Read Hrangkhol 1 THURCHI SUINA 20 Bible Online

1 THURCHI SUINA 20 - Hrangkhol bible

1 THURCHI SUINA 20

¹Kum a hong thara, fûr a hong nâia, rênghai ram en zoro a hong nia. Joaba’n sipai a hruaia, Amon-hai ram a va doia. Reng Davida chu Jerusalema a la oma. Raba khua an irhuala, an rûna an insiata.

²An Pathian irlim Milkoma lukhum chu rângachak her sômthum minlia rik a nia, lunghlu khom a kop saa; kha kha Davida khomin a rêng lukhuma khan a phûm saa. Kho sûng ata thil tamtak râllâk sum a lâka.

³Kha khuaa mihai kha thing ât, âlkai le hreia thing tanin a hmanghaia. Amon mi kho danga mihai khom khaang dênin a hmanghaia, a rualhai leh Jerusalem tiang Davida chu a kîr nôk tâka.

⁴Zoro sôtnotea chu Filistia mihai le Gezerak an irdoi nôka, Hamath mi Sibekaia khan Filistia mihai laia mi lian irchi Sifaia a thata, Filistia-hai chu an dok tâka.

⁵Filistia mihai leh an irdoi nôka, Jaira nâipa Elhanana’n Goliatha sangpa Lahmia, Gath khuaa mi chu a thata, kha ufei kha zaper dôra lian a nia.

⁶Gath khuaa hin irdoina a oma, mi lian inkhat kutpâr kiruk nei le kepâr kiruk nei hi a oma, tianlaia mi lianhai irchi a nia.

⁷Israelhai chu a othaia, Davida upa Simeia nâipa Jonathana’n a lei thata.

⁸Davida le a pâlhai ithat mi lianhai hi Gath khuaa om, mi lianhai irchihai an ni.