki ti, a tia. Jeruii nâipa Joaba khan doi hrangin a hruaihai tâka, sipai ulian tak a ichang a ni ta.

⁷Kha kula khan Davida a om tâk sikin Davida khopui ti a ni ta.

⁸Kha kul kha Milo an iti tâng sak tiang irhôra irnêng tukinchamin a siama, a danghai chu Joaba’n a sunzom nôk ta a ni.

⁹Reng Davida chu a hrât tîr tîra, itinrêng chunga RENGPA’N a ompui mai a ni.

¹⁰Hihai hi Davida sipai irhming inthanghai chu an ni, Israel mi danghai le Pathian chonginkung angin Davida chu an inlaltir oka, a ram khom an iroiinpuitir a ni.

¹¹“Pasal sa” inthum an iti laia a hruaitutak chu a doihaia, voikhat rengin a thathai vinga.

¹²Pasal sa inthumhai laia inkhat nôk chu Ahoa irchi Dodoa nâipa, Eleazara a ni. Pas-damim-ah Filistia-hai le Davida hai an irdoia.

¹³Annihai hi Davida tianga kop an ni. Barli hmuna an om laiin Israelhai chu an rota.

¹⁴A nâihai leh an ngîra, Filistia-hai an thathaia, RENGPA’N an hnêtir a ni.

¹⁵Sûn khat chu Davida omna Adulam khura, pasal sa sômthumhai leh an oma. Filistia pâl khathai chu Refa-hai omna phâia om hmun an khuara.

¹⁶Kha hmuna an om laiin Davida om lai takin Filistia mihai chu Bethlehem khua an irhuala.

¹⁷Davida’n chu a omna khua Bethlehem a sân ar ngaia, “Bethlehem mikot bula tuikuang tui ni va chôi pe thei hrang omhai sianlân chu o,” a tia.

¹⁸Pasal sa inthumhaiin Filistia sipaihai chu khêlhaiin, Bethlehem kul mikot bula tui chu an va thâla, Davida an hong pêka; khannisian lei in nuam nôk maka. RENGPA kuang inhlanin a ibunpai a ni.

¹⁹“Hi tui hi in thei no ning mihai thi irhuamhai thisen kêng ki i-in hrang, thi irhuama an va ichôi a ni sikin,” a tia.

²⁰Joaba upa Abisaia chu, “Pasal sa sômthumhai” laia a hruaitutak a ni. Ufei leh mi irzathum a doihaia, a thatpai vinga, ar hming satna a hlo a ni.

²¹Pasal sa sômthumhai laia irhming inthang tak a nia, an ulian tak nina a chang ta. “Pasal sa inthum” an itihai laia chu la chang thei ma.

²²Kabzael khuaa pasal sa; Jehoiada nâipa Benaia khomin thil irkhêl tak a thoa. Moab isong takhai mi lian inhni a thathaia, ivur tâk lai takin kâmkeibaknei a khura a that sa a ni.

²³Aigupta mi pumlian tak, mûk ringaa dung sei a that sa a ni. Hi pa hin zaper dôra lian ufei a hmanga, Benaia hin chu hmoltôk hmangin a doia, a ufei a sutpaia, kha a ufei leh khan Aigupta mipa kha a isun that a ni.

²⁴Pasal sa sômthum laia mi Jehoiada nâipa Benaia’n hi thilhai hi a itho a ni,

²⁵khannisian, “Pasal sa inthumhai” laia chu la chang thei ma, Davida’n ama hrunghai laia hruaituin an omtira.

²⁶Pasal sa danghai, Joaba sangpa Asahela, Bethlehem mi Dodoa nâipa Elhanana,

²⁷Haror mi Samota, Pelon mi Heleza,

²⁸Tekoa mi Ikesa nâipa Ira, Anathot mi Abiezera,

²⁹Husa mi Sibekaia hai, Aho mi Ilaia hai,

³⁰Netofa mi Maharaia, Netofa mi Baana nâi Heleda,

³¹Benjamina irchia mi Gibea khua mi Ribaia nâi Itaia, Pirathon mi Benaia,

³²Nahalegaas mi Huraia, Arbat mi Abiela,

³³Bahurum mi Azmaveta, Saalbon mi Eliaba,

³⁴Gizon mi Hasama, Herar mi Sagea nâipa Jonathana,

³⁵Harar mi Sakora nâi Ahiama, Ura nâi Elifala,

³⁶Mekerat mi Hefera, Pelon mi Ahija,

³⁷Karmel mi Hezrua, Ezbaia nâi Naaraia,

³⁸Nathana sangpa Joela, Hagria nâi Mibhara,

³⁹Amon mi Zeleka, Berot mi Naharaia hi Zeruii nâipa Joaba râlthuam chôitu a ni.

⁴⁰Ithra mi Ira le Gareba,

⁴¹Hit mi Uria, Ahlaia nâi Zabada,

⁴²Siza nâi Adina, ama hi Reubena irchi laia hruaitu a ni, a’rchia mihai hruaiin, mi sômthumhai le;

⁴³Maaka nâi Hanana, Mithna mi Josafata.

⁴⁴Asterat mi Uzia, Aroer mi Hothama nâi Sama le Jeiela,

⁴⁵Tiz mi Simria nâi Jediaela le a sangpa Joha, Mahava mi Eliela,

⁴⁶Elnaama nâi Jeribaia le Josavia, Moab mi Ithma,

⁴⁷Eliela, Obeda, Mezobia mi Jaasiela an ni.