Read Hrangkhol 1 THURCHI SUINA 18 Bible Online

1 THURCHI SUINA 18 - Hrangkhol bible

1 THURCHI SUINA 18

¹Zoro sôtnotea chu Filistia-hai chu Davida’n a doihaia, an hnêhai tâka, Gath khopui le a kôlvêl khuaa omhai chu a sutpaihaia.

²Moabhai khom an hnêhaia, a thu hnuaia an oma, ama kuang khâzana an bê tâka.

³Hamath tianga, Zoba rêng Hadatezera’n Eufrates tuidung hmâr tianga ram lua a tuma, a doi sikin Davida’n a rûna.

⁴Davida’n a sakor tâli sângsari le sakor chung chuang mi sângsari le kea fe sipai sînghni a chelpai pea. Tâli irzakhat kai tôl thei hrang sakor a hôihaia, a danghai chu an ke irthahrui an satpai pehaia.

⁵Suria mi, Damaska rêngin Hadadezera chu san hrangin sipai a tîra. Davida’n a lei doia, sipai sînghni le sânghni a lei thatpai pea.

⁶Suria rama khan sipai a siahaia, Davida khua le tui an chang tâka, a kuang khâzana an chôi tâka, RENGPA’N Davida chu kil tina an hrâttira.

⁷Hadadezera hai rângachak pho a lâkpai pehaia, Jerusalema a chôia,

⁸Hadadezera khua Tibhat le Kun khua ata khom dâr tamtak a lâka; kha leh khan Solomona tempila tuipanghai, dâr chopuihai le bêl a siama.

⁹Hamath khuaa rêng Toia khan Hadadezera le a sipaihai chu Davida’n an hnêhai ti a len hriata.

¹⁰Toia le Hadadezera an le’rdoi mai ngai tâka, Davida hin an hnê tâk sikin lei don hrang le lômpui hrangin a nâipa Jorama chu Toia hin a tîra. Jorama hin rângachak hai, sumru hai, le dâra siam tamtak a pêka.

¹¹Edom hai, Moab hai, Amon hai, Filistia hai le Amalek hai a sutpaia, rângachak hai, sumru hai le dârhai chu Davida’n tempil sinna hrangin a pêkpai vinga.

¹²Zeruii nâipa Abisaia’n michi khur irhôra Edom-hai a soisaka, mi sîngkhat sângriat a thathaia.

¹³Edom rama sipai a siahai hluka, Davida khua le tui an chang zoi ta. RENGPA’N Davida chu khô hmuna khom an hrâttir mai ta.

¹⁴Davida chu Israelhai rêng a ni tâka; tûte theibîk boiin roi a rêl ngaia.

¹⁵Zeruii nâipa Joaba hi sipai hruaitu inlal tak a nia, Ahituba nâipa Jehosafata chu ziaktu lian tak a nia.

¹⁶Ahituba nâipa Zadoka le Abiathara nâipa Abimeleka chu ochai hruaitu an ni; Seraia chu ziaktu a ni.

¹⁷Jehoiada nâipa Benaia chu Keret le Pelet, rêng hrungtuhai hruaitu a ni. Reng Davida nâipahai khom a ram sûnga mi lian ta tak an ni.