Read Hrangkhol 1 THURCHI SUINA 26 Bible Online

1 THURCHI SUINA 26 - Hrangkhol bible

1 THURCHI SUINA 26

¹Levi irchia, tempil pulis a ihmang mi da danghai chu hiang hin a ni. Kora irchi laia mi Kora nâipa, Asafa in mihai laia mi Meselemia khan

²nâipasal sari a neia, a ulian dônin hihai hi an ni, Zekaria, Jediaela, Zebadia, Jathniela,

³Elama, Jehohanana le Eliehoenaia.

⁴Obed-edoma khom Pathianin sat a vura, nâipasal sari a neia. A ulian dôna irziakin Simeia, Jehonadaba, Joa, Sakara, Nethanela,

⁵Amiela, Isakara, Peulethaia hai,

⁶Obed-edoma nâipasal ulian tak Semaia hai nâi kiruk Othnia, Refaela, Obeda, Elzabada, Elihua, Semaia hai an nia.

⁷An irchihai laia mi ingîk, mi isong tak tak an ni. A nâipang ual inhnihai vâng hi chu mi hrât ichiom tak an ni.

⁸Obed-edoma irchihai ata anni sinthoa fel tatak mi sômruk inhni an om.

⁹Meselemia irchi laia mi hlo chuk sômhleiriat an om.

¹⁰Meraria irchi Hosa’n nâipasal minli a neia, Simria,

¹¹Hilkia, Tebalia, Zekaria hai. Hasa irchihai laia tempil pulis sômhleiringa an om.

¹²Tempil pulishai chu an irlo fe dân angin pôl da dangin an oma, Levi irchihai ang dênin tempila sintho hrang zoro an indang pehaia.

¹³A tha tin tam le tôm thu ni loiin, khô mikot kha mo an ihrung hrang ti inhriatna hrangin tâ an sân ngai.

¹⁴Selemia haiin nisua tianga mikot an changa, a nâipa Zekaria’n hmâr tianga mikot a changa, Zekaria hi roirêl pôlhai laia vâr tak a ni.

¹⁵Obed-edoma haiin sim tianga mikot an changa, a nâihaiin tempila thil siakhômna in kha an changa.

¹⁶Supima le Hosa chu nitâk tianga mikot an changa, lampui kôla Saleket mikot an iti khom an hrung sa. Sin chu an irsem irhlôm ngai a ni.

¹⁷Nisua tianga mikota khan a sûn tin mi kiruk an ngîr ngaia, hmâr tianga khan mi minli, sim tiang khom mi minliin an hrunga, thil siakhômna hrung khom a sûn tin pasal minli, thil siakhômna inkhat hi mi inhniin an ihrung ngai a ni.

¹⁸Nitâk tianga tentan hai, lampui kôla mi minli, tentan sûnga mi inhni an siahaia.

¹⁹Ama hi Kora le Meraria irchihai hrung hranga a ni.

²⁰Levi irchi, mi senkhat chu tempil tholôm kok le thilpêk bukkhômna tentan enkoltu an ni.

²¹Gersona nâipasal inkhat Ladana chu ama nâi Jehiela irchihai le Gersona hai hruaitu tak a ni.

²²A nâipasal hni Zethana le Joela’n tempil tholôm kok le thilpêk bukkhômna an enkola.

²³Amrama irchihai, Izhara irchihai, Hebron irchihai le Uziela irchihai chôitum an tuk pehaia.

²⁴Gersoma nâipa Sebuela, Mosia tupa chu tempil sum enkoltu lutak a ni.

²⁵Gersoma urêngpa Eleazara sikin Selomit-hai le in sûng khat mi angin an oma, Eleazara’n Rehabia a neia, ama hin Jesaia a neia, ama hin Zikria a neia, Zikria hin Selomita a nei a ni.

²⁶Selomita leh a nâihaiin rêng Davida, in sûng mi hruaitu hai le irchi da danga hruaitu le mipui hruaituhaiin Pathian hranga thilpêk irfuang hai kha an en infela, tempil sinna’n irdoinaa râllâk sumhai kha an hong ipêk ngai a ni.

²⁷Selomita le a nâihaiin tempila hmang hrang mihai hong ipêk murdi an enkola,

²⁸deipu Samuela hong ipêk hai, rêng Saula ipêk hai, rêng Davida ipêk hai le Nera nâipa Abnera ipêk, Zeruii nâipa Joaba ipêk hai khom an enkol sa a ni.

²⁹Izhara irchi laia mi Kenania le a nâihai chu khopui pên tianga ram opna sin an inthotirhaia, thurchi vong insa, Israel mihai thubuai an irfûktir ngai a ni.

³⁰Hebron irchihai laia mi Hasabia le a in mihai mi sângkhat irzasari chu Jordan nitâk tianga optuin a siaa, sakhua le vântâng thil ngaitua ngai a ni.

³¹Hebron irchi hruaitu tak chu Jeria a ni. Davida rêng kum sômminlinaa Hebron irchihai thurchi kha an suia. Hi irchia mi sipai hrâttak tak Gilead bial Jazer khuaa an oma.

³²Jeria urênghai laia rêng Davida in mi sânghni irzasari, hruaitu fel tak tak an thang suakhaia, Jordan tui nisua tianga bial sûnga, Reubena irchihai, Gada irchihai, le nisua tianga Manasea irchihai omna bial sakhua le khotâng thila optuin a sia ta.