Read Hrangkhol 1 THURCHI SUINA 23 Bible Online

1 THURCHI SUINA 23 - Hrangkhol bible

1 THURCHI SUINA 23

¹Davida chu a ulianin a hong tar ok tâka. Solomona kha Israelhai rêng a hon changtir tâka.

²Israel hruaituhai, ochaihai le Levi irchi murdihai chu Davida’n a bukkhômhaia.

³Levi irchia mi kum sômthum chung tianga mi a tephaia, mi sîngthum le sângriat an dêna.

⁴Mi sînghni le sângminlihai chu tempil sin enkoltuin a siahaia; mi sângruk chu thil irziak infela thu buaihai infel hrang a tia.

⁵Mi sângminlihai chu sipai sintho hrangin a tia; mi sângminli danghai chu rêngin a ipêk thil tum inring thei hai, tum puma RENGPA inpâkna hla sak hrangin a tia.

⁶Davida’n Levi irchihai chu an irlo fe dân enin pôl thumin a senhaia. Gersona, Kohata le Mararia pôlhai an ni.

⁷Gersona khan nâipasal inhni Ladana le Simeia a neia.

⁸Ladana’n nâipasal inthum Jehiela, Zethama le Joela a neihaia.

⁹Hihai hi Ladana irchia hruaituhai chu an ni.

¹⁰Simeia irchihai chu a ulian dônin hihai hi an ni; Jahata, Zina, Jeusa, Beria.

¹¹Hi mi minlihai hi Simeia nâihai chu an ni. Jahata chu a hruaitu tak a nia, Ziza chu a hnuai renga a ni; Jeusa le Beria hin nâi nei intam mahai, irchi khat anga tep an ni.

¹²Kohata hin nâipasal minli Amrama, Izhara, Hebrona, le Uziela a neia.

¹³Amrama hi Arona le Mosiahai pa a ni. Arona hi ar chihai le, RENGPA biakna mirimhoi thilinhlanhai inhlana bêlbûr irthiang enkoltu le RENGPA irhminga mipuihai hranga satvurna hriltu hranga indang bîk a ni.

¹⁴Pathian mi Mosia irchihai rêk chu Levi irchihai laia tep sa an ni.

¹⁵Mosia’n nâipasal inhni Gersoma le Eliezera a neia.

¹⁶Gersoma irchihai laia mi inlâr Sebuela a ni.

¹⁷Eliezera hin nâipasal inkhat vai Rehabia a neia. Rehabia hin chu nâi a nei intama.

¹⁸Kohata nâi ulian tak hnuaia Izhara’n nâipasal Selomita a neia; ama hi an hruaitu tak a ni.

¹⁹Kohata nâi nôk le Hebrona’n nâipasal minli Jeria, Amari, Jahziela le Jekameama a neia.

²⁰Kohata nâi mitum Uziela’n nâipasal inhni Mika le Isia a neia.

²¹Meraria nâihai chu Mahlia le Musia an ni. Mahlia nâihai chu Eliazara le Kisa an ni.

²²Eliazara hin nâinupang vai a neia, nâipasal nei loiin a thia. A nâinu hi Kisa nâipasalin a neia.

²³Meraria nâipasal Musia hin nâi inthum Mahlia, Edera le Jeremota a neia.

²⁴Hihai hi an irchihai chunga irhming irziak ving, Levi irchihai chu an ni, kum sômhni chung tianga mihai chu,

²⁵Davida’n, “RENGPA Israelhai Pathianin a mihai chu râlirvei loiin an omtirhaia. Jerusalema a om mai hrang sikin.

²⁶Levi irchihaiin RENGPA omna hrang bokrop le bungrua danghai chu irzôn thi thiai nang ta no ni,” a tia.

²⁷Davida thu angin Levi irchihai chu kum sômhni an kâiin chu sinthothei hranga irhming irziak ving an ni.

²⁸Hi sinhai hi an itho hrang chu a ni. Arona irchia ochaihai Pathian biakna changpui le tempil kholâia tentan sûnga bêlbûr irthiang vong infâi,

²⁹Pathian ta hranga bai ser inhlan hrang siam le, chol kop loihai thep le baidi oliv hriak leh irzêl, tempila thil inhlan lei lâka irtê infel.

³⁰A sûn a zâna RENGPA inpâka hla sak hi a ni.

³¹Sabat nihaia, tha thar nî sûna, kût nî sûna, hâlirvôm thilinhlan laia inpâkna hlasak hrang mi an inkunghaia, khahai khan inpâkna hla an isak mai hrang a ni.

³²Hmun irthianga Biakbuk in chu enkol an ta, ochai Arona irchi le an urênghai sin an itho pehai hrang a ni.