Read Hrangkhol 1 THURCHI SUINA 16 Bible Online

1 THURCHI SUINA 16 - Hrangkhol bible

1 THURCHI SUINA 16

¹Thuthung Bôm chu Davida isinsiam puan ina an irzôn lûta, an sia tâka. RENGPA makunga hâlirvôm thilinhlan le fâk suam thil an inhlana.

²Davida’n thil ar hlan zoiin chu RENGPA irhmingin mipuihai ta hrangin satvurna a pêkhaia; fâk hranghai a sem pehaia.

³Israel rama mi murdi nupang le pasal an rêngin, bai tiam khat le sa rô sai tinte kha khatin, grep tui kop chînte te a pol pehaia.

⁴Thuthung Bôm kôla RENGPA biakna hruaia, inpâkna hlasak hrangin Levi irchia mi senkhathai chu Davida’n an thanghaia.

⁵Asafa chu an hruaitu tak a nia; Zekaria hi a hnuai renga mi a ni; Jeiela, Semiramota, Jehiela, Matithia, Eliaba, Benaia, Obed-edoma, Jeiela hai chu perkhuang le belem tum hranga an ni, Asafa chu têngrep inring taka suk hrang a ni.

⁶Ochai inhni, Benaia le Jahaziela chu Thuthung Bôm kôla a kakâra bekul tum hranga inkung an ni.

⁷Asafa le ar chia mi Levi irchihai chu RENGPA inpâkna hlasak kaihruaitu hranga inkung masa taktu chu Davida hi a ni.

⁸RENGPA chunga lômthu hril unglân, ar hming irlam ngai roi. A sintho hi nam tinrêng hrilhai roi.

⁹Ama inpâkin sak unglân, Thil irkhêl a ithohai hi hrilhai roi.

¹⁰A’rhming irthiang hi song unglân, RENGPA zongtuhai chu raiinfân ri sehai.

¹¹RENGPA zong unglân, a hrâtna zong roi, ama hi pan mai ngai roi.

¹²A sintho roiinpui takhai le, thil irkhêl a itho le a roirêlnahai kha, inhre mai ngai roi.

¹³O, a siahlo Israel irchihai, A inthang Jakoba nâihaio inhre mai roi.

¹⁴Ama hi RENGPA kin Pathian a ni, Rammual pumpuia roirêltu a ni.

¹⁵A thuthung chu inhre mai roi, irlo tin tin hranga a thupêkhai chu.

¹⁶Abrahama kuanga a thuthung le Isaka kuanga a chonginkung chu a inhriat mai a ni.

¹⁷Khahai kha Jakoba irchihai dân hranga namindet a ni. Israelhai kumtuanga thuthung hrangin.

¹⁸“Tho Kanaan ram hi nangni pe ki ti nin irchon a ni theina hrangin,” a tia.

¹⁹Ite ual ni loi, mikhual ma mai an ni lai khom khan,

²⁰Nam tinrêng laia chaninvâiin, kho tin sirin an irthona.

²¹Khannisian, tûte hrilsiat phal ni maka, Annihai sikin rênghai an irchutirhaia.

²²“Ki sahriak irthûtir hi, inthem no unglân, ki deipu hi ite irkôk no roi,” a tia.

²³Rammuala mi murdihaio, RENGPA inpâkin hla sak roi. a ni saninzôkna thu hi a nitin inpuang roi.

²⁴A roiinpuizia hi nam tin laia hril unglân, Mi tin laia thil irkhêl a ithohai hi inpuang roi.

²⁵RENGPA chu a roiinpui sikin, inpâk mai hrang a ni, pathian danghai nêkin inza hrang a ni.

²⁶Nam dang pathianhai chu a’rlim hrang vai a nia, RENGPA hi chu irvân siamtu a ni.

²⁷Roiinpuina le chôiindômnahaiin a tuama, a hmun irthiang chu, sinthotheina le lômnain a sip.

²⁸Rammuala nam tinrênghaio, RENGPA chu inpâk unglân, RENGPA roiinpuina le hrâtna chu inpâk roi.

²⁹RENGPA irhming roiinpui chu inpâk unglân, thilpêk hrang chôiin a ina hong lût roi. Irthiang le enhoi taka irvoin, RENGPA makunga hong kûn roi.

³⁰Irnêng mi murdihaio, a makunga hin inthing unglân, inhnîng loi hrangin irnêng hi a idet a ni.

³¹Irvânhaio raiinfân roi, o irnêng nang khom lômin lân, RENGPA hi rêng a nih ti nam tin hrilhai roi.

³²Tuikhanglian le a sûnga omhai chu khêkhai sianlân, ram le a sûnga omhai khom raiinfânin.

³³Rampuia thing murdihai khom châng sup sup ri sehai, Irnênga roirêl hrangin a zuang tika chu.

³⁴RENGPA hi a sa hrai sikin lômthu hril roi; Kumtuanga phûkdâi a ni sikin.

³⁵O, RENGPA kin Pathian, ni sansuakin lân; nam danghai lai ata ni hruai nôk roh. Ni’rhming irthiang inpâkin roiinpui takin nang chôiindôm kin ti.

³⁶RENGPA Israelhai Pathian chu inpâk unglân, Kumkhua, kumkhontuangin inpâk roi, Mi murdihaiin “Amen,” an lei tia, RENGPA chu an inpâka.

³⁷RENGPA Thuthung Bôm an isiana hmuna Pathian biak inkhôm hruaitu Asafa le ar chipui Levi irchihai chu Davida’n a sia indethaia, an sin a hong ni tâka.

³⁸Jeduthuna nâipa le ar chipuihai mi sômruk inhnihaiin an sanhai ngaia. Hosa le Obed-edoma chu mikot hrungtu an ni.

³⁹Ochai Zadoka le a ochai chanpui danghai chu RENGPA an biakna hmun Gibeon khuaa inkhômna hruaitu an ni.

⁴⁰Israelhai kuanga RENGPA thupêk, RENGPA dân bua irziak angin a zîng a zâna maichâma hâlirvôm thil an inhlan ngai hrang a ni.

⁴¹Hemana le Jeduthuna khom mi dang irtansuakhai leh an omsuama, a lungkhamna hek ngai loiin, RENGPA inpâkna hla sak hrang an ni.

⁴²Inpâkna hla an saka lei irfûktir hrang bekul, têngrep le irhâihoi danghai tum tianga hruaitu Hemana le Jeduthuna hai hi an ni. Jeduthuna irchipuihai chu inkhâr enkoltu an ni.

⁴³Mi tin an in tiang an fea, Davida khom a in mihai uap hrangin a fe tâka.