Read Hrangkhol 1 THURCHI SUINA 27 Bible Online

1 THURCHI SUINA 27 - Hrangkhol bible

1 THURCHI SUINA 27

¹Israel mi om zât a in sûnga a hruaituhai sângkhat pôl hruaitu hai, irzakhat hruaitu hai le lekha irziaktu hai, rêng kôla sorkâr sintho pôl khata mi sînghni sângminli an nia, kumtuangin a tha tina hruaitu irthûl ngai an ni.

²Tha khatna sintuhai mi sînghni sângminlihai chu Zabdiela nâipa Jesobeama’n a hruaia.

³Ama hi Juda nâi Pereza irchia mi a ni.

⁴Tha hnina sinthotuhai chu sînghni sângminli hai chu Aho mi Dodaia’n a hruaia. Hi pôl hruaitu tak hnuaia mi chu Miklota a ni.

⁵Tha thumna sinhai chu mi sînghni sângminlihai chu ochai Jehoiada nâipa Benaia’n a hruaia.

⁶“Pasal sa sômthum” tihai laia om kha a nia. A nâipa Amizabada’n hi pôl hi a hruaina sin kha a isan ngai a ni.

⁷Tha minlina sinhai chu mi sînghni sângminli chu Joaba sangpa Asahela’n a hruaia. A nâipa Zebadia khan hi pôl hi a hruaihai sa ngai.

⁸Tha ringana sinhai chu mi sînghni sângminli chu Izra mi Samhutan khan a hruaia.

⁹Tha rukna sinhai chu mi sînghni sângminli chu Tekoa khuaa mi Ikesa’n a hruaia.

¹⁰Tha sarina sinhai chu mi sînghni sângminli chu Pelon mi Efraima irchia Heleza’n a hruaia.

¹¹Tha riatna sinhai chu mi sînghni sângminli chu Hosa mi Sibekaia’n a hruaia. Ama hi Judahai laia Zera irchia mi a ni.

¹²Tha kuakna sinhai chu mi sînghni sângminlihai chu Benjamina bial Anathot khuaa mi Abiezera’n a hruaia.

¹³Tha sômna sinhai chu mi sînghni sângminli chu Netofa khuaa mi Maharaia’n a hruaia. Ama hi Zera irchi laia mi a ni.

¹⁴Tha sômhleikhatna sinhai chu mi sînghni sângminlihai chu Efraima bial Pirathon mi Benaia’n a hruaia.

¹⁵Tha sômhleihnina sinhai chu mi sînghni sângminli Netofa khua mi Othniela irchi Heldaia’n a hruaia.

¹⁶Reubena irchia hruaitu chu Zikri nâipa Eliazera a ni. Simeona irchi hruaitu chu Maaka nâipa Sefatia a ni.

¹⁷Levi irchi hruaitu chu Kemuela nâipa Hasabia a ni. Arona irchi hruaitu chu Zadoka a ni.

¹⁸Juda irchia hruaitu chu Davida upa Elihua a ni. Isakora irchi hruaitu chu Obadia nâipa Omria a ni.

¹⁹Zebulun irchia hruaitu chu Obadia nâipa Ismaia a ni. Naftalia irchi hruaitu chu Azriela nâipa Jeremota a ni.

²⁰Efraima irchia hruaitu chu Azazia nâipa Hosea a ni. Nitâk tianga om Manasea irchia hruaitu chu Pedaia nâipa Joela a ni.

²¹Nisua tianga Gilead-a om Manasea irchia hruaitu chu Zekaria nâipa Idoa a ni. Benjamina irchia hruaitu chu Abnera nâipa Jaasiela a ni.

²²Dana irchia hruaitu chu Jerohama nâipa Azarela a ni. Hihai hi Israel nam bing binga hruaituhai chu an ni.

²³Irteppuia khan rêng Davida’n kum sômhni hnuai tianga mi chu tep sa maka, mihai chu irvâna ârsi angin tam an tih RENGPA’N chu a tephai mai sikin.

²⁴Zeruii nâipa Joaba’n irteppui chu a hruaia. Khannisian zoi irman maka, hi irteppui sikin Pathianin Israelhai chu a soisaka, mi idôr ngân mo an om tia rêng Davida thurchi irziakna khom khan irziak ni ma.

²⁵Reng sum enkoltu chu Adiela nâipa Azmaveta’n a enkola, kho dadanga rêng hranga puan siana inhai chu Uzia nâipa Jonathana’n a enkola.

²⁶Reng loia sinthotuhai chu Keluba nâipa Ezria’n a enkola.

²⁷Reng grep enkoltu chu Rama mi Simeia a ni. Uain siakhômna enkoltu chu Sefam mi Zabdia a ni.

²⁸Nitâk tianga tâng irphutna rêng, oliv le theipui irhuan chu Gedar mi Baal-Hanana’n a enkola. Oliv sahriak enkoltu chu Joasa a ni.

²⁹Saron phâia rêng sa enkoltu chu Saron mi Sitraia’n a enkola. Phâi dadanga sa enkoltu chu Adlaia nâipa Safata khan a ienkol a ni.

³⁰Saringsei enkoltu chu Ismaela mi Obila a ni. Sakuartung enkoltu chu Meronot mi Jehdeia a ni.

³¹Kêlbelra le kêl rual chu Hagria mi Jaziza ienkol a ni. Hi mihai hi Davida mi, a sum le pâi enkoltuhai chu an ni.

³²Davida pa tianga mi, Jonathana, mi vâr tak, lekha thei tak chu, a thurôn ngai a ni. Hakmona nâipa Jehiela le rêng nâi irchutirtu an ni.

³³Ahithofela chu rêng thurôn ngai a nia, Ark mi Husaia chu rêng rualpa a ni.

³⁴Ahithofela thi zoia Benaia nâipa Jehoiada le Abiathara chu rêng thurôn ngaihai an ni, Joaba chu rêng sipai hruaitu a ni.