Read Hrangkhol 1 THURCHI SUINA 22 Bible Online

1 THURCHI SUINA 22 - Hrangkhol bible

1 THURCHI SUINA 22

¹Davida’n, “Hi zoro hin, RENGPA, Pathian tempil chu a iom hrang a ni. Hi maichâm hi a ni Israelhaiin hâlirvôm thil an inhlanna hrang chu,” a tia.

²A ram sûnga nam dang om murdihai chu Davida’n a bukhaia, sintho hrangin a hmanghaia, senkhatin tempil sinna hrang lung an tuka.

³Mikota hmang hrang thîr a kalna hai, kopza le thîr tamtak le dâr tamtak, var zoi loi dôra tam an suktirhaia.

⁴Tura le Sidon mihai chu sidar thingngol tamtak zuang chôi hrangin a ti pehaia.

⁵Davida’n, “Ki nâipa Solomona sin hrang tempil chu roiinpui tak, rammuala irhming inthang a ini hrang a ni. A la nâipanga, a duk a dak lan hre maka, a irzukna lan suaktir pe ki ta,” a ti lungrîla. Khanchu a thi mân tempil sinna hrang hrâtna tamtak a lei irfûktir pe a ni.

⁶A nâipa Solomona chu a koia, RENGPA Israelhai Pathian hrang tempil sin pe hrangin a hrila.

⁷Davida’n, “Kei khomin ki Pathian RENGPA irhmingin a sin ki nuama.

⁸Khannisianlân, RENGPA ina thisen nin suaktir hrai, irdoi lak ni uara, nangma sikin irnênga thisen luang ki hmu intam hraia; nangin chu ki in sin thei no chi ni.

⁹Irngei nuam tak nâipasal Solomona ni neia, ar hming hi, irngeina ti a ini angin a kôl vêla râlhaiin irtharngam takin kin omtira, an lal sûngin Israel ram râl irvei no nia, irtharngam takin om a ti.

¹⁰Ama’n keima in hrang sin a ta, keima hrangin nâipasal nih a ti, ama hrangin a pa ni ki ti; Israelhai laia rêngtoihmun chu kumkhontuanga hrangin indet ki ti, tia a ni ihril a ni.

¹¹“Khasikin, ki nâipa, RENGPA chu ni kuang om sianlân, sat nang vur ri se, a iti ang ngêtin RENGPA ni Pathian in hrang chu sin ri se.

¹²Vârna le hmangrua inhriat theina nang pe sianlân, Israel mihai chu RENGPA ni Pathian dân hrangin roirêl pehai thei ni ti.

¹³Israelhai hranga RENGPA thu’nkunghai le dân, Mosia ihrilhai kha, zômin lân, itinrêng lama hlochuk ni ti. Hâi takin irnak songin lân; chi viat loiin, ni beiindongtir no roh.

¹⁴RENGPA in sinna hrang rângachak her sîngthum le sângminli, sumru her nuaithum sîngminli, ki lei irtik zazâm sai, dâr le thîr vâng chu var zoi loi, thing le lung khom ki lei ibuk sai la lâk sa a nang hrang khoma.

¹⁵Sintho hrang mi tamtak an oma, lungtuk mihai le thing sin mihai,

¹⁶rângachak hai, sumru hai, thîr le dâr sin thei tak takhai khom an itam a ni. Phut pehai ta ro, RENGPA’N Sat nang vur ri se,” a tia.

¹⁷Davida’n Solomona san hrangin Israel hruaituhai a hrilhaia,

¹⁸“RENGPA nin Pathianin nangni an omtir hi. Hi rama lei omhai ngai chu RENGPA’N a nin hnêtira, ramhai hi ni thu hnuaia om a ni ta.

¹⁹Nin lungrîl murdi’n RENGPA nin Pathian sin chu a dik takin sin ta roi. RENGPA Thuthung Bôm le Pathian bêlbûr irthiang siana in sin ta roi,” a tia.