Read Hrangkhol 1 THURCHI SUINA 21 Bible Online

1 THURCHI SUINA 21 - Hrangkhol bible

1 THURCHI SUINA 21

¹Setana’n Israelhai soisak a nuama, Davida’n Israelhai kha irtepna a neipuihaia.

²Joaba le hruaitu danghai laia, “Israel ram hi a kil khôra Beerseba rengata Dan dênin irfang suak ving unglân, Israel mi iza mo an iom irziakhai ving roi,” a tia.

³Joaba’n “RENGPA hin atûna Israel omhai nêka tam inomtir a ta; ka pu nangma mihai an nia, itho ual sikin mo hi thil hi ni ni inphût, kin nam pumpuiin thei loi kin ichang hrang anga?” a tia.

⁴Khannisian rêng thu kha a len thang tâk sikin Joaba’n Israel ram chu ar fang suaka, Jerusalema a hong kîr nôka.

⁵Joaba’n Israel mi om zât chu a hrila. “Sipaia chang thei zât mi nuai sômhleikhat Israel rama an oma, Judai rama nuaiminli le sîngsari an om,” a tia.

⁶Reng thu kha a zômpui no sikin Joaba’n Levi irchi le Benjamina irchia mihai kha tep sahai maka.

⁷An sin thôna kha Pathianin lôm maka, Israel mihai kha a hremhaia.

⁸Davida’n Pathian kuang, “Thil ki tho inchâia, invêtom tak a ni, ni ngaidam ro,” a tia.

⁹RENGPA’N Davida deipu Gada kuang,

¹⁰“Fe’n lân, lam inthuma kho tak hi mo an thang nuam, a inthang tak hi tho pe ki ti a tih ti Davida kha va hril ro,” a tia.

¹¹Gada kha Davida kuang a fea, RENGPA thuhril kha a van sîr pea, “A kho tak hi mo ni inthang nuam hril ro,

¹²kum thum châm tuang hi mo, tha thum râl irzûl mo, sûn thum RENGPA vântîrtônin Israel ram pumpui khandaia soisak le hria hrem? RENGPA ni tîrtu kha itin mo ki lei isâm hrang; irngaitua’n lân, ni hril roh,” a tia.

¹³Davida’n Gada kha hiang hin a ti pea, “A’rngai lam reng inhre ma ung! Mihriamhai kuttum tuang nuam ma ung, RENGPA kuttum tuang ki nuam ual, ama chu phûkdâi a ni sikin,” a tia.

¹⁴Khanchu Israelhai laia hri a hon lêngtira; mi sîngsari an thia.

¹⁵RENGPA’N Jerusalem insiat hrangin vântîrtôn a zuang tîra, nuam nôk maka, vântîrtônhai kuang khan, “A ruk ta, tho ta no ro,” a tia. Khan vântîrtôn kha Jebus mi Arauna hruizôla khan vântîrtôn kha a ngîra.

¹⁶Davida’n a hong ena, Jerusalem insiat hrang vântîrtôn khandai chôi, irnêng le irvân kâra ngîr a hmua, Davida le mipui hruaituhai khan bora puan an sil vinga, hnuai enin an kûna.

¹⁷Khan Davida a chongchaia, “O Pathian, thil sual thotu chu keima hi ki ni; irteppui kha ki inthotir a ni; hi mipui ite inhre loihai hin ite tho inchâina nei mahai. Keima leh ki in mihai hi ni hrem ta ro, ni mihai hi chu hôihai ro,” a tia.

¹⁸RENGPA vântîrtônin Gada kuang khan, “Davida chu Jebus mi Arauna hruizôla maichâm sin hrangin hril ro,” a tia.

¹⁹Davida’n RENGPA thu a zôma, Gada hril angin a fe tâka.

²⁰Hruizôla khan Arauna le a nâipa minlihai khan gohu an lei chîla, vântîrtôn an hmu’n chu an lei irbîka.

²¹Arauna’n Davida hong a hmu’n chu hruizôl ata kha a zuang chuma, hnuai en pumin chubai a mûka.

²²Davida’n, “Hri a om loina hrangin ni hruizôla hin maichâm siam ki ti, nir chotirin lân, a man nang pe ki ti,” a tia.

²³Aruana khan, “Ka pu la ta ro, a sa ni iti lam tak ni ta ri se. Maichâma thilinhlan hrang sehrâtchal khom a om, a hâlna hrang thing khom a om ving ta; baidi thilinhlan hrang bai khom nang ki pêk sa, itinrêng tum ving ki ti,” a tia.

²⁴Reng Davida’n a sâma, “Ni ma, a man dik tak nang pe ki ti, RENGPA ta hranga thilinhlan hrangin ni ta ite a man boiin la no ning; a man boiin hâlirvôm thilinhlan hrang khom inhlan no ning,” a tia.

²⁵Davida’n Arauna chu a hruizôl mana khan rângachak tangka irzaruk a pêka.

²⁶Kha hmuna khan RENGPA hrang maichâm a siama, hâlirvôm thilinhlan le irngeina thilinhlan an hlana. A chongchaia, RENGPA’N a zuang sâma, maichâma hâlirvôm thilinhlan chu irvân ata meiin a zuang kâng inhekpaia.

²⁷RENGPA’N vântîrtôn khandai kha khâipai hrangin a hrila, a iti angin a thoa.

²⁸RENGPA’N a chongchaina a sâm a nih ti Davida’n an hriata, Arauna hruizôla maichâma khan thil an hlan tâka.

²⁹Kha laia khan Biakbuk in le thilinhlanna maichâm Mosia isiam kha Gibeon-ah a la om maia;

³⁰khannisian, RENGPA khandai tuang a chi sikin Pathian biak hrangin khatak khan Davida chu fe ngam loiin a om tâka.