Read Hrangkhol 1 THURCHI SUINA 19 Bible Online

1 THURCHI SUINA 19 - Hrangkhol bible

1 THURCHI SUINA 19

¹Khan Amon rênghai Nahasa chu a thia, a nâipa’n a’rthûl a changa.

²Davida’n, “Khôn mo, Nahasa khan a nin rena, a nâipa Hanuna inren hrang hi ki intâng a ni,” a tia. A pa râl hrangin mi a tîra. Hanuna râl hrangin Davida siahlohai an fea, Amon-hai rama Hanuna in chu an va tunga.

³Amon mi lianhaiin Hanuna kuang khan, “Davida hin sûnpui ta taka râl hrangin mi hong tîr hrangin ni iam mo? Ei ram hi an lâk theina hrangin a siahlohai hi eninrûk hranga a hong itîr a ini loi ma ni?” an tia.

⁴Davida palaihai chu Hanuna’n a chelhaia, an hnermul a voipai pehaia, an songkol irfualhai khom an kong tena a tanpai pehaia, an fetirhaia.

⁵An lei isoisak dân chu Davida inhril hrangin mi an tîra, anni chu an inzak luatin, rêng kuang fe an chia, Davida’n, “Jeriko khuaa om unglân, nin hnermul a sei nôk ual tena la hong ta roi,” tiin mi he a bêhaia.

⁶Reng Hanuna le Amon mihaiin Davida ningmur dân an inhriatin chu Mesopotamia rama mihai le Suria rama Maaka le Soba mihai sakor tâli le sakor chung chuang lana hrangin tangka her sîngthum sângminli an pêka. Tâli sîngthum sânghni an hruaia, annihai leh khan Maaka rêng le a sipaihaiin Medeba kula riakbuk an khuara.

⁷Amon mihai khom kho tin ata irdoi hrangin an hor thoka.

⁸Kha kha Davida’n a len hriata, a sipai hruaitu Joaba chu a koia, a sipai hrât pâlhai a bukkhômhaia.

⁹Amonhai chu an irsiama, an rêng omna khopuia Raba kul pên tiang omhmun an khuara; anni tianga kop rênghai le sipai lei sinhaiin ramri bulhaia hmun an siama.

¹⁰Joaba’n a maton tiang le a hnung tianga râlhaiin hong doi a tih ti an hriatin chu, a sipai sa ualhai chu an thang suakhaia, Suria ram ata sipai hong doi hrangin an irtângtirhaia.

¹¹Sipai danghai chu a upa Abisaia an hruaitira, Amon-hai doi hrangin an irtânga.

¹²Joaba’n, “Suria rama mihai kin hnê no’n chu ni hong sanin lân, Amon-hai nin hnê no’n chu nang hong san ki ti,

¹³a sân irnak songin lân, ki mihai le ki Pathian omna khuahai sansuak ei ti. RENGPA’N chu a sa a iti lam angin ni lei san a ti,” a tia.

¹⁴Joaba le a mihaiin Suria mihai an doia, inhnê loiin an rot tâka.

¹⁵Amon mihaiin Suriahai rot an hmu’n chu Joaba upa Abisaia kuang an rota, an khua kul sûnga khan an lûta, Joaba’n Jerusalem tiang a rotsanhaia.

¹⁶Suria mihaiin Israelhai chu ngam mahai ti an inhriatin chu Eufrates tui varâla Suria mi danghai chu an punga, Zoba rêng Hadadezera sipai hruaitu Sofaka hai an hong irthoka.

¹⁷Kha thu kha Davida an hrila, Israel mihai a bukhaia, Jordan an irkâna, an omna a va tunga. Suriahai kha an hong doi tâka.

¹⁸Davida’n tâli chalaituhai sângsari a thathaia, kea fe sipai sîngminli hai le an hruaitu Sofaka khom a that saa.

¹⁹Hadadezera haiin Israelhai chu ngam mahai ti an inhriatin chu, Davida leh an chonga, irngeiin a khua mi le sa an chang ta. Suria mihaiin Amon-hai khom san nuam ta mahai.